ໃນຕອນແລງ ຂອງວັນທີ 25 ມີນາ 2021 ທະນາຄານ ນະໂຍບາຍ ສາຂາໄຊສົມບູນໄດ້ເປີດກອງປະຊຸມພິທີປະກາດຮັບຮອງ ໜ່ວຍກຳມະບານຮາກຖານ ແລະ ການບົ່ງຕົວແຕ່ງຕັ້ງຄະນະປະທານກຳມະບານຮາກຖານ ທີ່ສຳນັກງານສາຂາໄຊສົມບູນ ເຊິ່ງໃຫ້ກຽດເປັນປະທານຮ່ວມໂດຍ ສະຫາຍ ມະນີຄຸດ ສີຈັນທະວົງ ເລຂາໜ່ວຍພັກຮາກຖານ, ຫົວໜ້າ ທນບ ສາຂາໄຊສົມບູນ ແລະ ສະຫາຍ ນາງ ຄໍາຫຼ້າ ທອງສີນວນ ຮອງປະທານສະຫະພັນກຳມະບານ ແຂວງໄຊສົມບູນ ເຊິ່ງມີສະມາຊິກທັງໝົດເຂົ້າຮ່ວມຈໍານວນ 19 ທ່ານ.
ກອງປະຊຸມໄດ້ດຳເນີນຕາມວາລະທີ່ໄດ້ກຳນົດຢ່າງລາບລື່ນ ພິທີການໂດຍສະຫາຍ ພູວັນ ແສງສຸລິຈັນ ວ່າການຫົວໜ້າຂະແໜງສິນເຊື່ອ, ເນື້ອໃນກອງປະຊຸມດັ່ງກ່າວສະແດງອອກໃຫ້ເຫັນ ກ່ອນຈະມີພິທີປະກາດຮັບຮອງໂດຍຜ່ານການສະເໜີ, ຄົ້ນຄວ້າເຫັນດີເປັນເອກະພາບ ແລະ ມະຕິຕົກລົງຂອງຄະນະປະຈໍາພັກແຂວງໄຊສົມບູນ, ທະນາຄານນະໂຍບາຍ ສາຂາໄຊສົມບູນ ມີພະນັກງານທັງໝົດ 20 ທ່ານ, ຍິງ 6 ທ່ານ ແລະ ໄດ້ເຂົ້າເປັນສະມາຊິກກຳມະບານທັງໝົດ 20 ສະຫາຍ ດັ່ງນັ້ນເພື່ອໃຫ້ສະມາຊິກກຳມະບານພາຍໃນສາຂາໄດ້ເຄື່ອນໄຫວວຽກງານກຳມະບານຢ່າງຄ່ອງຕົວ ຈິ່ງໄດ້ປະກາດຫນ່ວຍກຳມະບານຮາກຖານຂຶ້ນ.
ສະຫາຍ ມະນີຄຸດ ສີຈັນທະວົງ ເລຂາໜ່ວຍພັກຮາກຖານ, ຫົວໜ້າ ທນບ ສາຂາໄຊສົມບູນ ໄດ້ຜ່ານຂໍ້ຕົກລົງ ວ່າດ້ວຍ ການຮັບຮອງກຳມະບານຮາກຖານຢູ່ທະນາຄານນະໂຍບາຍ ສາຂາໄຊສົມບູນ ຕາມເອກະ ສານເລກທີ 053/ກບຂ, ລົງວັນທີ 16 ກຸມພາ 2021 ແລະ ຂໍ້ຕົກລົງ ວ່າດ້ວຍການບົ່ງຕົວແຕ່ງຕັ້ງປະທານ, ຮອງປະທານກໍາມະບານຮາກຖານ ຂອງ ທນບ ສາຂາໄຊສົມບູນ ເອກະສານເລກທີ 054/ກບຂ, ລົງວັນທີ 16 ກຸມພາ 2021 ເຊັນ ແລະ ປະທັບຕາໂດຍສະຫາຍ ເນັ່ງຢ່າງ ໃຈຫວັງໝັ້ນ ປະທານສະຫະພັນກຳມະບານແຂວງໄຊສົມບູນ;
