ໃນຕອນເຊົ້າຂອງວັນທີ 19 ພະຈິກ 2019 ນີ້ ກອງປະຊຸມ ສະພາບໍລິຫານ ທະນາຄານນະໂຍບາຍ ສະໄໝສາມັນ ຄັ້ງທີ II ປະຈຳປີ 2019 ໄດ້ໄຂຂຶ້ນ ຢ່າງເປັນທາງການ ທີ່ຫ້ອງປະຊຸມໃຫຍ່ຊັ້ນ III ທນບ ສຳນັກງານໃຫຍ່, ພາຍໃຕ້ການເປັນປະທານຂອງ ທ່ານ ສອນໄຊ ສິດພະໄຊ ຜູ້ວ່າການ ທະນາຄານແຫ່ງ ສ ປປ ລາວ, ປະທານສະພາບໍລິຫານ ທະນາຄານນະໂຍບາຍ, ມີບັນດາທ່ານ ຄະນະກຳມະການ ສະພາບໍລິຫານ, ຄະນະອຳນວຍການ ພ້ອມດ້ວຍແຂກຮັບເຊີນເຂົ້າຮ່ວມຈຳນວນໜຶ່ງ.
ກອງປະຊຸມໄດ້ຮັບຟັງການລາຍງານ ຜົນການຈັດຕັ້ງປະຕິບັດ ມະຕິກອງປະຊຸມ ສະພາບໍລິຫານ ສະໄໝສາມັນ ຄັ້ງທີ I ປີ 2019, ການເຄື່ອນໄຫວວຽກງານຮອບດ້ານ 9 ເດືອນ ປີ 2019 ແລະ ທິດທາງແຜນການ 3 ເດືອນທ້າຍປີ 2019, ໄດ້ຮັບຟັງການລາຍງານ ຄວາມພ້ອມໃນການກະກຽມສ້າງຕັ້ງ ສາຂາ ໄຊສົມບູນ, ແນວທາງ ແລະ ຮູບແບບການສະໜອງສິນເຊື່ອ ແບບມີສ່ວນຮ່ວມ ລະຫວ່າງ ທນບ ກັບ ກອງທຶນຫຼຸດຜ່ອນຄວາມທຸກຍາກ ( ທລຍ ), ກົມພັດທະນາຊົນນະບົດ ແລະ ສະຫະກອນ, ກົມສົ່ງເສີມເຕັກນິກປຸງແຕ່ງກະສິກຳ ແລະ ປ່າໄມ້ ເຊິ່ງເຫັນໄດ້ຜົນສຳເລັດ ໃນຫຼາຍດ້ານ.
ໃນໄລຍະ 09 ເດືອນປີ 2019 ຜ່ານມາ ໄດ້ເອົາໃຈໃສ່ຢ່າງຕັ້ງໜ້າ ແລະ ຖືເປັນສຳຄັນ ໃນການສຶກສາອົບຮົມ ການເມືອງແນວຄິດ ໃຫ້ພະນັກງານ ແລະ ມີຫຼາຍວຽກງານທີ່ພົ້ນເດັ່ນ ເຊັ່ນ: ໄດ້ເປີດການໃຫ້ບໍລິການ ໂອນເງິນຂ້າມ ລະບົບທະນາຄານ ແບບທັນທີ ດ້ວຍລະບົບ RTGS ທີ່ ທະນາຄານ ແຫ່ງ ສປປລາວ ໃຫ້ບໍລິການເປັນສູນລວມ, ກະກຽມດ້ານນິຕິກຳ ບໍລິການຮັບເງິນຝາກເງິນ ໄດ້ສຳເລັດໂດຍ ພື້ນຖານ ແລະ ແກ້ໄຂປະກົດການຫຍໍ້ທໍ້ໄດ້ຢ່າງແຂງແຮງສາມາດປ່ອຍສິນເຊື່ອໄດ້ທັງໜົດ 136,96 ຕື້ກີບ ແລະ ສາມາດເກັບກູ້ໜີ້ສິນຄືນ ໄດ້ທັງໜົດ: 278,76 ຕື້ກີບ, ສົມທຽບໃສ່ໄລຍະດຽວກັນປີຜ່ານມາ ເຫັນວ່າ ເພີ່ມຂື້ນ 56,83 ຕື້ກີບ, ເທົ່າກັບ 26%. ກອງປະຊຸມໄດ້ ເປັນເອກະພາບກັນ ແລະ ຮັບຮອງເອົາມະຕິກອງປະຊູມ ໂດຍຮັບຮອງເອົາບົດລາຍງານ ການຈັດຕັ້ງປະຕິບັດ ມະຕິກອງປະຊຸມ ສະພາບໍລິຫານ ສະໄໜສາມັນຄັ້ງທີ I ປີ 2019, ຮັບຮອງເອົາບົດສະຫຼຸບ 09 ເດືອນ ແລະ ທິດທາງແຜນການ 3 ເດືອນທ້າຍປີ 2019, ເຫັນດີຮັບຮອງເອົາ ການສ້າງຕັ້ງ ທະນາຄານ ນະໂຍບາຍ ສາຂາ ໄຊສົມບູນ, ຮັບຮອງ ເອົາແນວທາງ ການສະໜອງສິນເຊື່ອ ແບບມີສ່ວນຮ່ວມ ຈາກພາກສ່ວນທີ່ກ່ຽວຂ້ອງຄື: ກອງທຶນຫຼຸດຜ່ອນຄວາມທຸກຍາກ ( ທລຍ ), ກົມເຕັກນິກ ແລະ ປຸງແຕ່ງກະສິກຳ, ກົມພັດທະນາຊົນນະບົດ ແລະ ສະຫະກອນ ແລະ ເຫັນດີປັບປຸງໂຄງຮ່າງການຈັດຕັ້ງ ສະພາບໍລິຫານ ທນບ ຂັ້ນຮອງປະທານ ແລະ ກຳມະການ ຢູ່ກະຊວງກະສິກຳ – ປ່າໄມ້ ເພື່ອໃຫ້ຄົບຕາມພາລະບົດບາດ, ຄົບຕາມໂຄງປະກອບສະພາບໍລິຫານ ແລະ ມອບໃຫ້ ທນບ ຮ່າງໜັງສືສະເໜີໄປຍັງພາກສ່ວນກ່ຽວຂ້ອງ.
ຂຽນຂ່າວໂດຍ: ຈັນທະວິໄລ ບຸນທະລາ
ຖ່າຍພາບໂດຍ: ສີສະຫວັດ ຄຳມຸງຄຸນ
