ກອງປະຊຸມໃຫຍ່ສະມາຊິກຊາວໜຸ່ມຮາກຖານທະນາຄານນະໂຍບາຍ ຄັ້ງທີ III ໄດ້ໄຂຂຶ້ນໃນຕອນເຊົ້າວັນພະຫັດ, ຂອງວັນທີ 31 ຕຸລາ 2019, ເລີ່ມແຕ່ເວລາ 08:00-11:00 ໂມງ, ຢູ່ທີ່ຫ້ອງປະຊຸມໃຫຍ່ຊັ້ນ III ຂອງທະນາຄານນະໂຍບາຍ, ໂດຍການເປັນປະທານຂອງສະຫາຍ ພົງປະເສີດ ຄຳລືຊາ ຮອງເລຂາຄະນະບໍລິຫານງານຊາວໜຸ່ມຮາກຖານທະນາຄານນະໂຍບາຍ, ເປັນກຽດເຂົ້າຮ່ວມໂດຍ ສະຫາຍ ປອ ອາຄົມ ປະເສີດ ແລະ ສະຫາຍ ວຸດທິ ເລື່ອນວິໄລວົງ ເຂົ້າຮ່ວມກອງປະຊຸມຄັ້ງນີ້ ມີຜູ້ຕາງໜ້າຈາກຮາກຖານ ຊາວໜຸ່ມ ທຫລ, ທະນາຄານທຸລະກິດລັດ ແລະ ມີສະມາຊິກຊາວໜຸ່ມຮາກຖານທະນາຄານນະໂຍບາຍ ທັງໝົດ 100 ສະຫາຍ, ຍິງ 56 ສະຫາຍ, ສະມາຊິກຊາວໜຸ່ມ ທນບ ຈຳນວນ 93 ສະຫາຍ.
ກອງປະຊຸມໄດ້ພ້ອມກັນຄົ້ນຄວ້າ ແລະ ເປັນເອກະພາບຮັບຮອງເອົາຮ່າງລາຍງານການເມືອງທີ່ສະເໜີໂດຍສະຫາຍ ນ. ເພັດດາວອນ ເທພາພິນ ຄະນະຊາວໜຸ່ມຮາກຖານ ທນບ, ຮັບຮອງເອົາຮ່າງບົດສໍາຫຼວດການນຳພາສະເໜີໂດຍ ສະຫາຍ ພົງປະເສີດ ຄຳລືຊາ ຮອງເລຂາຄະນະບໍລິຫານງານຊາວໜຸ່ມຮາກຖານ ທນບ. ເນື້ອໃນລາຍງານການເມືອງໄດ້ຕີລາຄາຜົນງານຂອງການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ II ເຊິ່ງໃນນັ້ນໄດ້ຕີລາຄາດ້ານດີ, ດ້ານອ່ອນ-ຂໍ້ຄົງຄ້າງ, ສາເຫດ ແລະ ບົດຮຽນທີ່ຖອດຖອນໄດ້ຕະຫຼອດການເຄື່ອນໄຫວວຽກງານ 5 ປີຜ່ານມາ, ພ້ອມນີ້, ກອງປະຊຸມຍັງໄດ້ເປັນເອກະສັນ ຮັບຮອງເອົາທິດທາງແຜນການໃນໄລຍະຕໍ່ໜ້າແຕ່ 2020-2024 ເຊິ່ງມີເນື້ອໃນສໍາຄັນ ດັ່ງລຸ່ມນີ້:
- ສືບຕໍ່ສຶກສາອົບຮົມການເມືອງ-ແນວຄິດສະມາຊິກຊາວໜຸ່ມ ໃຫ້ເປັນປົກກະຕິ, ເລິກເຊິ່ງ ແລະກວ້າງຂວາງກຳ ແໜ້ນແນວທາງຂອງພັກ, ລະບຽບ, ກົດໝາຍ, ມະຕິ, ຄໍາສັ່ງ. ຍົກສູງຄວາມຕື່ນຕົວທາງດ້ານການເມືອງ, ມີນ້ຳໃຈເສຍ ສະຫຼະ, ນ້ຳໃຈຮັບຜິດຊອບ, ຄວາມເປັນແບບຢ່າງນຳໜ້າ, ມີສະຕິຕໍ່ການຈັດຕັ້ງ, ຕ້ານແນວຄິດສວຍໂອກາດ ແລະປະກົດການຫຍໍ້ທໍ້ຕ່າງໆ, ທັງຮັບປະກັນໃຫ້ຖັນແຖວສະມາຊິກມີຄວາມສະຫງົບ.