ຈາກການບົ່ງຕົວແຕ່ງຕັ້ງໃນຂໍ້ຕົກລົງດັ່ງກ່າວມີ ສະຫາຍ ຕ້ອມພັນທະວົງ ເຄືອມີໄຊ ຮອງເລຂາໜ່ວຍພັກຮາກຖານ, ຮອງຫົວໜ້າ ທນບ ສາຂາໄຊສົມບູນ ເປັນປະທານ, ສະຫາຍ ພູວັນ ແສງສຸລິຈັນ ວ່າການຫົວໜ້າຂະແໜງສິນເຊື່ອ ເປັນຮອງປະທານ ແລະ ສະຫາຍ ນາງ ຄໍາຟອງມົວ ເຈີຈ່າມົວ ພະນັກງານວິຊາການ ເປັນຮອງປະທານ ກໍາມະບານຮາກຖານ ທນບ ສາຂາໄຊສົມບູນ ຕໍ່ມາສະຫາຍ ນາງ ຄໍາຫຼ້າ ທອງສີນວນ ຮອງປະທານສະຫະພັນກຳມະບານ ແຂວງໄຊສົມບູນ ໄດ້ໃຫ້ຄວາມເຫັນໂອ້ລົມຕໍ່ພິທີປະກາດຮັບຮອງດັ່ງກ່າວ ເຫັນວ່າມີຄວາມໝາຍ- ຄວາມສຳຄັນ ຕໍ່ການຈັດຕັ້ງຜັນຂະຫຍາຍເນື້ອໃນກອງປະຊຸມໃຫຍ່ ຜູແທນສະຫະພັນກຳມະບານລາວທົ່ວປະເທດ ຄັ້ງທີ VIII ເວົ້າລວມ; ເວົ້າສະເພາະ ກໍ່ແມ່ນໄລຍະຈັດຕັ້ງຜັນຂະຫຍາຍເນື້ອໃນກອງປະຊຸມໃຫຍ່ ຂອງສະຫະພັນກຳມະບານແຂວງໄຊສົມບູນໃຫ້ປະກົດຜົນເປັນຈິງແລະມີຜົນສຳເລັດຕາມລະດັບຄາດໝາຍທີ່ໄດ້ກຳນົດໄວ້.
ໃນຕອນທ້າຍຂອງວາລະກອງປະຊຸມ ສະຫາຍ ຕ້ອມພັນທະວົງ ເຄືອມີໄຊ ຮອງເລຂາໜ່ວຍພັກຮາກຖານ, ຮອງຫົວໜ້າ, ປະທານກໍາມະບານຮາກຖານ ທນບ ສາຂາໄຊສົມບູນ ຕາງໜ້າໃຫ້ຄະນະກຳມະບານຮາກຖານ ຂຶ້ນຮັບຄວາມເຫັນໂອ້ລົມຂອງ ສະຫາຍ ນາງ ຄໍາຫຼ້າ ທອງສີນວນ ຮອງປະທານສະຫະພັນກຳມະບານ ແຂວງໄຊສົມບູນ ພ້ອມໃຫ້ຄໍາໝັ້ນສັນຍາວ່າ: 1. ຈະສືບຕໍ່ສຶກສາອົບຮົມວຽກງານການເມືອງ-ແນວຄິດ; 2. ເອົາໃຈໃສ່ປະຕິບັດຕໍ່ພາລະບົດບາດ, ສິດ ແລະ ນ້າທີ່; 3. ປັບປຸງແບບແຜນວິທີເຮັດວຽກ; 4. ເອົາໃຈໃສ່ສ້າງຄວາມສາມັກຄີພາຍໃນ, ພາຍນອກ; 5. ສ້າງແຜນການກຳມະບານ 5 ເປັນເຈົ້າ ເປັນແຕ່ລະໄລຍະ; 6. ຊຸກຍູ້ເຂົ້າວຽກງານກອງທຶນກຳມະບານ ແລະ 7. ປະຕິບັດລະບຽບ ແລະ ກົດໝາຍ ຂອງສະຫະພັນກຳມະບານລາວວາງອອກເປັນໄລຍະ; ແລະ ສຸດທ້າຍກໍ່ໄດ້ສະແດງຄວາມຍິນດີ, ຂອບໃຈ ແລະ ອວຍພອນມາຍັງ ສະຫາຍ ມະນີຄຸດ ສີຈັນທະວົງ ເລຂາໜ່ວຍພັກຮາກຖານ ທນບ ສາຂາໄຊສົມບູນ, ນາງ ຄໍາຫຼ້າ ທອງສີນວນ ຮອງປະທານສະຫະພັນກຳມະບານ ແຂວງໄຊສົມບູນ ແລະ ບັນດາສະຫາຍສະມາຊິກກຳມະບານທັງໝົດ ຈົ່ງມີສຸຂະພາບແຂງແຮງ, ມີຄວາມສຸກ ແລະ ມີຜົນສຳເລັດໃນໜ້າທີ່ວຽກງານທຸກປະການ. ກອງປະຊຸມໄດ້ປິດລົງ ເວລາ 16:00 ຂອງວັນດຽວກັນ.
ຂຽນຂ່າວ ແລະ ຖ່າຍພາບໂດຍ: ວິລະຫັດ ສົມມະລີ.
