ຕອນເຊົ້າຂອງວັນທີ 03 ສິງຫາ 2023 ເວລາ 8 ໂມງ 30 ນາທີ ທີ່ ຫ້ອງປະຊຸມ ຊັ້ນ III ຂອງທະນາຄານນະໂຍບາຍ ສາຂາຫຼວງນ້ຳທາ ໄດ້ເປີດກອງປະຊຸມ ຝຶກອົບຮົມການນຳໃຊ້ໂປຣແກຼມ CIB online ຂອງບໍລິສັດຂໍ້ມູນຂ່າວສານສິນເຊື່ອທະນາຄານແຫ່ງ ສປປ ລາວ ພາຍໄດ້ການເປັນປະທານ ຂອງທ່ານ ວຽງທອງ ໄຊວົງສາ ຫົວໜ້າພະແນກສິນເຊື່ອ ພ້ອມດ້ວຍທີມງານນັກວິຍາກອນຈາກສຳນັກງານໃຫຍ່, ຫົວໜ້າສາຂາ, ຮອງຂະແໜງສິນເຊື່ອ, ຮອງຂະແໜງບັນຊີ-ໄອທີ ແລະ ພະນັກງານວິຊາການຂະແໜງສິນເຊື່ອ, ພະນັກງານວິຊາການຂະແໜງບັນຊີ-ໄອທີ ເຂົ້າຮ່ວມທັງໜົດ 10 ທ່ານ, ຍິງ 2 ທ່ານ.
ກອງປະຊຸມໄດ້ຮັບຟັງ ທ່ານ ວຽງທອງ ໄຊວົງສາ ໄດ້ຊີ້ນຳບັນຫາຂໍ້ຄົງຄ້າງ ແລະ ບັນຫາອຸດຕັນ ໃນການຂະຫຍາຍສິນເຊື່ອ ໃນໄລຍະໃໝ່ ແລະ ການຈັດຕັ້ງປະຕິບັດວຽກງານຂໍ້ມູນຂ່າວສານສິນເຊື່ອ ໃຫ້ກັບສາຂາ ຫຼັງຈາກນັ້ນ ຫົວໜ້າສາຂາ, ຄະນະຂະແໜງ ແລະ ວິຊາການສິນເຊື່ອ ໄດ້ປະກອບຄຳຄິດຄຳເຫັນ ຍົກໃຫ້ເຫັນດ້ານດີ, ຜົນສຳເລັດ, ຂໍ້ຄົງຄ້າງ, ທິດທາງແຜນການ ແລະ ວິທີທາງແກ້ໄຂໃນຕໍ່ໜ້າ.
ຫຼັງຈາກນັ້ນນັກວິທະຍາກອນໄດ້ແນະນຳວິທີການເຂົ້າໂປຣແກຼມ CIB online ຂອງ ທຫລ ເພື່ອຄົ້ນຫາຂໍ້ມູນລູກຄ້າ ຂອງ ທນບ ມີ 3 ຫົວຂໍ້ຄື:
- ການເຂົ້າລະບົບ CIB online
- ການຄົ້ນຫາຂໍ້ມູນສິນເຊື່ອ CIB online
- ການສອບຖາມຂໍ້ມູນ ເພື່ອແມັດຂໍ້ມູນ
ຈຸດປະສົງເນື້ອໃນການຝຶກອົມຮົມໃນຄັ້ງນີ້ ເຮັດໃຫ້ນັກສຳມະນາກອນໄດ້ເຂົ້າໃຈໃນການນຳໃຊ້ ລະບົບ CIB online ຢ່າງເລິກເຊີ່ງ ໂດຍສະແດງອອກຄື ພະນັກງານສີນເຊື່ອຜູ້ຮັບຜິດຊອບວຽກງານນີ້ສາມາດຄົ້ນຫາ ແລະ ກວດກາຂໍ້ມູນ CIB online ດ້ວຍຕົນເອງ ໂດຍບໍ່ຕ້ອງສະເໜີຜ່ານສຳນັກງານໃຫຍ່.
ດັ່ງນັ້ນ, ກອງປະຊຸມໄດ້ປິດລົງໃນ ເວລາ 16:30 ນາທີ ຂອງວັນທີ 03 ສິງຫາ 2023.
ສາຂາຫຼວງນ້ຳທາ,ວັນທີ 9 ສີງຫາ 2023
