ເປີດກອງປະຊຸມໃຫຍ່ໜ່ວຍພັກຄັ້ງທີ III ຂອງທະນາຄານນະໂຍບາຍ ສາຂາ ຫຼວງນໍ້າທາ
ໃນຕອນບ່າຍ ເວລາ 13 ໂມງ 30 ນາທີ ຂອງວັນທີ 24 ຕຸລາ 2024, ຢູ່ຫ້ອງປະຊຸມທະນາຄານນະໂຍບາຍສາຂາ ຫຼວງນໍ້າທາ ໄດ້ເປີດກອງປະຊຸມໃຫຍ່ຄັ້ງທີ່ III ຂອງໜ່ວຍພັກທະນາຄານນະໂຍບາຍ ຂຶ້ນ ພາຍໃຕ້ການເປັນປະທານກອງປະຊຸມໂດຍ ສະຫາຍ ອີນປອນ ຄົມວິຈິດ ເລຂາຄະນະພັກຮາກຖານທະນາຄານແຂວງຫຼວງນໍ້າທາ, ມີແຂກຖືກເຊີນຈາກ 3 ອົງການຈັດຕັ້ງພັກ, 3 ທະນາຄານທຸລະກິດອ້ອມຂ້າງ, ຄະນະໜ່ວຍພັກ, ສະມາຊີກພັກສົມບູນ ເຂົ້າຮ່ວມລວມທັງໝົດມີ 22 ສະຫາຍ ຍິງ 09 ສະຫາຍ.
ກອງປະຊຸມ ສະຫາຍ ນ ພອນທິບ ກາຫວັນ ກຳມະການໜ່ວຍພັກ ທນບ ໄດ້ຜ່ານບົດລາຍງານການເມືອງໃນໄລຍະ 5 ປີຜ່ານມາ 2020-2024 ແລະ ວາງທິດທາງແຜນການ 05 ປີຕໍ່ໜ້າ 2025-2029 ແລະ ສະຫາຍ ລີ ວັນນະປະເສີດ ເລຂາໜ່ວຍພັກ ຂື້ນ ຜ່ານບົດສໍາຫຼວດການນໍາພາລວມຂອງຄະນະພັກຊຸດເກົ່າໃນໄລຍະຜ່ານມາຕໍ່ກອງປະຊຸມ, ໃນນັ້ນໄດ້ຕີລາຄາດ້ານດີ, ດ້ານອ່ອນຂໍ້ຄົງຄ້າງ, ສາເຫດ ແລະ ບົດຮຽນໃນການຊີ້ນໍາ – ນໍາພາການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ II ໃນໄລຍະ 05 ປີຜ່ານມາ, ພ້ອມນີ້ ຜູ້ແທນສົມບູນ ແລະ ແຂກທີ່່ຖືກເຊີນເຂົ້າຮ່ວມກອງປະຊຸມໄດ້ຍົກສູງຄວາມຮັບຜິດຊອບ ແລະ ສຸມທຸກສະຕິປັນຍາຂອງຕົນເຂົ້າໃນການຄົ້ນຄວ້າປະກອບຄໍາຄິດ, ຄໍາເຫັນຕໍ່ກອງປະຊຸມຢ່າງກົງໄປກົງມາເຮັດໃຫ້ກອງປະຊຸມດໍາເນີນໄປດ້ວຍບັນຍາກາດອັນຟົດຟື້ນ ແລະ ສໍາເລັດຕາມລະດັບຄາດໝາຍທີ່ວາງໄວ້.
ກອງປະຊຸມເປັນເອກະສັນຮັບຮອງເອົາທິດທາງແຜນການ 05 ປີ ຕໍ່ໜ້ານັບແຕ່ປີ 2025 ຮອດປີ 2029 ເຊິ່ງມີເນື້ອໃນດັ່ງນີ້:
- ນໍາພາສືກສາອົບຮົມການເມືອງແນວຄິດໃຫ້ເປັນປົກກະຕິ, ຮັບປະກັນຫຼັກການເຮັດວຽກລວມສູນປະຊາທິປະໄຕ, ເຮັດໃຫ້ການຈັດຕັ້ງພັກມີຄວາມສະຫງົບ.
- ປະຕິບັດການຄວບຄຸມໜີ້ບໍ່ເກີດດອກອອກຜົນໜີ້ຕ້ອງຮັບທວງຍາກ NPLໃຫ້ຢູ່ໃນລະດັບ 3 % ແລະ ສູ້ຊົນເກັບໜີ້ NPLໃນຜັງ-ນອກຜັງ ໃຫ້ໄດ້ຕາມແຜນການປີໄດ້ຮັບຮອງຈາກສຳນັກງານໃຫ່ຍ.
- ຈັດຕັ້ງປະຕິບັດແຜນທຸລະກິດຂອງທະນາຄານຕົນໃຫ້ບັນລຸ 80% ຂື້ນໄປຂອງແຜນການປີທີ່ໄດ້ຮັບຮອງຈາກສຳນັກງານໃຫ່ຍ.