- ເພີ່ມທະວີຄວາມສາມັກຄີເປັນເອກະພາບພາຍໃນຄະນະ, ສະມາຊິກຊາວໜຸ່ມຢ່າງແໜ້ນແຟ້ນ, ປັບປຸງແບບ ແຜນວິທີ່ເຮັດວຽກ, ແບບແຜນການນໍາພາຂອງຄະນະຊາວໜຸ່ມແຕ່ລະຂັ້ນໃຫ້ເຂັ້ມງວດ, ເສີມຂະຫຍາຍບົດບາດການນຳພາ, ການເຄື່ອນໄຫວຂອງອົງການຈັດຕັ້ງຊາວໜຸ່ມ ທນບ ໃຫ້ມີຄວາມເຂັ້ມແຂງ.
- ປັບປຸງກົງຈັກການຈັດຕັ້ງພາຍໃນໃຫ້ສອດຄ່ອງ, ມີຄວາມເຂັ້ມແຂງ ໂດຍສະເພາະປັບປຸງບັນດາໜ່ວຍທີ່ຂຶ້ນກັບພະແນກຕາມລະບຽບທີ່ກຳນົດໄວ້, ເປັນເສນາທິການໃຫ້ຄະນະໃນການຕິດຕາມ, ມີຄວາມເຫັນທາບທາມຢັ່ງສຽງມະຫາຊົນຜູ້ທີ່ມີຜົນງານພົ້ນເດັ່ນໃນໜ້າທີ່ວຽກງານ ເພື່ອສ້າງເປັນເປົ້າໝາຍຂະຫຍາຍເຂົ້າພັກ, ສ້າງເງື່ອນໄຂໃຫ້ສະມາຊິກຊາວໜຸ່ມໄດ້ໄປຍົກລະດັບຄວາມຮູ້-ຄວາມສາມາດທາງດ້ານທິດສະດີການເມືອງ ແລະວິຊາສະເພາະໃນລະດັບຂັ້ນຕ່າງໆ.
- ສູ້ຊົນປະຕິບັດເນື້ອໃນຂໍ້ແຂ່ງຂັນ 4 ບຸກ ໂດຍສະເພາະໃນຕໍ່ໜ້າໃຫ້ບັນດາໜ່ວຍໄດ້ຮັບການປະເມີນຂໍ້ແຂ່ງຂັນຂອງຕົນເປັນປົກກະຕິ.
ກອງປະຊຸມໃຫຍ່ ຍັງໄດ້ຮັບຟັງການລາຍງານ ບົດສຳຫຼວດ ການຊີ້ນຳ – ນຳພາຂອງຄະນະບໍລິຫານງານ ຮາກຖານຊາວໜຸ່ມ ທະນາຄານນະໂຍບາຍ ຊຸດທີ II ໃນໄລຍະຜ່ານມາ, ຊຶ່ງສະແດງໃຫ້ເຫັນດ້ານດີ, ດ້ານອ່ອນ ຂໍ້ຄົງຄ້າງ ທີ່ຄະນະບໍລິຫານງານຊາວໜຸ່ມຊຸດໃໝ່ ຈະຕ້ອງໄດ້ປັບປຸງແກ້ໄຂໃນຕໍ່ໜ້າ, ກອງປະຊຸມໃຫຍ່ຄັ້ງນີ້ ໄດ້ພ້ອມກັນໃຊ້ສິດປະຊາທິປະໄຕຂອງຕົນ ປ່ອນບັດເລືອກເອົາຄະນະບໍລິຫານງານຊາວໜຸ່ມຮາກຖານທະນາຄານນະໂຍບາຍ ຄັ້ງທີ III ຊຸດໃໝ່ ບົນພື້ນຖານມາດຕະຖານ, ເງື່ອນໄຂທີ່ກຳນົດໄວ້ເຊິ່ງມີຜູ້ອອກຮັບສະໝັກເລືອກຕັ້ງ 7 ສະຫາຍ, ຍິງ 2 ສະຫາຍ ແລະ ເລືອກໄດ້ 5 ສະຫາຍ, ຍິງ 1 ສະຫາຍ ຄື:
- ສະຫາຍ ພົງປະເສີດ ຄຳລືຊາ ເປັນເລຂາ,
- ສະຫາຍ ຄຳສະຫວັດ ອິນທະວົງ ເປັນຮອງເລຂາ,ທັງເປັນຜູ້ປະຈຳການ,
- ສະຫາຍ ນ. ຄຳປິ່ນ ມະໂນທຳ ເປັນຮອງເລຂາ, ປະທານກວດກາ,
- ສະຫາຍ ສຸກປະເສີດ ເສັນບັນດິດ ກຳມະການ,
- ສະຫາຍ ຈຳປາທອງ ທອງພັນກຳມະການ.
