ໃນລະຫວ່າງວັນທີ 04 – 07 ພະຈິກ 2019 ນີ້ ການນຳຂັ້ນສູງ ທະນາຄານ ນະໂຍບາຍ ລາວ ໄດ້ເປັນກຽດຕ້ອນຮັບການນຳຂັ້ນສູງ ຈາກ ທະນາຄານ ນະໂຍບາຍ ສັງຄົມ ສສ ຫວຽດນາມ ທີ່ມາຢ້ຽມຢາມ ແລະ ເຮັດວຽກຢ່າງເປັນທາງການ ຢູ່ ນະຄອນປາກເຊ, ແຂວງຈຳປາສັກ, ປະເທດ ສປປ ລາວ.
ການນຳຂັ້ນສູງ ທນສ ຫວຽດນາມ ທີ່ມາຢ້ຽມຢາມ ແລະ ເຮັດວຽກຢ່າງເປັນທາງການໃນຄັ້ງນີ້ ນຳໂດຍ ສະຫາຍ ເຢືອງ ກວ້ຽດ ຖັງ ຜູ້ອຳນວຍການ ທະນາຄານ ນະໂຍບາຍ ສັງຄົມຫວຽດນາມ ພ້ອມດ້ວຍຄະນະ ແລະ ເປັນກຽດຕ້ອນຮັບ ໂດຍ ສະຫາຍ ວຸດທິ ເລື່ອນວິໄລວົງ ຜູ້ອຳນວຍການ ທະນາຄານ ນະໂຍບາຍ ລາວ ພ້ອມດ້ວຍຄະນະ.
ໃນການມາຢ້ຽມຢ້າມ ແລະ ເຮັດວຽກຢ່າງເປັນທາງການ ຢູ່ ສປປ ລາວ ຄັ້ງນີ້ ທັງສອງຝ່າຍ ໄດ້ສະຫຼຸບລາຍງານໂດຍຫຍໍ້ ຜົນການເຄື່ອນໄຫວວຽກງານຂອງຕົນເອງໃນໄລຍະ 09 ເດືອນທີ່ຜ່ານມາ ແລະ ສະຫຼຸບຕີລາຄາຄືນຜົນການຮ່ວມມື ໃນໄລຍະ 2019 – 2020 ແລະ ວາງແຜນການເຄື່ອນໄຫວໃນປີ 2020 ຕາມສັນຍາການຮ່ວມມື ທີ່ໄດ້ລົງນາມກັນໄວ້ ໃນວັນທີ 13 ມີນາ 2019 ທີ່ນະຄອນຫຼວງຮ່າໂນ້ຍ, ປະເທດ ສສ ຫວຽດນາມ ໂດຍທັງສອງຝ່າຍ ເປັນເອກະພາບໃນການຮ່ວມມືຮອບດ້ານ, ແລກປ່ຽນ ແລະ ແບ່ງປັນປະສົບການໃນທຸກຂົງເຂດວຽກງານເຊັ່ນ: ຮູບແບບໂຄງຮ່າງການຈັດຕັ້ງ, ຕາໜ່າງການບໍລິການ, ວຽກງານຄຸ້ມຄອງບໍລິຫານ, ວຽກງານກໍ່ສ້າງ ແລະ ພັດທະນາແຫຼ່ງຊັບພະຍາກອນມະນຸດ, ກົນໄກ, ນະໂຍບາຍ, ຂັ້ນຕອນວິຊາສະເພາະສິນເຊື່ອ ( ລວມມີນະໂຍບາຍປ່ອຍກູ້ ແລະ ນະໂຍບາຍການລະດົມທຶນ), ວຽກງານກວດກາ – ຄູ້ມຄອງ, ວຽກງານເຕັກໂນໂລຊີ ຂໍ້ມູນຂ່າວສານ ແລະ ແລກປ່ຽນວັດທະນະທຳເຊິ່ງກັນ ແລະ ກັນ.
