ຕອນເຊົ້າວັນທີ 17 ມິນາ 2021 ທະນາຄານນະໂຍບາຍ ສາຂາຫຼວງນ້ຳທາ ໄດ້ເປີດກອງປະຊຸມສະຫຼຸບການເຄື່ອນໄຫວວຽກງານສິນເຊື່ອປະຈຳປີ 2020 ແລະ ທິດທາງແຜນການປະຈຳປີ 2021 ສະເພາະແຂວງຫຼວງນ້ຳທາ ຢູ່ທີ່ຫ້ອງປະຊຸມຊັ້ນ III ໂດຍພາຍໃຕ້ການເປັນປະທານຂອງ ທ່ານ ຄຳຟອງ ອິນມານີ ຮອງເລຂາພັກແຂວງ ປະທານຄະນະກຳມະການສິນເຊື່ອ ປະຈຳແຂວງຫຼວງນ້ຳທາ ເປັນກຽດເຂົ້າຮ່ວມໂດຍມີ ທ່ານ ໂພຕະມີ ພຸດທະວົງ ຫົວໜ້າທະນາຄານແຫ່ງ ສປປ ລາວ ສາຂາພາກເໜືອ ແຂວງອຸດົມໄຊ, ມີຄະນະກຳມະການຄຸ້ມຄອງສິນເຊື່ອຂັ້ນແຂວງ, ຂັ້ນເມືອງ, ຄະນະສາຂາ ແລະ ພະນັກງານຂະແໜງສິນເຊື່ອ ເຂົ້າຮ່ວມທັງໝົດ 17 ທ່ານ, ຍິງ 01 ທ່ານ.
ກອງປະຊຸມ ທ່ານສີຟອງ ແກ້ວກົງຕາ ຮັກສາການຫົວໜ້າທະນາຄານນະໂຍບາຍ ສາຂາຫຼວງນ້ຳທາ ໄດ້ນຳສະເໜີຜ່ານບົດສະຫຼຸບການເຄື່ອນໄຫວຈັດຕັ້ງປະຕິບັດວຽກງານສິນເຊື່ອປະຈຳປີ 2020 ແລະ ທິດທາງແຜນການປີ 2021 ເຊິ່ງຍົກໃຫ້ເຫັນຜົນງານພົ້ນເດັ່ນ ດ້ານການພົວພັນປະສານງານເຮັດວຽກຮ່ວມກັບອຳນາດການປົກຄອງຂັ້ນບ້ານ, ຂັ້ນເມືອງ ແລະ ຂັ້ນແຂວງ, ດຳເນີນການປ່ອຍສິນເຊື່ອໃນຂົງເຂດຈຸດສຸມ ເມືອງເປົ້າໝາຍ, ຂົງເຂດຈຸດສຸມລັດຖະບານ-ທ້ອງຖິນ ແລະ ຂົງເຂດຈຸດສຸມ ສາມສ້າງ ຂອງ 05 ເມືອງ ທີ່ນອນຢູ່ໃນແຂວງຫຼວງນໍ້າທາ ເຊີງກວມເອົາ 48 ບ້ານ, ບ້ານທຸກ 25 ບ້ານ, 89 ກຸ່ມ, 482 ຄອບຄົວ, ຄອບຄົວທຸກ 90 ຄອບຄົວ, ເພື່ອນຳໃຊ້ເຂົ້າໃນເປົ້າໝາຍການຜະລິດຂອງປະຊາຊົນຈຳນວນທັງໝົດ 13,76ຕື້ກີບ. ຮອດທ້າຍປີ 2020 ມີຍອດສິນເຊື່ອທັງໝົດ 88,73 ຕື້ກີບ, ເຮັດໃຫ້ປະຊາຊົນຜູ້ທີ່ໄດ້ຮັບສິນເຊື່ອຈາກ ທນບ ສາມາດທຳການຜະລິດສະບຽງອາຫານຊົມໃຊ້ເອງ, ວັດຖຸດິບ ຫຼື ເປັນສິນຄ້າຂາຍ ໃນທ້ອງຕະຫລາດທົ່ວໄປ ແລະ ສົ່ງອອກ ເຮັດໃຫ້ມີລາຍຮັບ ແລະ ຍົກລະດັບຊີວິດການເປັນຢູ່ຂອງຄອບຄົວດີຂື້ນ. ນອກນັ້ນຍັງຊີ້ໃຫ້ເຫັນຈຸດອ່ອນ ແລະ ຂໍ້ຄົງຄ້າງ, ບົດຮຽນທີ່ຖອດຖອນໄດ້ ແລະ ທິດທາງແກ້ໄຂໃນຕໍ່ໜ້າ ໂດຍສະເພາະການແກ້ໄຂໜີ້ NPL ແລະ ດອກເບ້ຍຄ້າງຮັບທີ່ຍັງມີທ່າອ່ຽງເພີ້ມຂື້ນເປັນຈຳນວນຫຼາຍ.
ກອງປະຊຸມ ທ່ານໄພວັນ ໄຊຍະວົງ ຮອງຫົວໜ້າທະນາຄານນະໂຍບາຍ ສາຂາຫຼວງນ້ຳທາ ໄດ້ຜ່ານແຜນການສິນເຊື່ອປະຈຳປີ 2021 ທົ່ວແຂວງຫຼວງນໍ້າທາ ມີແຜນຈຳນວນທັງໝົດ 17,15 ຕື້ກີບ ປະກອບມີທືນໄລຍະສັ້ນ 500 ລ້ານກີບ, ໄລຍະກາງ 11,045 ຕື້ກີບ ແລະ ໄລຍະຍາວ 5,605 ຕື້ກີບ ທີ່ຈະປ່ອຍສິນເຊື່ອໃນຂົງເຂດຈຸດສຸມເມືອງເປົ້າໝາຍ,ຂົງເຂດຈຸດສຸມລັດຖະບານ-ທ້ອງຖິ່ນ ແລະ ຂົງເຂດຈຸດສຸມສາມສ້າງ ຂອງ 05 ເມືອງ ທີ່ນອນຢູ່ໃນແຂວງຫຼວງນໍ້າທາ.
ກອງປະຊຸມໄດ້ຮັບຟັງການປະກອບຄຳຄິດຄຳເຫັນຂອງບັນດາທ່ານຜູ້ເຂົ້າຮ່ວມກອງປະຊຸມ ການເກັບກູ້ໜິ້ສິນຄືນປະຕິບັດໄດ້ຕາມແຜນການ ໂດຍຖືເອົາຄຸນນະພາບເປັນຕົ້ນຕໍ, ໜີ້ NPL ມີທ່າອ່ຽງຫຼຸດລົງການສະໜອງສິນເຊື່ອມີປະສິດທິຜົນສິນເຊື່ອແທ້ ແລະໄດ້ເຂົ້າເຖີງປະຊາຊົນບັນດາເຜົ່າ ໃນເມືອງທຸກຍາກ, ຈຸດສຸມ ແລະສາມສ້າງ. ກອງປະຊຸມໄດ້ເຫັນດີເປັນເອກະພາບຮັບຮອງ ເອົາບົດສະຫຼຸບການເຄື່ອນໄຫວວຽກງານສິນເຊື່ອປະຈຳປີ 2020 ແລະ ຮັບຮອງເອົາແຜນສິນເຊື່ອປະຈຳປີ 2021 ທົ່ວແຂວງຫຼວງນໍ້າທາ.
ຕອນທ້າຍກອງປະຊຸມ ທ່ານ ປະທານກອງປະຊຸມ ຍັງໄດ້ໃຫ້ກຽດໂອ້ລົມຕໍ່ກອງປະຊຸມ ເຊີ່ງທ່ານໄດ້ສະແດງຄວາມຍ້ອງຍໍຊົມເຊີຍຕໍ່ກັບຜົນງານທີ່ຍາດມາໄດ້ ພ້ອມນັ້ນຍັງໃຫ້ທິດຊີ້ນຳເນື້ອໃນບາງດ້ານຄື: ໃຫ້ຄະນະກຳມະການ ແຕ່ລະຂັ້ນຊ່ວຍສືບຕໍ່ປຸກລະດົມປະຊາຊົນຊ່ວຍ ທນບ ເພື່ອນຳໃຊ້ເງິນກູ້ໃຫ້ຖືກຕາມເປົ້າໝາຍຖືກຕາມລະບຽບ, ຖືກຕາມສັນຍາເງິນກູ້, ສາມາດນຳສົ່ງເງິນກູ້ຕົ້ນທຶນ ແລະ ດອກເບ້ຍພາຍຫຼັງຂາຍຜົນຜະລິດສົ່ງຄືນໃຫ້ ທນບ. ໃຫ້ຄະນະກຳມະການຄຸ້ມຄອງສິນເຊື່ອຂັ້ນແຂວງ, ຂັ້ນເມືອງສືບຕໍ່ເອົາໃຈໃສ່ສະໜັບສະໜຸນທາງດ້ານຝຶກອົບຮົມເຕັກນິກ, ໃຫ້ຂໍ້ມູນທາງດ້ານການຕະຫຼາດຊອກຫາຕະຫຼາດ, ການລົງຊຸກຍູ້ຕິດຕາມຕະຫຼອດຮອດການປ້ອງກັນຄວາມສ່ຽງດ້ານຕ່າງໆທີ່ຈະເຮັດໃຫ້ເກັບກູ້ທຶນຄືນບໍ່ໄດ້, ກາຍເປັນໜີ້ສິນບໍ່ເກີດດອກອອກຜົນ ຫຼືໜີ້ NPL. ສະເພາະໜີ້ທີ່ໄດ້ຮັບຜົນກະທົບຈາກໂລກລະບາດ, ໄພແຫ້ງແລ້ງ, ສັດຕູພືດທຳລາຍ ໃຫ້ສະເໜີໃຫ້ຂັ້ນເທິງ ທະນາຄານນະໂຍບາຍ ພິຈາລະນາແກ້ໄຂ. ກອງປະຊຸມໄດ້ດຳເນີນໄປເປັນເວລາ 01 ຕອນ ແລະໄດ້ປິດລົງໃນເວລາ 12:00 ໂມງຂອງວັນດຽວກັນ.
