ຕອນແລງ ເວລາ 13:30 ນາທີ ຂອງວັນທີ 24 ເມສາ 2024 ທະນາຄານນະໂຍບາຍ ສາຂາ ຫຼວງນ້ຳທາ ໄດ້ເປີດພິທີ ຮັບ-ມອບ ໃບຍ້ອງຍໍຜົນງານ ຫ້ອງການປະສານງານ ແລະ ໜ່ວຍບໍລການ ປະຈຳປີ 2023 ຢູ່ທີ່ຫ້ອງປະຊຸມໃຫຍ່ ຂອງທະນາຄານ ນະໂຍບາຍ ສາຂາ ຫຼວງນ້ຳທາ, ພາຍໃຕ້ການເປັນປະທານຂອງ ທ່ານ ວິສອນ ໄຊສົງຄາມ ຜູ້ອຳນວຍການ ທະນາຄານນະໂຍບາຍ, ມີຮອງຫົວໜ້າພະແນກຈັດຕັ້ງພະນັກງານ, ຮອງຫົວໜ້າຂະແໜງຫ້ອງການບໍລິຫານ ສຳນັກງານໃຫຍ່, ຄະນະສາຂາ, ຫົວໜ້າໜ່ວຍບໍລິການ, ຫົວໜ້າຫ້ອງການປະສານງານ ແຂວງ ບໍ່ແກ້ວ, ຄະນະຂະແໜງ ແລະ ພະນັກງານວິຊາການ ສາຂາ ເຂົ້າຮ່ວມທັງໝົດ: 30 ທ່ານ, ຍິງ: 11 ທ່ານ.
ກອງປະຊຸມໄດ້ຮັບຟັງ ທ່ານ ລີ ວັນນະປະເສີດ ຫົວໜ້າ ທະນາຄານນະໂຍບາຍ ສາຂາ ຫຼວງນ້ຳທາ ຜ່ານບົດສະຫຼຸບ ຂອງການເຄື່ອນໄຫວວຽກງານຮອບດ້ານ ປະຈຳ 3 ເດືອນ ປີ 2024 ແລະ ວາງທິດທາງແຜນການ ໃນຕໍ່ໜ້າ ໂດຍຫຍໍ້ເຊີ່ງຍົກໃຫ້ເຫັນຜົນງານດ້ານດີ, ດ້ານອ່ອນ ແລະ ດ້ານຂໍ້ຄົງຄ້າງ.
ຫຼັງຈາກນັ້ນ, ທ່ານ ອຸລາ ທົນນະວົງສາ ຮອງຫົວໜ້າພະແນກຈັດຕັ້ງ-ພະນັກງານ ຍັງໄດ້ຜ່ານບົດຂໍ້ຕົກລົງ ບົດສະຫຼຸບຫຍໍ້ກ່ຽວກັບການຈັດຕັ້ງປະຕິບັດຍ້ອງຍໍ ສາຂາ ແລະ ໜ່ວຍບໍລິການ ທີ່ມີຜົນງານ ທົ່ວລະບົບປະຈຳປີ 2023 ແລະ ຜ່ານຂໍ້ຕົກລົງວ່າດ້ວຍການມອບໃບຍ້ອງຍໍ ຫ້ອງການປະສານງານ ແລະ ໜ່ວຍບໍລິການ ເຊີ່ງປະກອບມີລາຍລະອຽດຄື:
- ໜ່ວຍບໍລິການ ເມືອງ ວຽງພູຄາ ແມ່ນໄດ້ຮັບໃບຍ້ອງຍໍປະເພດທີ່ II ປະຈຳປີ 2023.
- ໜ່ວຍບໍລິການ ເມືອງ ລອງແມ່ນໄດ້ຮັບໃບຍ້ອງຍໍປະເພດທີ່ III ປະຈຳປີ 2023.
- ຫ້ອງການປະສານງານ ແຂວງ ບໍ່ແກ້ວ ແມ່ນໄດ້ຮັບໃບຍ້ອງຍໍປະເພດທີ່ III ປະຈຳປີ 2023 ແລະ ໃບຊົມເຊີຍ
ໃນການແກ້ໄຂໜີ້ຕາມແຈ້ງການເລກທີ 37.
ຕອນທ້າຍພິທີ ທ່ານ ວິສອນ ໄຊສົງຄາມ ຜູ້ອຳນວຍການ ທະນາຄານນະໂຍບາຍ ຍັງໃຫ້ກຽດໂອ້ລົມຕໍ່ພະນັກງານ ໂດຍການເນັ້ນໜັກທາງດ້ານການເມືຶອງແນວຄິດຂອງພະນັກງານ ແລະ ໃຫ້ເອົາໃຈໃສ່ຮັບຜິດຊອບໜ້າທີ່ການເມືອງທີ່ມອບໝາຍໃຫ້ໄດ້ຮັບຜົນຕາມເປົ້າໝາຍທີ່ວາງໄວ້.
ພິທີໄດ້ປິດລົງຢ່າງເປັນທາງການໃນເວລາ: 15:30 ນາທີ ຂອງວັນດຽວກັນ.
ສາຂາ ຫຼວງນ້ຳທາ, ວັນທີ 02 ຜຶດສະພາ 2024
