ຂຽນຂ່າວໂດຍ : ຊົງລີ ຢາລື້ໄຊ
ໃນຕອນເຊົ້າວັນພະຫັດ ວັນທີ 20 ມິຖຸນາ 2019 ເວລາ 08 ໂມງ 30 ນາທີ ຢູ່ທີ່ຫ້ອງປະຊຸມໃຫຍ່ ຊັ້ນ III ຫ້ອງການ ທະນາຄານ ນະໂຍບາຍ ສາຂາຫົວພັນ ໄດ້ຈັດພິທີເປີດກອງປະຊຸມໃຫ່ຍ ໜ່ວຍສະຫະພັນແມ່ຍິງ ທະນາຄານ ນະໂຍບາຍ ສາຂາຫົວພັນ ຄັ້ງທີ I ຂື້ນຢ່າງເປັນທາງການ ພາຍໃຕ້ການເປັນປະທານ ຂອງທ່ານ ນາງ ພຸດສະດີ ພູມະພົມ ປະທານໜ່ວຍສະຫະພັນແມ່ຍິງ ທນບ ສາຂາຫົວພັນ, ເປັນກຽດເຂົ້າຮ່ວມມີ ທ່ານ ທີບພະກອນ ສູນດາລາ ຫົວໜ້າ ທນບ ສາຂາຫົວພັນ ແລະ ທ່ານ ນາງ ແພງວັນ ເສີມຄຳຫຼ້າ ຮອງປະທານແມ່ຍິງແຂວງ, ຕາງໜ້າ 03 ອົງການຈັດຕັ້ງ ແລະ ແຂກຖຶກເຊີນຈາກ ທະນາຄານ ພັດທະນາລາວ ແລະ ທະນາຄານ ສົ່ງເສີມກະສິກຳ ຕະຫຼອດຮອດສະມາຊິກແມ່ຍິງເຂົ້າຮ່ວມກອງປະຊຸມທັງໝົດ 21 ທ່ານ, ຊາຍ 03 ທ່ານ.
ກອງປະຊຸມ ທ່ານ ນາງ ພຸດສະດີ ພູມະພົມ ປະທານໜ່ວຍສະຫະພັນແມ່ຍິງ ທະນາຄານ ນະໂຍບາຍ ສາຂາຫົວພັນ ໄດ້ຂື້ນຜ່ານບົດລາຍງານການເມືອງທັງ 2 ພາກ ພ້ອມທັງສະຫຼຸບຕີລາຄາການເຄື່ອນໄຫວວຽກງານຮອບດ້ານ ຂອງໜ່ວຍສະຫະພັນແມ່ຍິງໄລຍະ 05 ປີ 2014-2019 ຜ່ານມາ ແລະ ວາງທິດທາງແຜນການ 05 ປີໃນຕໍ່ໜ້າ 2020 ຫາ 2024, ກອງປະຊຸມໄດ້ຮັບຮອງເອົາບົດລາຍງານສອງພາກ, ການປະກອບຄຳຄິດຄຳເຫັນຂອງບັນດາສະຫາຍສະມາຊິກແມ່ຍິງ, ຕໍ່ບົດສຳຫຼວດຜ່ານມາຂອງຄະນະໜ່ວຍຊຸດເກົ່າ, ແລະ ຄະນະຊຸດເກົ່າໄດ້ຂື້ນກ່າວລາໜ້າທີ່ ກອງປະຊຸມໄດ້ຈັດຕັ້ງປ່ອນບັດຄັດເລືອກເອົາຄະນະປະທານໜ່ວຍສະຫະພັນແມ່ຍິງຊຸດໃໝ່ ມີຜູ້ສະໝັກ 05 ທ່ານ ໃນນັ້ນກອງປະຊຸມຄັ້ງປະຖົມມະລຶກຂອງໜ່ວຍແມ່ຍິງ ທນບ ສາຂາຫົວພັນ ໄດ້ເລືອກຕັ້ງເອົາຄະນະປະທານແມ່ຍິງຊຸດໃໝ່ ເຊີ່ງຜູ້ຮັບຜິດຊອບແຕ່ລະໜ້າທີໃນຊຸດທີ່ I ມີ 04 ທ່ານ ຄື:
- ທ່ານ ນາງ ພຸດສະດີ ພູມະພົມ ເປັນປະທານ.
- ທ່ານ ນາງ ສ້ອຍພອນ ຫວັງວອນທໍ ເປັນຮອງປະທານໜ່ວຍ ພ້ອມທັງເປັນປະທານກວດກາ.
- ທ່ານ ນາງ ນ້ຳເງິນ ກອງພານີ ເປັນຄະນະໜ່ວຍ
- ທ່ານ ນາງ ຜັ້ງ ຈັ່ງສຸລິໄຕ ເປັນຮອງປະທານກວດກາ.