ກອງປະຊຸມຄັ້ງນີ້ ຍັງໄດ້ເປັນກຽດຮັບຟັງການໂອ້ລົມຈາກ ສະຫາຍ ວຸດທິ ເລື່ອນວິໄລວົງ ກຳມະການຄະນະພັກ ທຫລ, ເລຂາຄະນະພັກຮາກຖານ ທນບ ແລະ ສະຫາຍ ປອ ອາຄົມ ປຣະເສີດ ຄະນະພັກ ທຫລ. ຄະນະບໍລິຫານງານສູນກາງຊາວໜຸ່ມປະຊາຊົນລາວ, ເລຂາຄະນະບໍລິຫານງານຊາວໜຸ່ມ ທຫລ, ສະຫາຍໄດ້ຕີລາຄາຢ່າງພາວະວິໄສ ຕໍ່ກັບດ້ານດີ-ດ້ານຕັ້ງໜ້າທີ່ຍາດມາໄດ້ ສະຫາຍຍັງໄດ້ຍ້ອງຍໍຊົມເຊີຍຕໍ່ຜົນງານຂອງຄະນະບໍລິຫານງານຊາວໜຸ່ມໃນໄລຍະຜ່ານມາ. ພ້ອມກັນນັ້ນ ສະຫາຍຍັງຮຽກຮ້ອງຈະຕ້ອງໄດ້ສືບຕໍ່ເສີມຂະຫຍາຍດ້ານດີ, ປັບປຸງແກ້ໄຂດ້ານອ່ອນ-ຂໍ້ຄົງຄ້າງ ໃນຕໍ່ໜ້າ, ສໍາລັບທິດທາງແຜນການໃນຊຸມປີຕໍ່ໜ້າສະຫາຍ ໄດ້ໃຫ້ທິດຊີ້ນຳຄະນະບໍລິຫານງານຊາວໜຸ່ມຮາກຖານຊຸດໃໝ່ ໃຫ້ເອົາໃຈໃສ່ບາງບັນຫາ:
- ເພີ່ມທະວີສຶກສາອົບຮົມການເມືອງ–ແນວຄິດ, ຄຸນສົມບັດສິນທໍາປະຕິວັດ, ແນວທາງນະໂຍບາຍ ແລະ ລະບຽບການຂອງຂັ້ນເທິງ ໃຫ້ສະມາຊິກຊາວໜຸ່ມເຊື່ອມຊຶມ, ຮັບຮູ້, ຮັບປະກັນບໍ່ໃຫ້ມີປະກົດການຫຍໍ້ທໍ້ເກີດຂຶ້ນໃນຖັນແຖວສະມາຊິກ.
- ສືບຕໍ່ເປັນເສນາທິການໃຫ້ຄະນະພັກຮາກຖານ ທນບ ໃນວຽກງານປົກປັກຮັກສາ ແລະ ປ້ອງກັນຄວາມສະຫງົບກໍ່ຄືຂະບວນການຕ່າງໆ, ສ້າງໃຫ້ບັນດາໜ່ວຍຊາວໜຸ່ມເປັນໜ່ວຍປະຈັນບານຮອບດ້ານ, ຮູ້ຄຸ້ມຄອງວຽກງານ ແລະ ປະສານງານຕາມສາຍໃຫ້ເປັນປົກກະຕິ.
