ໃນຕອນເຊົ້າຂອງວັນທີ 25 ຕຸລາ 2019 ນີ້ ທີ່ຫ້ອງປະຊູມໃຫຍ່ຊັ້ນ III ທະນາຄານນະໂຍບາຍ ສຳນັກງານໃຫຍ່ ໄດ້ເປີດກອງປະຊູມໃຫຍ່ ຄັ້ງທີ I ຂອງໜ່ວຍພັກ ພະແນກຫ້ອງການ – ບໍລິຫານ ຂື້ນ ໂດຍການເປັນປະທານຂອງ ສະຫາຍ ຄຳອົ້ນ ຈັນສຸລິມາດ ຮອງເລຂາຄະນະພັກຮາກຖານ, ເລຂາໜ່ວຍພັກພະແນກຫ້ອງການ – ບໍລິຫານ ແລະ ໃຫ້ກຽດເຂົ້າຮ່ວມກອງປະຊູມຄັ້ງນີ້ ໂດຍ ສະຫາຍ ວຸດທິ ເລື່ອນວິໄລວົງ ກຳມະການຄະນະພັກ ທະນາຄານ ແຫ່ງ ສປປ ລາວ, ເລຂາຄະນະພັກຮາກຖານ, ບັນດາສະຫາຍຄະນະພັກຮາກຖານ, ເລຂາໜ່ວຍພັກອ້ອມຂ້າງ, ອົງການຈັດຕັ້ງມະຫາຊົນ ແລະ ແຂກຮັບເຊີນ ຈາກຄະນະຮັບຜິດຊອບຈາກ ທະນາຄານ ແຫ່ງ ສປປ ລາວ ເຂົ້າຮ່ວມຈຳນວນໜຶ່ງ.
ກອງປະຊູມໄດ້ຮັບຟັງລາຍງານການເມືອງ ສະເໜີໂດຍ ສະຫາຍ ພົງປະເສີດ ຄຳລືຊາ ຮອງເລຂາໜ່ວຍພັກ ເຊິ່ງເນື້ອໃນບົດລາຍງານການເມືອງ ໄດ້ຍົກໃຫ້ເຫັນດ້ານດີ, ດ້ານອ່ອນ – ຂໍ້ຄົງຄ້າງ, ແລະ ບົດຮຽນທີ່ສາມາດຖອດຖອນໄດ້ ຕະຫຼອດການເຄື່ອນໄຫວຊີ້ນຳ – ນຳພາວຽກງານ ໃນໄລຍະ 5 ປີຜ່ານມາ, ພ້ອມນີ້, ກອງປະຊຸມ ຍັງໄດ້ເປັນເອກະພາບ ຮັບຮອງເອົາທິດທາງແຜນການໃນຕໍ່ໜ້າຂອງຄະນະໜ່ວຍພັກ ແລະ ໄດ້ຮັບຮອງເອົາ ບົດສໍາຫຼວດການນໍາພາ ຂອງຄະນະໜ່ວຍພັກ ໃນໄລຍະຜ່ານມາ ເຊິ່ງສະແດງໃຫ້ເຫັນດ້ານດີ, ດ້ານອ່ອນ ຂໍ້ຄົງຄ້າງທີ່ຈະຕ້ອງໄດ້ສືບຕໍ່ປັບປຸງແກ້ໄຂໃນຕໍ່ໜ້າ.
ກອງປະຊຸມໄດ້ຮັບຟັງການອຳລາຕຳແໜ່ງ ຈາກ ສະຫາຍ ຄຳອົ້ນ ຈັນສຸລິມາດ ຮອງເລຂາຄະນະພັກຮາກຖານ ເພື່ອສືບຕໍ່ ຂື້ນໄປຊີ້ນຳ – ນຳພາ ຮ່ວມກັບ ຄະນະພັກຮາກຖານ, ພ້ອມກັນນັ້ນໄດ້ໃຊ້ສິດປະຊາທິປະໄຕຂອງຕົນ ປ່ອນບັດເລືອກຕັ້ງເອົາຄະນະໜ່ວຍພັກຊຸດໃໝ່ ບົນພື້ນຖານມາດຕະຖານ – ເງື່ອນໄຂ ທີ່ກຳນົດໄວ້ ຊຶ່ງມີຜູ້ອອກສະໝັກທັງໝົດ 5 ສະຫາຍ, ຍິງ 3 ສະຫາຍ ແລະ ໄດ້ເລືອກ 3 ສະຫາຍ, ຍິງ 2 ສະຫາຍ ບັນຈຸເຂົ້າໃນຄະນະໜ່ວຍພັກຊຸດໃໝ່ຄື:
- ສະຫາຍ ພົງປະເສີດ ຄຳລືຊາ ເປັນເລຂາໜ່ວຍພັກ.