ໃນກອງປະຊຸມ ທ່ານ ນາງ ແພງວັນ ເສີ້ມຄຳຫຼ້າ ຮອງປະທານສະຫະພັນແມ່ຍິງແຂວງ ຍັງໃຫ້ກຽດຂື້ນມອບໃບຍ້ອງຍໍດີເດັ່ນໃນການເຄື່ອນໄຫວວຽກງານໃນໄລຍະ 05 ປີຜ່ານມາ ( ປີ 2014-2019 ) ໃຫ້ແກ່ໜ່ວຍສະຫະພັນແມ່ຍິງ ທະນາຄານ ນະໂຍບາຍ ສາຂາຫົວພັນ ຈໍານວນ 01 ໃບ ແລະ ມອບໃບຍ້ອງຍໍໃຫ້ສະມາຊິກສະຫະພັນແມ່ຍິງ ຈໍານວນ 10 ທ່ານ ພ້ອມທັງໃຫ້ກຽດໂອ້ລົມ, ໃຫ້ທິດຊີ້ນໍາຕໍ່ກອງປະຊຸມ ເຊິ່ງທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານດ້ານຕ່າງໆ ທີ່ສາມາດຍາດມາໄດ້ ແລະ ຍັງໄດ້ໃຫ້ທິດຊີ້ນຳຕໍ່ກອງປະຊຸມ ເພື່ອເປັນບ່ອນອິງໃນການເຄື່ອນໄຫວຕໍ່ໜ້າດັ່ງນີ້:
– ພ້ອມກັນສືບຕໍ່ສຶກສາອົບຮົມດ້ານການເມືອງແນວຄິດ ໃຫ້ສະມາຊິກສະຫະພັນແມ່ຍິງພາຍໃນໜ່ວຍ ໃຫ້ເປັນປົກກະຕິ ແລະ ເປັນສິ່ງສໍາຄັນ.
– ຮຽກຮ້ອງໃຫ້ຄະນະສະຫະພັນແມ່ຍິງຊຸດໃໝ່ ໃຫ້ເອົາໃຈໃສ່ນໍາພາສະມາຊິກຂອງຕົນ ຮ່ວມຊີວິດປະຈໍາເດືອນໃຫ້ເປັນປົກກະຕິ ເພື່ອຜັນຂະຫຍາຍດ້ານດີ ແລະ ພ້ອມກັນແກ້ໄຂດ້ານອ່ອນ ໃຫ້ມີຄວາມກ້າວໜ້າ ພ້ອມທັງນໍາເອົາເອກະສານ ທີ່ສໍາຄັນມາເຜີຍແຜ່ ເຊັ່ນວ່າ : ມະຕິຄໍາສັ່ງ ຂໍ້ກໍານົດ,ກົດໝາຍ ,ກົດລະບຽບຂອງກົມກອງ ,ກົດລະບຽບຂອງສະຫະພັນແມ່ຍິງລາວ ມາຜັນຂະຫຍາຍຈັດຕັ້ງເຜີຍແຜ່ເຊື່ອມຊຶ່ມໃຫ້ສະມາຊິກຂອງຕົນຮັບຮູ້ ແລະ ເຂົ້າໃຈຕໍ່ແນວທາງນະໂຍບາຍຂອງພັກ-ລັດ ເປັນແຕ່ລະໄລຍະ.
– ໃຫ້ປັບປຸງແບບແຜນວີທີນໍາພາ, ແບບແຜນວິທີການເຮັດວຽກໃຫ້ມີປະສິດທິຜົນສູງ.
– ປຸກລະດົມເອື້ອຍນ້ອງແມ່ຍິງ ເພີ່ມທະວີຄວາມສາມັກຄີ-ຮັກແພງຊ່ວຍເຫຼືອເຊິ່ງກັນແລະກັນ ມີຄວາມເປັນເອກະພາບໃນການປະຕິບັດໜ້າທີ່ວຽກງານ ເປັນໝູ່ຄະນະ.
– ສືບຕໍ່ຮັກສາມູນເຊື້ອ ວັດທະນະທໍາອັນດີງາມຂອງຊາດ ກໍ່ຄື ຮີດຄອງປະເພນີ ຂອງແມ່ຍິງຊາວແຂວງຫົວພັນ.
– ເອົາໃຈໃສ່ຈັດຕັ້ງປະຕິບັດ ,ກວດກາ,ປະເມີນຜົນ ຂອງຂະບວນການແຂ່ງຂັນ 3 ດີ ໃນຕໍ່ໜ້າໃຫ້ປະກົດຜົນເປັນຈິງ.
– ສະມາຊິກສະຫະພັນແມ່ຍິງທຸກສະຫາຍ ຕ້ອງມີຄວາມດຸໝັ່ນຫ້າວຫັນ ຕັດສິນໃຈສູງຕໍ່ວຽກງານ ວິຊາສະເພາະຂອງຕົນ, ມີໄຫວຜິກໃນການພັດນາຕົນເອງ ແລະ ຊອກຮູ້ຮໍ່າຮຽນນຳບັນດາ ວຽກງານເຕັກໂນໂລຊີ ໃຫ້ມີຄວາມທັນສະໄໝ ເພື່ອນຳມາພັດທະນາອົງກອນຂອງຕົນ.
