ໃນວັນທີ່ 28 ຕຸລາ 2019 ເຖິງ ວັນທີ່ 1 ພະຈິກ 2019 ທີ່ຜ່ານມາ ທ່ານແສງໝັ້ນ ແກ້ວເມືອງເໜືອ ຫົວໜ້າ ສາຂາ ທະນາຄານ ນະໂຍບາຍ ອຸດົມໄຊ ພ້ອມກັບຂະແໜງສິນເຊື່ອ ໄດ້ສົມທົບກັບ ໜ່ວຍບໍລິການ ເມືອງນາໝໍ້ ລົງເຄື່ອນໄຫວວຽກ ແກ້ໄຂໜີ້ສິນນຳອົງການປົກຄອງບ້ານ ແລະປະຊາຊົນ ບ້ານ ພູເອືອດ, ບ້ານ ສະແງ, ບ້ານ ເຕົ່າ ແລະ ບ້ານ ພູເຄືອ. ມີຜູ້ເຂົ້າຮ່ວມທັງໝົດ 200 ຄອບຄົວ, ສາມາດສ້າງບົດບັນທຶກ ແກ້ໄຂໜີ້ສິນໄດ້ 136 ສະບັບ, ເກັບຕົ້ນທຶນ NPL ໄດ້: 24,050,000 ກີບ, ເກັບດອກເບ້ຍ NPL ໄດ້: 3,150,000 ກີບ ໃນນັ້ນຊຳລະຕົ້ນທຶນດອກເບ້ຍ ສູນ ຈຳນວນ 2 ລາຍ.
ອົງການປົກຄອງບ້ານ ໃນແຕ່ລະບ້ານໄດ້ໃຫ້ການຮ່ວມມື ແລະຊ່ວຍຊຸກຍູ້ ປຸກລະດົມປະຊາຊົນ ໃຫ້ມີຄວາມຕື່ນຕົວ ໃນການຊຳລະຕົ້ນທຶນ ດອກເບ້ຍຄືນໃຫ້ກັບ ທະນາຄານ, ນອກຈາກນັ້ນ ປະຊາຊົນຍັງໃຫ້ການຮ່ວມມື ແລະມີຄວາມຈິງໃຈ ໃນການຊຳລະຕົ້ນທຶນດອກເບ້ຍ; ການໄກ່ເກ່ຍ ແລະເກັບກູ້ໜີ້ສິນ ຍັງມີລູກຄ້າບາງລາຍ ມີຄວາມຫຍຸ້ງຍາກ ເຊັ່ນ: ລູກຄ້າເສຍຊີວິດ, ເອົາເງິນແທນກັນ ແບ່ງປັນກັນ, ຕິດສີ່ງເສບຕິດ ແລະສ່ວນຫລາຍເປັນຄອບຄົວທີ່ທຸກຍາກ.
ການລົງເຄື່ອນໄຫວໃນຄັ້ງນີ້ ກໍ່ເປັນການປະຕິບັດ ແຜນການເກັບກູ້ໜີ້ສິນ ຂອງ ທະນາຄານ ນະໂຍບາຍ ສາຂາອຸດົມໄຊ ປະຕິບັດຕາມທິດຊີ້ນຳຂອງ ທະນາຄານ ນະໂຍບາຍ ສຳນັກງານໃຫຍ່. ພະນັກງານສິນເຊື່ອພາກສະໜາມ ທຸກຄົນຕ້ອງໄດ້ກຳຫຼັກການ ໃນການແກ້ໄຂ ແລະເກັບກູ້ໜີ້ສິນ, ຕ້ອງມີຄວາມໜັກແໜ້ນ, ປະຕິບັດຢ່າງເຂັ້ມງວດ ແລະຕໍ່ເນື່ອງ. ເພື່ອເຮັດໃຫ້ ການແກ້ໄຂ ແລະເກັບກູ້ໜີ້ສິນຂອງ ທະນາຄານ ນະໂຍບາຍ ມີປະສິດຕິພາບຂື້ນເທື່ອລະກ້າວ.
ພາບຂ່າວໂດຍ: ສອນໄຊ ສິນຍາ
