ຕອນເຊົ້າ ເວລາ 8:30 ນາທີ ຂອງວັນທີ 3 ກຸມພາ 2022 ທະນາຄານນະໂຍບາຍ ສາຂາ ຫຼວງນ້ຳທາ ໄດ້ ຈັດພິທີປະກາດການຈັດຕັ້ງທະນາຄານນະໂຍບາຍ ສາຂາ ຫຼວງນ້ຳທາ ຢູ່ທີ່ຫ້ອງປະຊຸມໃຫຍ່ ຂອງທະນາຄານ ນະໂຍບາຍ ສາຂາ ຫຼວງນ້ຳທາ, ພາຍໃຕ້ການເປັນປະທານຂອງ ທ່ານ ສຸພົດ ໂຊກປະຫວັດ ຮອງຜູ້ອຳນວຍການ ທະນາຄານນະໂຍບາຍ, ມີຫົວໜ້າພະແນກບັນຊີ ສຳນັກງານໃຫຍ່, ຮອງຫົວໜ້າພະແນກຈັດຕັ້ງ ສຳນັກງານໃຫຍ່, ຫົວໜ້າສາຂາ, ຄະນະສາຂາ, ຫົວໜ້າໜ່ວຍບໍລິການ, ຫົວໜ້າຫ້ອງການປະສານງານ ແຂວງ ບໍ່ແກ້ວ, ຄະນະຂະແໜງ ແລະ ພະນັກງານວິຊາການ ສາຂາ ເຂົ້າຮ່ວມທັງໝົດ: 27 ທ່ານ, ຍິງ: 11 ທ່ານ.
ພິທີດັ່ງກ່າວໄດ້ຮັບຟັງ ທ່ານ ສີຟອງ ແກ້ວກົງຕາ ຮັກສາການຫົວໜ້າສາຂາ ຜ່ານບົດສະຫຼຸບການເຄື່ອນໄຫວວຽກງານຮອບດ້ານປະຈຳປີ 2021 ແລະ ທິດທາງແຜນການ ປີ 2022 ໂດຍຫຍໍ້ ເຊີ່ງຍົກໃຫ້ເຫັນວຽກງານດ້ານດີ, ດ້ານອ່ອນ ແລະ ຂໍ້ຄົງຄ້າງໃນການຈັດຕັ້ງປະຕິບັດວຽກງານໃນໄລຍະ 1 ປີ ຜ່ານມາ; ຈາກນັ້ນ, ທ່ານ ນ. ພີນທອນ ສຸລິຍະວົງ ຮອງຫົວໜ້າພະແນກຈັດຕັ້ງໄດ້ຜ່ານ ຂໍ້ຕົກລົງ: ວ່າດ້ວຍການແຕ່ງຕັ້ງພະນັກງານ. ເລກທີ 77/ທນບ, ລົງວັນທີ 24 ມັງກອນ 2022, ຜູ້ອຳນວຍການທະນາຄານນະໂຍບາຍ ຕົກລົງ ເຫັນດີແຕ່ງຕັ້ງ: ທ່ານ ສີຟອງ ແກ້ວກົງຕາ ເດີມເປັນຮັກສາການຫົວໜ້າ ທະນາຄານນະໂຍບາຍ ສາຂາຫຼວງນ້ຳທາ ເປັນຫົວໜ້າທະນາຄານນະໂຍບາຍ ສາຂາ ຫຼວງນ້ຳທາ ແລະ ທ່ານ ນ. ພີນທອນ ສຸລິຍະວົງ ຮອງຫົວໜ້າພະແນກຈັດຕັ້ງ-ພະນັກງານ ກໍ່ໄດ້ມີການແຈກຍາຍບັດທາບທ່າມ ຄວາມໄວວາງໃຈຕໍ່ຄະນະສາຂາ.
ພິທີດັງກ່າວຍັງໄດ້ຮັບຟັງ ທ່ານ ສຸພົດ ໂຊກປະຫວັດ ໃຫ້ຄຳໂອ້ລົມແກ່ພະນັກງານໃຫ້ທົບທວນຄືນພາລະບົດບາດ ສິດ ແລະ ໜ້າທີ່ຂອງທະນາຄານນະໂຍບາຍ ແລະ ໄດ້ເນັ້ນໜັກບາງຂໍ້ຕືມອີກຄື:
- ສຶກສາອົບຮົມການເມືອງ – ແນວຄິດໃຫ້ປົກກະຕິ.
- ປັບປຸງວິທີເຮັດວຽກ ແລະ ແບບແຜນວິທີການຊີ້ນຳ-ນຳພາ.
- ຍົກສູງຄວາມຮັບຜິດຊອບຕໍ່ໜ້າທີການງານ.
- ເອົາໃຈໃສ່ປັບປຸງວຽກງານກໍ່ສ້າງພັກ-ພະນັກງານ.
- ໃຫ້ມີຄວາມຮັບຜິດຊອບສູງຕໍ່ໜ້າທີການເມືອງກໍ່ຄື: ວຽກງານວິຊາສະເພາະທີຕົນເອງຮັບຜິດຊອບ.
- ວຽກງານກວດກາ.
ຕອນທ້າຍພິທີ ທ່ານ ສີຟອງ ແກ້ວກົງຕາ ຂື້ນຮັບຄຳໂອ້ວາດ ແລະ ປະຕິຍານຕົນຕໍ່ພິທີດັ່ງກ່າວ.
ພິທີໄດ້ປິດລົງຢ່າງເປັນທາງການໃນເວລາ: 11:30 ນາທີ ຂອງວັນດຽວກັນ.
ສາຂາ ຫຼວງນ້ຳທາ, ວັນທີ 8 ກຸມພາ 2022