ກອງປະຊູມ ໄດ້ຕົກລົງເຊັນສັນຍາຮ່ວມມືເພີ່ມ ລະຫວ່າງ ສາຂາ ກັບ ສາຂາ ທີ່ມີຊາຍແດນຕິດຈອດ ໃນນັ້ນປະກອບມີ: ສາຂາຜົ້ງສາລີ ແລະ ສາຂາດ໋ຽນບຽນ, ສາຂາຫົວພັນ ແລະ ສາຂາແທງຫົວ, ສາຂາອັດຕະປື ແລະ ສາຂາກອນຕູມ ແລະ ໄດ້ວາງແຜນການເຄື່ອນໄຫວໃນສົກປີ 2020 ໂດຍໄດ້ເໜັ້ນແຕ່ລະບັນຫາດັ່ງນີ້:
- ສືບຕໍ່ຮ່ວມມື ແລະ ແລກປ່ຽນປະສົບການຮອບດ້ານນຳກັນເປັນຕົ້ນໃນຂົງເຂດ: ຮູບແບບການຈັດຕັ້ງ, ການຄຸ້ມຄອງ ແລະ ບໍລິຫານ, ການກໍ່ສ້າງ ແລະ ພັດທະນາແຫຼ່ງ ຊັບພະຍາກອນມະນຸດ, ກົນໄກການຄຸ້ມຄອງ, ບໍລິຫານຕໍ່ກັບບັນດາໂຄງການສະໜອງສິນເຊື່ອ, ກົນໄກນະໂຍບາຍຊອກຫາແຫຼ່ງທຶນ, ວຽກງານບັນຊີ – ຄັງເງິນ, ການບໍລິການຊຳລະສະສາງຜ່ານ, ການກວດກາ ແລະ ກວດສອບພາຍໃນ, ການໝູນໃຊ້ເຕັກໂນໂລຊີ ແລະ ຂໍ້ມູນຂ່າວສານ ເຂົ້າໃນການເຄື່ອນໄຫວທະນາຄານ, ການຂົນຂວາຍປຸກລະດົມ ແລະ ໂຄສະສະນາຊວນເຊື່ອ.
- ສືບຕໍ່ຮັກສາການສື່ສານ ແລກປ່ຽນຂ່າວສານການເຄື່ອນໄຫວ, ສິ່ງພິມ ກໍ່ຄືຜົນການຄົ້ນຄວ້າວິທະຍາສາດລະຫວ່າງສອງຝ່າຍ, ໄປຄຽງຄູ່ກັບ ພາກສ່ວນຮັບຜິດຊອບດ້ານວິຊາສະເພາະຂອງ ທນສ ຫວຽດນາມ ຈະຊ່ວຍເຫຼືອ ທນບ ລາວໃນການຄົ້ນຄວ້າ, ປັບປຸງລະບຽບການທີ່ ທນບ ລາວ ທີ່ໄດ້ໝູນໃຊ້ບົດຮຽນ, ປະສົບການ ຕົວຈິງຂອງ ທນສ ເຂົ້າໃນການເຄືອນໄຫວຂອງຕົນ.
- ເພີ່ມທະວີການເຄື່ອນໄຫວແລກປ່ຽນຂໍ້ມູນ ຂ່າວສານ, ຖອດຖອນບົດຮຽນ ແລະ ແລກປ່ຽນປະສົບການ ດ້ານວິຊາສະເພາະ ຢູ່ຂັ້ນສາຂາ ລະຫວ່າງບັນດາສາຂາທີ່ໄດ້ແຮກສ່ຽວ.
ທັງສອງຝ່າຍເປັນເອກະພາບກັນ ຈັດຕັ້ງກອງປະຊຸມສຳມະນາ, ເພື່ອແລກປ່ຽນປະສົບການລະຫວ່າງພະນັກງານຂອງສອງຝ່າຍຮ່ວມກັນຢ່າງໜອຍໃຫ້ໄດ້ 1 ຄັ້ງຕໍ່ປີ ແລະ ຈັດກອງປະຊຸມສະຫຼຸບ, ຕີລາຄາ ຜົນການເຄື່ອນໄຫວຕາມການຕົກລົງກັນ ໃນທ້າຍປີ. ເນື້ອໃນ ແລະ ສະຖານທີ່ຈັດກອງປະຊຸມພົບປະ ທັງສອງຝ່າຍປຶກສາຫາລືກັນ ເພື່ອເປັນເອກະພາບກັນຢູ່ໃນແຜນການຮ່ວມມືປະຈຳປີ.
ຖ່າຍພາບ: ສີສະຫວັດ ຄຳມຸງຄຸນ
ຂຽນຂ່າວໂດຍ: ຈັນທະວິໄລ ບຸນທະລາ