- ສະຫາຍ ນາງ ຄຳຜົງ ຊາມຸນຕີ ເປັນຮອງເລຂາໜ່ວຍພັກ, ຜູ້ກວດກາໜ່ວຍ.
- ສະຫາຍ ນາງ ສຸພາພອນ ສິດທິໂສ ເປັນກຳມະການໜ່ວຍພັກ.
ກອງປະຊຸມໃຫຍ່ຄັ້ງນີ້ ຍັງໄດ້ເປັນກຽດຮັບຟັງການໂອ້ລົມຈາກ ສະຫາຍ ວຸດທິ ເລື່ອນວິໄລວົງ ເລຂາຄະນະພັກຮາກຖານ ທະນາຄານນະໂຍບາຍ ທີ່ ໄດ້ຕີລາຄາຢ່າງພາວະວິໄສ ຕໍ່ໝາກຜົນໃນການຊີ້ນຳ – ນຳພາຂອງໜ່ວຍພັກ ເຊິ່ງສະຫາຍໄດ້ຍ້ອງຍໍຊົມເຊີຍ ຕໍ່ຜົນງານຂອງຄະນະໜ່ວຍພັກ ໃນການຊີ້ນຳ – ນຳພາ ໃນໄລຍະຜ່ານມາ, ພ້ອມກັນນັ້ນ ສະຫາຍ ເລຂາຄະນະພັກຮາກຖານ ທະນາຄານນະໂຍບາຍ ຍັງໄດ້ຮຽກຮ້ອງໃຫ້ ຄະນະໜ່ວຍພັກຊຸດໃໝ່ ຈະຕ້ອງໄດ້ເພີ່ມທະວີສືບຕໍ່ ເສີມຂະຫຍາຍດ້ານທີ່ພົ້ນເດັ່ນ ແລະ ພ້ອມກັນນັ້ນຈະຕ້ອງໄດ້ອອກແຮງປັບປຸງແກ້ໄຂດ້ານອ່ອນ – ຂໍ້ຄົງຄ້າງ ໃຫ້ຫຼຸດໜ້ອຍຖອຍລົງ, ສຳລັບທິດທາງແຜນການໃນຊຸມປີຕໍ່ໜ້າ ສະຫາຍໄດ້ໃຫ້ທິດຊີ້ນຳ ຕໍ່ຄະນະໜ່ວຍພັກຊຸດໃໝ່ ໃຫ້ເອົາໃຈໃສ່ບາງບັນຫາ ໃນການສືບຕໍ່ເສີມຂະຫຍາຍຜົນສຳເລັດ ເຂົ້າໃນການຈັດຕັ້ງຜັນຂະຫຍາຍ ມະຕິກອງປະຊຸມໃຫ່ຍຄັ້ງທີ I ຂອງໜ່ວຍພັກ ໂດຍສະເພາະແມ່ນ:
- ຈັດຕັ້ງຜັນຂະຫຍາຍກອງປະຊຸມໃຫຍ່ໃຫ້ມີດ້ານຕັ້ງໜ້າ, ດ້ານອ່ອນຄໍ້ຄົງຄ້າງຕ້ອງມີແນວທາງ, ກຳນົດແຜນງານອັນລະອຽດ, ພ້ອມກັນນັ້ນສ້າງຜົນງານຂຳນັບຮັບຕ້ອນກອງປະຊຸມໃຫຍ່.
- ສຶກສາອົບຮົມການເມືອງແນວຄິດໃຫ້ສະມາຊິກພັກ ທີ່ຢູ່ໃນຄວາມຮັບຜິດຊອບຂອງຕົນ, ໃຫ້ຮັບຮູ້ ແລະ ເຊື່ອມຊຶມ ຕໍ່ມະຕິກອງປະຊູມໃຫຍ່ຂອງພັກຕົນ.
