ໃນຕອນບ່າຍຂອງວັນທີ 08/02/2022 ເວລາ 13 ໂມງ 30 ນາທີ ທີ່ຫ້ອງປະຊຸມໃຫຍ່ຊັ້ນ III ຂອງທະນາຄານນະໂຍບາຍ ສາຂາສະຫວັນນະເຂດ ໄດ້ເປີດກອງປະຊຸມ ສະຫຼຸບການຈັດຕັ້ງປະຕິບັດວຽກງານສິນເຊື່ອ ປະຈຳປີ 2021 ແລະ ຮັບຮອງແຜນສິນເຊື່ອ ຂັ້ນແຂວງ ປະຈຳປີ 2022 ຂຶ້ນ ເຊິ່ງໃຫ້ກຽດເປັນປະທານໂດຍ ທ່ານ ວຽງທະວີສອນ ເທບພະຈັນ ກຳມະການສຳຮອງສູນກາງພັກ, ຄະນະປະຈຳພັກແຂວງ, ຮອງເຈົ້າແຂວງໆ ສະຫວັນນະເຂດ, ທັງເປັນປະທານຄະນະກຳມະການຄຸ້ມຄອງສິນເຊື່ອຂັ້ນແຂວງສະຫວັນນະເຂດ. ມີ ທ່ານ ວົງພະຈັນ ແສງສຸວັນ ເລຂາຄະນະພັກຮາກຖານ ທະນາຄານ ແຂວງສະຫວັນນະເຂດ, ຫົວໜ້າ ທະນາຄານ ແຫ່ງ ສປປລາວ ປະຈຳແຂວງສະຫວັນນະເຂດ, ບັນດາຄະນະກຳມະການຄຸ້ມຄອງສິນເຊື່ອຂັ້ນແຂວງ-ຂັ້ນເມືອງ, ທ່ານ ທິບພະກອນ ສູນດາລາ ຄະນະພັກຮາກຖານ ທະນາຄານ ແຂວງສະຫວັນນະເຂດ, ເລຂາໜ່ວຍພັກ, ຫົວໜ້າ ທະນາຄານນະໂຍບາຍ ສາຂາສະຫວັນນະເຂດ ພ້ອມຄະນະ, ຫົວໜ້າຂະແໜງການ ແລະ ຫົວໜ້າໜ່ວຍບໍລິການ ທະນາຄານນະໂຍບາຍ ພາຍໃນແຂວງສະຫວັນນະເຂດກໍ່ເປັນກຽດເຂົ້າຮ່ວມ.
ໃນກອງປະຊຸມ ທ່ານ ທິບພະກອນ ສູນດາລາ ກໍ່ໄດ້ຂຶ້ນກ່າວລາຍງານສະຫຼຸບການຈັດຕັ້ງປະຕິບັດວຽກງານສິນເຊື່ອປະຈຳປີ 2021 ເຊິ່ງທ່ານກໍ່ໄດ້ຍົກໃຫ້ເຫັນຜົນສຳເລັດ, ຂໍ້ສະດວກແລະຂໍ້ຫຍຸ້ງຍາກ ໃນການເຄື່ອນໄຫວປີຜ່ານທົ່ວສາຂາສະຫວັນນະເຂດ (ແຂວງສະຫວັນະເຂດແລະຄໍາມ່ວນ) ໄດ້ສະໜອງສິນເຊື່ອໃຫ້ປະຊາຊົນຈຳນວນ 59,205 ຕື້ກີບ ເທົ່າກັບ 106,19%ຂອງແຜນການປີ, ເກັບຕົ້ນທຶນຄືນຈຳນວນ 27,033 ຕື້ກີບ ເທົ່າກັບ 77,05% ຂອງແຜນການ ( ໃນນີ້ເກັບຕົ້ນທຶນ PL ຈຳນວນ 10,979 ຕື້ກີບເທົ່າກັບ 65,87% ຂອງແຜນການ ແລະ NPL ຈຳນວນ 16,669 ຕື້ກີບເທົ່າກັບ 87,10% ຂອງແຜນການ) ທ້າຍປີ 2021 ທົວສາຂາມີຍອດສິນເຊື່ອຈຳນວນ 316,34 ຕື້ກີບ (ສິນເຊື່ອເມືອງເປົ້າໝາຍຈຳນວນ 258,539 ຕຶ້ກີບ, ຈຸດສຸມທ້ອງຖິ່ນຈຳນວນ 14,977 ຕື້ກີບ, ບ້ານສາມສ້າງຈຳນວນ 36,445 ຕື້ກີບ ແລະ ສິນເຊື່ອນອກເມືອງເປົ້າໝາຍ 6,385 ຕື້ກີບ).