- ຈັດຕັ້ງປະຕິບັດບໍ່ໃຫ້ມີຂາດທືນສະສົມໃນໃບລາຍງານຖານະການເງິນ ປະຈຳປີ ຂາດທືນສະສົມ.
- ສູ້ຊົນປ່ອຍສິນເຊຶ່ອເງິນກູ້ໃຫ້ໄດ້ ຕາມແຜນການປີ.
- ວຽກງານປ້ອງກັນພັກ – ພະນັກງານໃຫ້ມີຄວາມສະຫງົບປອດໄພຮ້ອຍສ່ວນຮ້ອຍບໍ່ໃຫ້ເກີດມີປະກົດການຫຍໍ້ທໍ້ເກີດຂຶ້ນກັບສະມາຊິກພັກ-ພະນັກງານ.
ກອງປະຊຸມໄດ້ໃຊ້ສິດປະຊາທິປະໄຕຂອງຕົນປ່ອນບັດຄັດເລືອກເອົາຄະນະພັກຊຸດໃໝ່ບົນພື້ນຖານ ຫຼັກການລວມສູນປະຊາທິປະໄຕ ແລະ ຖືກຕ້ອງສ່ອດຄ່ອງກັບມາດຖານທີ່ກໍານົດໄວ້ເຊິ່ງມີຜູ້ອອກຮັບສະໜັກເລືອກຕັ້ງ ຈໍານວນ 05 ສະຫາຍ, ຍິງ 02 ສະຫາຍ, ເລືອກໄດ້ 03 ສະຫາຍ, ຍິງ 01 ສະຫາຍຄື:
- ສະຫາຍ ລີ ວັນນະປະເສີດ ເລຂາໜ່ວຍພັກ ທນບ.
- ສະຫາຍ ນິຄົມ ບັນນະວົງ ຮອງເລຂາໜ່ວຍພັກ ທນບ, ປະທານກວດກາ.
- ສະຫາຍ ນ. ພອນທິບ ກາຫວັນ ກຳມະການໜ່ວຍພັກ.
ຕອນທ້າຍກອງປະຊຸມຍັງໄດ້ຮັບຟັງການໂອ້ລົມຈາກ ສະຫາຍ ອີນປອນ ຄົມວິຈິດ ເລຂາຄະນະພັກຮາກຖານທະນາຄານແຂວງຫຼວງນໍ້າທາ, ເຊິ່ງສະຫາຍໄດ້ສະແດງຄວາມຍ້ອງຍໍຊົມເຊີຍຕໍ່ການຊີ້ນໍາ – ນໍາພາຂອງຄະນະໜ່ວຍພັກຊຸດເກົ່າທີ່ໄດ້ຊີ້ນໍາ – ນໍາພາພະນັກງານ, ສະມາຊິກພັກປະຕິບັດໜ້າທີ່ການເມືອງຂອງຕົນຍາດໄດ້ຜົນສໍາເລັດຫຼາຍດ້ານພ້ອມກັນນັ້ນສະຫາຍຍັງໄດ້ສະແດງຄວາມເປັນຫ່ວງເປັນໄຍຕໍ່ດ້ານອ່ອນ ແລະ ຂໍ້ຄົງຄ້າງ ສະຫາຍໄດ້ຮຽກຮ້ອງໃຫ້ຄະນະໜ່ວຍພັກຊຸດໃໝ່ຈະຕ້ອງໄດ້ສືບຕໍ່ປັບປຸງແກ້ໄຂ. ສະຫາຍມີຄວາມເຊື່ອໝັ້ນຕໍ່ຄະນະພັກຊຸດໃໝ່ທີ່ຈະສືບຕໍ່ຊີ້ນໍາ – ນໍາພາ ຈັດຕັ້ງປະຕິບັດມະຕິກອງປະຊຸມໃຫຍ່ໃຫ້ຍາດໄດ້ຜົນງານ ແລະ ມີຜົນສໍາເລັດອັນຍິ່ງໃຫຍ່ກວ່າເກົ່າ.
ກອງປະຊຸມໃຫຍ່ຍັງໄດ້ຮຽກຮ້ອງມາຍັງສະມາຊິກພັກທຸກສະຫາຍ ຈົງໄດ້ເຊີດຊູສະຕິຄວາມເປັນເຈົ້າການ, ສະຕິຄວາມຮັບຜິດຊອບຕໍ່ໜ້າທີ່ການເມືອງຕາມການມອບໝາຍຂອງພັກ – ລັດໃຫ້ສູງຂຶ້ນເລື້ອຍໆໃຫ້ວຽກງານແຕ່ລະດ້ານມີການຫັນປ່ຽນໃໝ່ຢ່າງຕັ້ງໜ້າເຮັດໃຫ້ໜ່ວຍພັກມີຄວາມປອດໃສ, ເຂັ້ມແຂງ ແລະ ໜັກແໜ້ນ.
ກອງປະຊຸມໄດ້ອັດລົງຢ່າງເປັນທາງການໃນເວລາ 17 ໂມງ 00 ນາທີ ດ້ວຍຜົນສໍາເລັດ.
