ກອງປະຊຸມໃຫຍ່ສະມາຊີກພັກ ຂອງຄະນະພັກ ຮາກຖານທະນາຄານ ຜົ້ງສາລີ ຄັ້ງທີ I ໄດ້ຈັດຂຶ້ນໃນຕອນເຊົ້າຂອງວັນທີ 30 ພຶດສະພາ 2025 ນີ້, ທີ່ຫ້ອງປະຊຸມຂອງຫ້ອງວ່າການແຂວງ ໂດຍພາຍໃຕ້ການເປັນປະທານຂອງສະຫາຍ ສົມຫັວງ ສຸວັນນະຄຳ ເລຂາຄະນະພັກຮາກຖານ ຄະນາຄານ ຜົ້ງສາລີ, ເປັນກຽດເຂົ້າຮ່ວມຂອງສະຫາຍ ວິສອນ ລາວເມົາ ກໍາມະການປະຈໍາພັກແຂວງ, ຮອງເຈົ້າແຂວງ, ຜູ້ຊີ້ນຳຂົງເຂດເສດຖະກິດຂັ້ນແຂວງ, ມີບັນດາສະຫາຍຄະນະຮັບຜິດຊອບກອງປະຊຸມຂັ້ນແຂວງ, ແຂກຖືກເຊີນ, ຕົວແທນອົງການຈັດຕັ້ງມະຫາຊົນ ຕະຫຼອດຮອດສະມາຊີກພັກພາຍໃນຄະນະພັກຮາກຖານເຂົ້າຮ່ວມ.
ໃນກອງປະຊຸມສະຫາຍ ສົມຫັວງ ສຸວັນນະຄຳ ເລຂາຄະນະພັກຮາກຖານ ຄະນາຄານ ຜົ້ງສາລີ ໄດ້ກ່າວໄຂກອງປະຊຸມຢ່າງເປັນທາງການ, ຈາກນັ້ນສະຫາຍ ສີຟອງ ແກ້ວກົງຕາ ຮອງເລຂາຄະນະພັກຮາກຖານ ຄະນາຄານຜົ້ງສາລີ ໄດ້ຜ່ານຮ່າງບົດລາຍງານການເມືອງທັງສອງພາກ ເຊິ່ງສະຫາຍໄດ້ຍົກໃຫ້ເຫັນ ດ້ານດີ-ຜົນງານ ທີ່ຕັ້ງໜ້າ, ດ້ານອ່ອນ-ຂໍ້ຄົງຄ້າງ ທີ່ຈະຕ້ອງໄດ້ປັບປຸງແກ້ໄຂ, ບົດຮຽນທີ່ຖອດຖອນໄດ້ ແລະ ທິດທາງລວມ, ຄາດໝາຍສູ້ຊົນ ແລະ ວຽກງານຈຸດສຸມໃນ 5 ປີ ຕໍ່ໜ້າ. ເຊິ່ງຄະນະຄະນະພັກຮາກຖານ ທະນາຄານຜົ້ງສາລີ ໄດ້ສ້າງຂຶ້ນໃນທ້າຍປີ 2022 ເຊິ່ງປະກອບດ້ວຍ 4 ໜ່ວຍພັກຄື: ໜ່ວຍພັກທະນາຄານການຄ້າຕ່າງປະເທດລາວ, ໜ່ວຍພັກທະນາຄານສົ່ງເສີມກະສີກຳ, ໜ່ວຍພັກ ທະນາຄານພັດທະນາລາວ ແລະ ໜ່ວຍພັກທະນາຄານນະໂຍບາຍ, ໃນໄລຍະຜ່ານມາຄະນະພັກຮາກຖານໄດ້ປະຕິບັດຕາມພາລະບົດບາດ, ສິດ ແລະ ໜ້າທີ່ຂອງຕົນດ້ວຍຄວາມຮັບຜິດ ຊອບສູງໃນການປະຕິບັດຕາມພາລະບາດ ໃນການນໍາພາດ້ານການເມືອງ, ດ້ານແນວຄິດ, ດ້ານການຈັດຕັ້ງ, ດ້ານແບບແຜນນໍາພາ ແລະ ວິທີການເຮັດວຽກ ແລະ ດ້ານຄວາມຮັບຜິດຊອບໜ້າທີ່ການເມືອງ ທີ່ໄດ້ຮັບມອບ ໝາຍໃຫ້ດ້ວຍຄວາມຮັບຜິດຊອບສູງ, ເຊິ່ງໃນໄລຍະຜ່ານມາ, ພາຍໃຕ້ການນໍາພາ-ຊີ້ນໍາ ຢ່າງໃກ້ຊິດ ຂອງຄະນະພັກຂັ້ນເທິງ, ຄະນະພັກຮາກຖານໄດ້ເອົາໃຈໃສ່ນຳພາ-ຊີ້ນໍາ ທາງດ້ານວຽກງານປ້ອງກັນຊາດ-ປ້ອງກັນຄວາມສະຫງົບ, ທາງດ້ານການເມືອງ-ແນວຄິດ, ຄຸນສົມບັດສິນທຳປະຕິວັດ ຂອງສະມາຊິກພັກ-ພະນັກງານ ຕະຫຼອດຮອດການຈັດຕັ້ງປະຕິບັດວຽກງານວິຊາສະເພາະ ຂອງບັນດາທະນາຄານ ຕາມທິດທາງນະໂຍບາຍລວມຂອງພັກ ແລະ ການຊີ້ນຳຂອງຂັ້ນເທິງຢ່າງບໍ່ຢຸດຢັ້ງ, ເຊິ່ງໄດ້ເຮັດໃຫ້ໜ່ວຍພັກມີຄວາມສະຫງົບ, ມີການຫັນປ່ຽນຢ່າງຕັ້ງໜ້າ ແລະ ມີການເຕີບໃຫຍ່ເຂັ້ມແຂງຢ່າງຮອບດ້ານ. ນອກຈາກນີ້ ກໍ່ໄດ້ເອົາໃຈໃສ່ຊີ້ນຳ ແລະ ຈັດຕັ້ງປະຕິບັດວຽກງານວີຊາສະເພາະຂອງແຕ່ລະທະນາຄານ ມີຜົນສຳເລັດໃນຫຼາຍດ້ານ.
ປະຈຸບັນພາຍໃນຄະນະ ພັກຮາກຖານ ມີຄະນະພັກຮາກຖານ 5 ສະຫາຍ, ມີສະມາຊີກພັກທັງໝົດ 51 ສະຫາຍ, ຍິງ 22 ສະຫາຍ, ຄະນະພັກແຕ່ລະທະນາຄານກໍ່ໄດ້ເອົາໃຈໃສ່ປັບປຸງສັບຊ້ອນການຈັດຕັ້ງພັກຂອງຕົນໃຫ້ມີຄວາມ ປອດໃສ, ເຂັ້ມແຂງ, ໜັກແໜ້ນ,ໄດ້ຮັບນາມມະຍົດໜ່ວຍພັກປອດໃສ ເຂັ້ມແຂງ ໜັກແໜ້ນ 2020-2024 ຕໍ່ເນື່ອງ ແລະ ໄລຍະ 5 ປີຂະຫຍາຍເຂົ້າພັກນັບແຕ່ປີ 2020-2024 ສາມາດຂະຫຍາຍມະຫາຊົນຜູ້ກ້າວໜ້າເຂົ້າເປັນສະມາຊິກພັກ 22 ສະຫາຍ,ຍິງ 10 ສະຫາຍ, ສົ່ງພະນັກງານໄປຮຽນທິດສະດີການເມືອງ 12 ສະຫາຍ, ໄລະຍະສັ້ນ 45 ວັນ, 06 ສະຫາຍ,ຂັ້ ນຕົ້ນ 04 ສະຫາຍ ຊັ້ນກາງ 02 ສະຫາຍ.
