ໃນລະຫວ່າງວັນທີ 12-14 ກຸມພາ 2024 ທີ່ ຫ້ອງປະຊຸມ ສະຖາບັນການທະນາຄານ, ນະຄອນຫຼວງວຽງຈັນ. ທະນາຄານນະໂຍບາຍ (ທນບ) ໄດ້ຈັດ ກອງປະຊຸມ ສະຫຼຸບການເຄື່ອນໄຫວວຽກງານ ຂອງທະນາຄານນະໂຍບາຍ ປະຈຳປີ 2023 ແລະ ກຳນົດທິດທາງແຜນການ ປະຈຳປີ 2024 ຂຶ້ນ ໂດຍການເປັນປະທານ ຂອງ ທ່ານ ວິສອນ ໄຊສົງຄາມ ຜູ້ອຳນວຍການ ທນບ ແລະ ໃຫ້ກຽດເປັນຢ່າງສູງໃນການເຂົ້າຮ່ວມມີຄຳເຫັນໂອ້ລົມໃນກອງປະຊຸມ ຄັ້ງນີ້ ຂອງ ທ່ານ ບຸນເຫຼືອ ສິນໄຊວໍຣະວົງ ຜູ້ວ່າການ ທະນາຄານແຫ່ງ ສປປ.ລາວ ປະທານສະພາບໍລິຫານ ທນບ, ນອກຈາກນີ້ກໍ່ຍັງມີບັນດາ ທ່ານຄະນະອຳນວຍການ, ຄະນະພະແນກ- ທ້ຽບເທົ່າ, ຄະນະສາຂາ, ຄະນະຂະແໜງກ່ຽວຂ້ອງ ຂອງ ສາຂາ ແລະ ສຳນັກງານໃຫຍ່ ເຂົ້າຮ່ວມທັງໝົດ 90 ກວ່າຄົນ
ກອງປະຊຸມຄັ້ງນີ້ ໄດ້ພ້ອມກັນ: ຄົ້ນຄວ້າ ຕີລາຄາ ເຖິງ ຜົນສຳເລັດໃນການເຄື່ອນໄຫວວຽກງານ ຂອງ ທະນາຄານນະໂຍບາຍ ໃນປີຜ່ານມາ ແລະ ຄົ້ນຄວ້າກຳນົດ ທິດທາງ – ແຜນການ ປະຈຳປີ 2024 ເປັນຕົ້ນແມ່ນ ແຜນການສະໜອງສິນເຊື່ອ ແຜນການດຳເນີນ ທຸລະກິດ ແລະ ແຜນການກະກຽມຄວາມພ້ອມຮອບດ້ານໃນການຫັນເປັນ ທະນາຄານພັດທະນາຊົນນະບົດ ( ທພບ ) ແລະ ຮັບຟັງການລາຍງານ ການຈັດຕັ້ງປະຕິບັດວຽກງານ ໃຫ້ບໍລິການ, ການສະໜອງສິນເຊື່ອ ແລະ ກໍ່ໄດ້ ຜ່ານຂໍ້ຕົກລົງ ວ່າດ້ວຍ ການປະເມີນຈັດປະເພດການຈັດຕັ້ງປະຕິບັດວຽກງານ ດີເດັ່ນຂອງ ບັນດາສາຂາ, ຫ້ອງການປະສານງານ ແລະ ໜ່ວຍບໍລິການປະຈຳປີ 2023.
ເນື່ອງໃນໂອ້ກາດທີ່ມີຄວາມໝາຍ ຄວາມສຳຄັນນີ້ ທ່ານຜູ້ວ່າການ ທະນາຄານແຫ່ງ ສປປ.ລາວ ປະທານສະພາບໍລິຫານ ທນບ ໄດ້ໃຫ້ກຽດໂອ້ລົມ ເພື່ອເປັນທິດຊີນຳ ໃນການສືບຕໍ່ວຽກງານໃນຕໍ່ໜ້າ ໂດຍຕີລາຄາສູງ ຕໍ່ຜົນສຳເລັດ ໃນການຊີ້ນຳ – ນຳພາ ຂອງ ບັນດາທ່ານ ຄະນະອຳນວຍການ ແລະ ຄະນະບໍລິຫານງານ ທນບ ທັງໝົດ ໃນການຈັດຕັ້ງປະຕິບັດວຽກງານໃນປີຜ່ານມາ ຈຶ່ງສາມາດສູ້ຊົນຜ່ານຜ່າ ແລະ ຍາດໄດ້ຜົນສໍາເລັດທີ່ພົ້ນເດັ່ນ ຫຼາຍດ້ານພໍສົມຄວນ ເຊີ່ງໂດຍລວມເຫັນວ່າມີຫຼາຍຕົວຊີ້ວັດມີທ່າອຽງດີຂຶ້ນ ແລະ ທ່ານ ຍັງໄດ້ເນັ້ນໜັກໃຫ້ເອົາໃຈໃສ່ ບາງບັນຫາທີ່ສຳຄັນດັ່ງນີ້: 1 ເອົາໃຈໃສ່ສຶກສາອົບຮົມການເມືອງ-ແນວຄິດໃຫ້ແກ່ຖັນແຖວສະມາຊິກພັກ-ພະນັກງານໃຫ້ເປັນປົກກະຕິ ແລະ ເລິກເຊິ່ງເຖິງຖອງກວ່າເກົ່າ ເພື່ອເຮັດໃຫ້ເຂົາເຈົ້າມີການຫັນປ່ຽນທີ່ຕັ້ງໜ້າດີຂຶ້ນ; 2 ປັບປຸງແບບແຜນການນຳພາ ແລະ ວິທີເຮັດວຽກ ຂອງ ຄະນະນຳແຕ່ລະຂັ້ນ ນັບແຕ່ສຳນັກງານໃຫຍ່ ຈົນເຖິງຂັ້ນທ້ອງຖິ່ນ-ຮາກຖານ; 3 ເອົາໃຈໃສ່ວຽກງານຈັດຕັ້ງ-ພະນັກງານ ໃຫ້ມີການສັບປ່ຽນໝູນວຽນ ມີການຕິດຕາມການຈັດຕັ້ງປະຕິບັດວຽກງານ ໃຫ້ເປັນປົກກະຕິ; 4 ເອົາໃຈໃສ່ໃຫ້ຄວາມສຳຄັນວຽກງານກວດກາ, ພະນັກງານກວດກາ ຕ້ອງມີຄວາມຮູ້-ຄວາມສາມາດ, ມີຄຸນສົມບັດ ສິນທຳປະຕິວັດ, ທ່ຽງທຳ, ຮູ້ ແລະ ເຂົ້າໃຈຢ່າງເລິກເຊິ່ງຕໍ່ລະບຽບ, ກົດໝາຍ ເພື່ອເຮັດໃຫ້ວຽກງານກວດກາໄດ້ຮັບປະສິດທິຜົນ; 5 ເອົາໃຈໃສ່ວຽກງານວິຊາສະເພາະ ເປັນຕົ້ນແມ່ນ : ການອຳນວຍຄວາມສະດວກໃຫ້ ປະຊາຊົນໄດ້ເຂົ້າເຖິງການບໍລິການທາງດ້ານການເງິນ, ການສະໜອງສິນເຊື່ອຕາມແນວທາງນະໂຍບາຍ ຂອງ ພັກ – ລັດຖະບານ ໃນໄລຍະໃໝ່ ຕິດພັນກັບການຫັນເປັນ ທະນາຄານພັດທະນາຊົນນະບົດ ໃຫ້ຮັບປະກັນຄຸນນະພາບ, ມີປະສິດທິຜົນ ບົນພື້ນຖານໃຫ້ມີການໄລ່ລຽງ ຄຽງຄູ່ກັບການສົ່ງເສີມພັດທະນາຊົນນະບົດ ແລະ ແກ້ໄຂຄວາມທຸກຍາກໃຫ້ຫຼຸດລົງຢ່າງເປັນຮູບປະທໍາ, ເອົາໃຈໃສ່ການຄຸ້ມຄອງບໍລິຫານລາຍຮັບ-ລາຍຈ່າຍ ພ້ອມກັນປະຢັດມັດທະຢັດ, ຫຼີກລ້ຽງລາຍຈ່າຍ ທີ່ເປັນອັນຟຸ້ມເຟືອຍ; 6 ເພີ່ມທະວີ ການລົງໃກ້ສິດຕິດແທດກັບທ້ອງຖິ່ນຮາກຖານ ໂດຍສົມທົບ ອຳນາດການປົກຄອງທ້ອງຖິ່ນ ໃຫ້ເຂົ້າໃຈຢ່າງເລິກເຊີ່ງ ຕໍ່ພາລະບົດບາດໃນໄລຍະໃຫມ່ ຂອງ ທພບ; 7 ຕ້ອງເພີ່ມທະວີ ການໂຄສະນາ, ປະຊາສຳພັນ ແລະ ອໍານວຍຄວາມສະດວກ ໃຫ້ ປະຊາຊົນ ຢູ່ ເຂດຊົນນະບົດ, ສາມາດເຂົ້າເຖິງການບໍລິການ.
ໃນຕອນທ້າຍ ຂອງກອງປະຊຸມ ທ່ານຜູ້ອຳນວຍການ ທນບ ໃດ້ຕ່າງໜ້າໃຫ້ ຄະນະອຳນວຍການ ແລະ ຄະນະບໍລິຫານງານ ທນບ ຂຶ້ນກ່າວຮັບຄຳໂອ້ລົມ ຊຶ່ງຈະໄດ້ນຳເອົາທິດຊີ້ນຳ ໄປຜັນຂະຫຍາຍ ແລະ ຈັດຕັ້ງປະຕິບັດເຂົ້າໃນໜ້າທີ່ວຽກງານໃຫ້ມີຜົນສຳເລັດຍິ່ງໆຂຶ້ນໄປ.
ກອງປະຊຸມ ສະຫຼຸບການເຄື່ອນໄຫວວຽກງານ ຂອງທະນາຄານນະໂຍບາຍ ປະຈຳປີ 2023 ແລະ ກຳນົດທິດທາງແຜນການ ປະຈຳປີ 2024 ໄດ້ດຳເນີນເປັນເວລາ 3 ວັນ ດ້ວຍບັນຍາກາດທີ່ຟົດຟື້ນ ແລະ ອຸດົມສົມບູນໄປດ້ວຍເນື້ອໃນ ຊຶ່ງໄດ້ສຳເລັດຕາມຈຸດປະສົງ ແລະ ລະດັບຄາດໝາຍ.