- ກໍ່ສ້າງຂະຫຍາຍພັກ, ອັດຕາສ່ວນຂອງສະມາຊິກພັກກວມ 40% ຂື້ນໄປ, ການກໍ່ສ້າງພັກປອດໃສເຂັ້ມແຂງໜັກແໜ້ນ, ການຂະຫຍາຍສະມາຊິກພັກຕ້ອງໄດ້ເອົາໃຈໃສ່ຊີ້ນຳເພີ່ມທະວີຕື່ມ.
- ການປັບປຸງແບບແຜນວິທີນຳພາຂອງຄະນະພັກ, ການປັບປຸງວິທີເຮັດວຽກຂອງໜ່ວຍພັກ, ເພີ້ມທະວີຕື່ມໃຫ້ມີການວາງແຜນຄັກແນ່, ມີການປະເມີນພະນັກງານເປັນປົກກະຕິ, ການປັບປຸງກົງຈັກການຈັດຕັ້ງຕ້ອງໃຫ້ມີຄວາມເໜາະສົມ, ດ້ານວຽກງານວິຊາສະເພາະ ເຊັ່ນ: ວຽກງານຄຸ້ມຄອງຊັບສົມບັດ, ວຽກງານຕິດພັນກັບການທັນສະໄໜ, ການເປັນເສນາທິການໃຫ້ແກ່ຄະນະນຳ, ຄະນະອຳນວຍການ, ສະຫຼຸບ, ສັງລວມ, ລາຍງານຕ້ອງໃຫ້ທັນກັບສະພາບ, ວຽກງານສະຫຼຸບແຜນທຸລະກິດປະຈຳປີຕ້ອງໄດ້ເບີ່ງທົບທວນຄືນ, ບັນດາໜ້າວຽກກະກຽມປະສານສົມທົບ, ບັນດານິຕິກຳຕ່າງໆ ນິຕິກຳຕິດກັບວຽກງານວິຊາສະເພະ.
- ທົບທວນຄືນບັນດາໜ້າວຽກ ໂດຍສະເພາະບັນຫາ ການປະສານສົມທົບ ກັບບັນດາສາຍຕັ້ງ ທີ່ກ່ຽວຂ້ອງ, ການປະສານງານອື່ນໆ ລວມເຖິງວຽກງານ ຂາເຂົ້າ – ຂາອອກ ແລະ ວຽກງານເລຂານຸການ.
- ກຳນົດແບບແຜນວິທີເຮັດວຽກ ຂອງຄະນະພັກ ເພືອເປັນບ່ອນອີງໃນການຈັດຕັ້ງປະຕິບັດ ແລະ ສືບຕໍ່ຮັກສາ ແລະ ເສີມຂະຫຍາຍຜົນງານອັນດີເດັ່ນ ຂອງຖັນແຖວສະມະຊິກພັກ – ພະນັກງານ, ປັບປຸງແບບ ແຜນວິທີເຮັດວຽກ, ຕິດພັນກັບການປັບປຸງການຈັດຕັ້ງ, ການກໍ່ສ້າງໜ່ວຍພັກປອດໄສ, ເຂັ້ມແຂງ ແລະ ໜັກແໜ້ນ ໃຫ້ມີຜົນສຳເລັດ, ສາມາດຕອບສະໜອງ ຄວາມຮຽກຮ້ອງຕ້ອງການ ຂອງໜ້າທີ່ວຽກງານໃນໄລຍະໄໝ່.
ກອງປະຊຸມໄດ້ຮຽກຮ້ອງໃຫ້ ສະມາຊິກພັກ – ພະນັກງານ ຂອງໜ່ວຍພັກ ຈົ່ງໄດ້ເຊີດຊູສະຕິ ແລະ ຍົກສູງຄວາມຮັບຜິດຊອບໜ້າທີ່ການເມືອງຂອງຕົນ ເຮັດໃຫ້ວຽກງານພາຍໃນໜ່ວຍພັກ ມີການຫັນປ່ຽນໃໝ່ທີ່ຕັ້ງໜ້າ, ເຮັດໃຫ້ພັກມີຄວາມປອດໄສ, ເຂັ້ມແຂງ ແລະ ໜັກແໜ້ນ.