ຄະນະພັກຊຸດເກົ່າໄດ້ຜ່ານບົດສຳຫຼວດການນຳພາລວມຕະຫຼອດໄລຍະ 5 ປີທີ່ຜ່ານມາ ແລະ ພ້ອມກັນຮັບຮອງເອົາບົດລາຍງານການເມືອງ ແລະ ບົດສໍາຫຼວດການນໍາພາລວມ, ຄະນະພັກຊຸດເກົ່າໄດ້ຂຶ້ນກ່າວລາໜ້າທີ່, ພ້ອມນີ້, ບັນດາຜູ້ແທນກອງປະຊຸມໄດ້ໃຊ້ສິດປະຊາທິປະໄຕຂອງຕົນປ່ອນບັດເອົາຄະນະພັກຮາກຖານຊຸດໃໝ່ ເຊິ່ງມີຜູ້ສະໝັກ 7 ສະ ຫາຍ, ຍິງ 1 ສະຫາຍ ກອງປະຊຸມຄັ້ງປະຖົມມະລຶກ ເປັນເອກະພາບກັນຄັດເລືອກເອົາສະຫາຍ ສົມຫັວງ ສຸວັນນະຄໍາ ເປັນເລຂາຄະນະພັກຮາກຖານ, ສະຫາຍ ສີຟອງ ແກ້ວກົງຕາ ເປັນຮອງເລຂາ ທັງເປັນປະທານກວດກາ, ສະຫາຍ ຄຳສຸວົງ ໄຊຍະສິງ ເປັນກຳມະການຄະນະພັກຮາກຖານ ທັງເປັນຮອງປະທານກວດກາ, ສະຫາຍ ຄຳບຸກ ດາວຈອມເພັດ ແລະ ສະຫາຍ ອຳໄພ ອິນແກ້ວມະນີ ເປັນກຳມະການຄະນະພັກຮາກຖານ.
ໃນໂອກາດນີ້, ສະຫາຍ ວິສອນ ລາວເມົາ ກຳມະການປະຈຳພັກແຂວງ, ຮອງເຈົ້າແຂວງ ໄດ້ມີຄໍາເຫັນໂອ້ລົມ ແລະ ຊີ້ນໍາຕໍ່ກອງປະຊຸມ ເຊິ່ງສະຫາຍໄດ້ຍ້ອງຍໍຊົມເຊີຍ ຕໍ່ຜົນງານທີ່ຄະນະພັກຮາກຖານພ້ອມດ້ວຍສະມາຊີພັກຍາດມາໄດ້ໃນໄລຍະທີ່ຜ່ານມາ ພ້ອມທັງເນັ້ນໜັກໃຫ້ເພີ້ມທະວີ ການສຶກສາອົບຮົມການເມືອງແນວຄິດ ໃຫ້ສະມາຊິກພັກ, ພະນັກງານ ພ້ອມທັງເຊື່ອມຊື່ມມະຕິ, ຄຳສັັ່ງ ກົດລະບຽບຕ່າງໆ ເປັນປົກກະຕິ, ຄະນະພັກຊຸດໃໝ່ຕ້ອງເປັນເຈົ້າການໃນການຊີ້ນຳໆພາ ທຸກວຽກງານຮອບດ້ານ ພ້ອມທັງເຕົ້າໂຮມຄວາມສາມັກຄີພາຍໃນໜ່ວຍພັກໃຫ້ເປັນປືກແຜນ, ສືບຕໍ່ປັບປຸງຂອດການປະສານງານລະຫ່ວາງ 4 ທະນາຄານໃຫ້ມີຄວາມເປັນເອກະພາບ, ສືບຕໍ່ຈັດຕັ້ງວຽກງານວີຊາສະເພາະຂອງຕົນໃຫ້ສຳເລັດ ແລະ ດີຂຶ້ນເທື່ອລະກ້າວ.