- ຄົ້ນຄວ້າປັບປຸງບູລະນະການຈັດຕັ້ງຊາວໜຸ່ມໃຫ້ເຂັ້ມແຂງ, ກໍ່ສ້າງສະມາຊິກຜູ້ທີ່ມີຜົນງານດີເດັ່ນ, ມີຄວາມຫ້າວຫັນ ເພື່ອສ້າງເປັນເປົ້າໝາຍມະຫາຊົນຜູ້ກ້າວໜ້າ ນໍາສະເໜີຄະນະພັກຂັ້ນເທິງ ເຂົ້າເປັນສະມາຊິກພັກ.
- ຄົ້ນຄວ້າ ແລະ ຊຸກຍູ້ວຽກງານຂະບວນການໃຫ້ມີຄວາມເຂັ້ມແຂງ ເພື່ອປະກອບສ່ວນເຂົ້າໃນວຽກງານຂໍ່ານັບຮັບຕ້ອນວັນສໍາຄັນຕ່າງໆ ຂອງຊາດ, ຂອງພັກໂດຍສະເພາະແມ່ນການຈັດຕັ້ງປະຕິບັດ ຂໍ້ແຂງຂັນ 4 ບຸກ ຂອງຊາວໜຸ່ມໃຫ້ມີຄວາມເຂັ້ມແຂງ.
- ເປັນເຈົ້າການປະສານກັບ ຄະນະພັກຮາກຖານ ທນບ, ຄະນະບໍລິຫານງານຊາວໜຸ່ມ ທຫລ ເພື່ອຄົ້ນຄວ້າສ້າງແຜນກໍ່ສ້າງ, ບໍາລຸງ ແລະ ຝຶກອົບຮົມໃຫ້ສະມາຊິກຊາວໜຸ່ມ, ປະຕິບັດນະໂຍບາຍຕໍ່ສະມາຊິກຊາວໜຸ່ມທີ່ມີຜົນງານທີ່ດີ ຫ້າວຫັນຕໍ່ໜ້າທີ່ວຽກງານໃຫ້ໄດ້ຢ່າງທົ່ວເຖິງ.
- ພົວພັນຮ່ວມມືກັບຊາວໜຸ່ມແຮກສ່ຽວກັບກະຊວງ ທີ່ຕິດພັນກັບໜ້າທີ່ ແລະ ບົດບາດຂອງຊາວໜຸ່ມຮາກຖານ ທນບ.
ສຸດທ້າຍ ບັນດາສະຫາຍທີ່ເຂົ້າຮ່ວມກອງປະຊຸມໄດ້ຍົກສູງຄວາມຮັບຜິດຊອບ, ມີລະບຽບວິໄນສຸມສະຕິປັນຍາຂອງຕົນເຮັດໃຫ້ກອງປະຊຸມດຳເນີນໄປດ້ວຍບັນຍາກາດຟົດຟື້ນ ແລະ ປະສົບຜົນສຳເລັດຢ່າງສະຫງ່າງາມຕາມຈຸດປະສົງຄາດໝາຍ ທີ່ກອງປະຊຸມໄດ້ກຳນົດໄວ້, ກອງປະຊຸມຂໍສະແດງຄວາມຂອບໃຈຢ່າງສູງຕໍ່ການຊີ້ນຳຂອງຄະນະພັກ, ຄະນະຊາວໜຸ່ມທະນາຄານແຫ່ງ ສປປ ລາວ, ອົງການຈັດຕັ້ງກຳມະບານ, ແມ່ຍິງ, ອົງການຈັດຕັ້ງຊາວໜຸ່ມຮາກຖານທະນາຄານທຸລະກິດລັດ ແລະ ພາກສ່ວນກ່ຽວຂ້ອງທີ່ໃຫ້ການຮ່ວມມືຊ່ວຍເຫຼືອຈົນມີຜົນສຳເລັດຢ່າງຈົບງາມ.
ຖ່າຍພາບ: ມະໂນພາບ ແລະ ວິລະຫັດ
ຂຽນຂ່າວໂດຍ: ທ້າວ ພົງສະຫວັນ ບຸບຜາຈັນ