ສະເພາະແຂວງສະຫວັນນະເຂດ ທະນາຄານນະໂຍບາຍ ສາຂາສະຫວັນນະເຂດໄດ້ສະໜອງສິນເຊື່ອໃຫ້ປະຊາຊົນຈຳນວນ 42,590 ຕື້ກີບ ເທົ່າກັບ 104,21%ຂອງແຜນການປີ, ເກັບຕົ້ນທຶນຄືນຈຳນວນ 20,476 ຕື້ກີບ ເທົ່າກັບ 73,27% ຂອງແຜນການ ( ໃນນີ້ເກັບຕົ້ນທຶນ PL ຈຳນວນ 8,562 ຕື້ກີບເທົ່າກັບ 63,85% ຂອງແຜນການ ແລະ NPL ຈຳນວນ 11,914 ຕື້ກີບເທົ່າກັບ 81,96% ຂອງແຜນການ) ທ້າຍປີ 2021 ສະເພາະແຂວງສະຫວັນນະເຂດມີຍອດສິນເຊື່ອຈຳນວນ 246,405 ຕື້ກີບ (ສິນເຊື່ອເມືອງເປົ້າໝາຍຈຳນວນ 221,289 ຕຶ້ກີບ, ຈຸດສຸມທ້ອງຖິ່ນຈຳນວນ3,674 ຕື້ກີບ, ບ້ານສາມສ້າງຈຳນວນ 15,796 ຕື້ກີບ ແລະ ສິນເຊື່ອນອກເມືອງເປົ້າໝາຍ 5,645 ຕື້ກີບ). ໃນນີ້ມີ ເມືອງວິລະບູລີ, ທ່າປາງທອງ ແລະ ສຳນັກງານສາຂາ ທີ່ສາມາດເກັບໜີ້ໄດ້ຕາມແຜນການ.
ສຳລັບທິດທາງແຜນການວຽກງານສິນເຊື່ອ ປະຈຳປີ 2022 ໃນຕໍ່ໜ້າ ທະນາຄານນະໂຍບາຍ ສາຂາສະຫວັນນະເຂດ ມີແຜນການສະໜອງສິນເຊື່ອໃຫ້ປະຊາຊົນທົ່ວສາຂາຈຳນວນ 92,87 ຕື້ກີບ ສະເພາະແຂວງສະຫວັນນະເຂດຈຳນວນ 61,75 ຕື້ກີບ, ສູ້ຊົນເກັບໜີ້ຕາມແຜນທັງໝົດທົ່ວສາຂາ 60,93 ຕື້ກີບ ສະເພາະແຂວງສະຫວັນນະເຂດ 43,68 ຕື້ກີບ.
ໃນໂອກາດດຽວກັນນີ້ ທ່ານ ວຽງທະວີສອນ ເທບພະຈັນ ປະທານກອງປະຊຸມ ກໍ່ມີທິດຊີ້ນຳໃນການເຄື່ອນໄຫວວຽກງານໃນປີຕໍ່ໜ້າ ເພື່ອໃຫ້ແຜນການບັນລຸຕາມຄາດໝາຍ ເຊັ່ນ: ທະນາຄານນະໂຍບາຍ ຕ້ອງເອົາໃຈໃສ່ຢ່າງແຂງແຮງໃນດ້ານຂອດການໂຄສະນາ ເຜີຍແຜ່ລະບຽບນະໂຍບາຍການໃຫ້ສິນເຊືື່ອ ຕໍ່ອົງການປົກຄອງທ້ອງຖິ່ນໃຫ້ເຂົ້າໃຈຢ່າງຈະແຈ້ງ ຊັດເຈນ, ໃຫ້ຄະນະກໍາມະການຄຸ້ມຄອງສິນເຊື່ອແຕ່ລະຂັ້ນ ເອົາໃຈໃສ່ກໍານົດເປົ້າໝາຍ ໂຄງການ ທີ່ມີຄວາມແທດເໝາະໃຫ້ກັບປະຊາຊົນໃນແຕ່ຂົງເຂດຕາມທ່າແຮງ ແລະ ການຈັດຕັ້ງປະຕິບັດວຽກຂອງ ທະນາຄານນະໂຍບາຍ ໃຫ້ມີການລາຍງານຕໍ່ຄະນະກໍາມະການຂັ້ນແຂວງ ຢ່າງຕໍ່ເນື່ອງເປັນປົກກະຕິ ພ້ອມທັງເປີດກອງປະຊຸມສະຫຼຸບວຽກງານແຕ່ລະໄລຍະ ເພືອປຶກສາຫາລືຊອກຫາວິທີທາງແກ້ໄຂໃຫ້ທັນກັບສະພາບຕົວຈິງ. ກອງປະຊຸມດັ່ງກ່າວໃຊ້ເວລາ 1 ຄາບ ແລະ ກໍ່ປິດລົງດ້ວຍຄວາມຈົບງາມ.
ພາບ: ຂະແໜງສິນເຊື່ອ
ຂ່າວ: ໜັດຊະພົນ ພູທິສານນະລາດ
