ຕອນເຊົ້າເວລາ 8: 30 ໂມງ ຂອງວັນທີ່ 26/02/2019 ທີ່ທະນາຄານນະໂຍບາຍ ສາຂາຫຼວງພະບາງ ໄດ້ເປິດກອງປະຊຸມຮັບຮອງແຜນສິນເຊື່ອປະຈຳ ປີ 2019, ຮ່ວມກັບຄະນະກຳມະການຄຸ້ມຄອງສິນເຊື່ອຂັ້ນ ນະຄອນຫຼວງພະບາງຢູ່ທີ່ຫ້ອງປະຊຸມຊັ້ນ 2 ໂດຍພາຍໃຕ້ການເປັນປະທານຂອງທ່ານ ສາຍສະໝອນ ສາລິວົງ ຮອງເຈົ້ານະຄອນຫຼວງພະບາງ ປະທານ ຄະນະກຳມະການ ຄຸ້ມຄອງສິນເຊື່ອ ນະຄອນ ຫຼວງພະບາງ, ທ່ານ ຄຳພັນ ແສນຄຳ ຫົວໜ້າທະນາຄານນະໂຍບາຍ ສາຂາ ຫຼວງພະບາງ ມີຮອງຫົວໜ້າສາຂາຜູ້ຊີ້ນຳວຽກງານສິນເຊື່ອ, ຫົວໜ້າຂະແໜງ, ຮອງຂະແໜງ, ຮອງຂະແໜງທີ່ກ່ຽວຂ້ອງ ແລະ ບັນດາຄະນະກຳມະການຄຸ້ມຄອງສິນເຊື່ຶອ ນະຄອນ ຫຼວງພະບາງ ເຂົ້າຮ່ວມຢ່າງພ້ອມພຽງ.
ໃນກອງປະຊຸມ ທ່ານ ສີຈັນ ເນັ່ງເລົ່າຈາ ຮອງຫົວໜ້າສາຂາໄດ້ຜ່ານບົດສະຫຼຸບການເຄື່ອນໄຫວວຽກງານສິນເຊື່ອໃນໄລຍະ 01 ປີຜ່ານມາ ແລະ ທິດທາງແຜນການປີ 2019 ພ້ອມທັງຜ່ານແຜນສິນເຊື່ອປະຈຳປີ 2019 ແຫຼ່ງສິນເຊື່ອທັງໝົດ 327,000,000 ກີບ ເປັນແຫຼ່ງທຶນສາມສ້າງຈໍານວນເງິນ 327,000,000 ກີບ, ຈາກນັ້ນກອງປະຊຸມໄດ້ຮັບຟັງການປະກອບຄຳຄິດຂອງບັນດາກຳມະການຄຸມຄອງສິນເຊື່ອຂັ້ນນະຄອນ ຫຼວງພະບາງ, ເຫັນດີເປັນເອກະພາບ ຮັບຮອງເອົາແຜນສິນເຊື່ອປະຈຳປີ 2019 ເພື່ອສະໜອງສິນເຊື່ອໃຫ້ແກ່ປະຊາຊົນຢູ່ຂົງເຂດບ້ານສາມສ້າງ ນະຄອນຫຼວງພະບາງ, ແຂວງຫຼວງພະບາງ.
ຕອນທ້າຍກອງປະຊຸມ ທ່ານ ສາຍສະໝອນ ສາລິວົງ ປະທານກອງປະຊຸມຍັງໃຫ້ກຽດໂອ້ລົມຕໍ່ກອງປະຊຸມ ທ່ານໄດ້ກ່າວວ່າ: ເພື່ອເປັນການຕີລາຄາໝາກຜົນ ການດຳເນີນງານໃນໄລຍະ 01 ປີ ຂອງທະນາຄານນະໂຍບາຍ ແລະ ຄະນະກຳມະການຄຸ້ມຄອງສິນເຊື່ອນະຄອນຫຼວງພະບາງໄດ້ລົງຊຸກຍູ້ ການຜະລິດເປັນສິນຄ້າຢູ່ບ້ານ ສາມສ້າງ ເວົ້າລວມເວົ້າສະເພາະແມ່ນ ບ້ານປາກເຊືອງ ແລະ ບ້ານເມືອງຂາຍ ນະຄອນຫຼວງພະບາງ ແຂວງຫຼວງພະບາງ. ໃນໄລຍະເວລາທີ່ຜ່ານມາເຫັນວ່າ ປະຊາຊົນມີຊີວິດທີ່ດີຂື້ນ ແລະ ມີການພັດທະນາຖານະຄອບຄົວເປັນກ້າວໆ, ພ້ອມກັນນັ້ນທ່ານປະທານກອງປະຊຸມຍັງໄດ້ເນັ້ນໜັກບາງບັນຫາດັ່ງນີ້:
– ມອບໃຫ້ຫົວໜ້າກຸ່ມບ້ານເມືອງຂາຍ ແລະ ຫົວໜ້າກຸ່ມບ້ານ ປາກເຊືອງສົມທັບກັບອຳນາດການປົກຄອງບ້ານແກ້ໄຂໜີ້ກາຍສັນຍາຈຳນວນເງິນທັງໝົດ 128,239,000 ກີບ ໃກ້ສຳເລັດພາຍໃນເດືອນ 3/2019
– ກ່ອນການປ່ອຍສິນເຊື່ຶຶອຫ້ອງການທີ່ກ່ຽວຂ້ອງ ແລະ ທະນາຄານຕ້ອງສົມທົບກັບອຳນາດການປົກຄອງບ້ານ. ກວດກາຂໍ້ມູນລູກຄ້າ, ກວດກາສະຖານທີ່ດຳເນີນກິດຈະການ ແລະ ມີການຝຶກອົບຮົມດ້ານເຕັກນິກການປູກ, ການລ້ຽງໃຫ້ພໍ່ແມ່ປະຊາຊົນ
– ໃຫ້ ທນບ ຄົ້ນຄວ້າຮ່າງລາຍລະອຽດ, ພາລະບົດບາດຂອງຄະນະໄກ່ເກ່ຍໜີ້ສິນ, ຂັ້ນບ້ານ, ຂັ້ນນະຄອນຫຼວງພະບາງໄດ້ຮັບຮອງຄັ້ງຕໍ່ໄປ
– ເຫັນດີເອົາແຜນຮັບຮອງສິນເຊື່ອປະຈຳປີ 2019 ບ້ານສາມສ້າງ ນະຄອນຫຼວງພະບາງ ແຂວງຫຼວງພະບາງຈຳນວນເງິນ 327,000,000 ກີບກ ໃນນີ້ມີໂຄງການປູກເຂົ້ານາປີ 2 ກຸ່ມ, 12 ຄອບຄົວ, ວົງເງິນ 82,000,000 ກີບ ແລະ ໂຄງການລ້ຽງຄວາຍ 1 ກຸ່ມ 5 ຄອບຄົວ ວົງເງິນ 245,000,000 ກີບ.
ກອງປະຊຸມໄດ້ດຳເນີນເປັນເວລາ 01 ຕອນ ແລະໄດ້ປິດລົງໃນເວລາ 11:45 ນາທີໃນວັນດຽວກັນ
ພາບ-ຂ່າວໂດຍ: ວິລະພອນ ພອນວິຈິດ
