ໃນຕອນເຊົ້າຂອງວັນທີ 24 ທັນວາ 2019 ນີ້ ໜ່ວຍພັກພະແນກສິນເຊື່ອ ທະນາຄານ ນະໂຍບາຍ ໄດ້ເປີດກອງປະຊຸມໃຫຍ່ ຄັ້ງທີ II ຂອງຕົນຂື້ນຢ່າງເປັນທາງການ ທີ່ຫ້ອງປະຊຸມໃຫຍ່ຊັ້ນ III ໂດຍການເປັນປະທານຂອງ ສະຫາຍ ສີສຸພັນ ໂພໄຊສີ ກຳມະການຄະນະພັກຮາກຖານ, ເລຂາໜ່ວຍພັກພະແນກສິນເຊື່ອ ແລະ ໃຫ້ກຽດເຂົ້າຮ່ວມກອງປະຊຸມຄັ້ງນີ້ ໂດຍ ສະຫາຍ ວຸດທິ ເລື່ອນວິໄລວົງ ກຳມະການຄະນະພັກ ທະນາຄານ ແຫ່ງ ສປປ ລາວ, ເລຂາຄະນະພັກຮາກຖານ, ບັນດາສະຫາຍຄະນະພັກຮາກຖານ, ເລຂາໜ່ວຍພັກອ້ອມຂ້າງ, ອົງການຈັດຕັ້ງມະຫາຊົນ ແລະ ແຂກຮັບເຊີນ ຈາກຄະນະຮັບຜິດຊອບ ທະນາຄານ ແຫ່ງ ສປປ ລາວ ເຂົ້າຮ່ວມຈຳນວນໜຶ່ງ.
ກອງປະຊຸມໄດ້ຮັບຟັງລາຍງານການເມືອງ ສະເໜີໂດຍ ສະຫາຍ ສາຍຍັນ ພົມມະຈັນ ກຳມະການໜ່ວຍພັກ ກອງປະຊຸມໄດ້ເປັນເອກະພາບຢ່າງສົມບູນ ຕໍ່ບົດລາຍງານການເມືອງ ເປັນຕົ້ນແມ່ນການສັງເກດຕີລາຄາ ຜົນງານດ້ານຕັ້ງໜ້າ, ດ້ານອ່ອນ – ຂໍ້ຄົງຄ້າງ ໃນການເຄື່ອນໄຫວວຽກງານ ໄລຍະ 05 ປີຜ່ານມາໂດຍສະເພາະ ແມ່ນຄວາມເປັນເຈົ້າການ ຊ່ວຍຄະນະພັກຮາກຖານ ທະນາຄານ ນະໂຍບາຍ ໃນການຈັດຕັ້ງປະຕິບັດວຽກງານແຕ່ລະດ້ານ, ລວມທັງບັນດາສາເຫດ ທີ່ພາໃຫ້ມີ ດ້ານດີ, ດ້ານອ່ອນ ພ້ອມທັງທິດທາງແຜນການ ແລະ ຄາດໝາຍສູ້ຊົນຂອງໜ່ວຍພັກ ແຕ່ນີ້ຮອດປີ 2024.
ກອງປະຊຸມໄດ້ຮັບຟັງ ການຜ່ານບົດສຳຫຼວດການຊີ້ນຳ – ນຳພາຂອງຄະນະໜ່ວຍພັກ ນຳສະເໜີໂດຍ ສະຫາຍ ສີສຸພັນພັນ ໂພໄຊສີ ກຳມະການຄະນະພັກຮາກຖານ, ເລຂາໜ່ວຍພັກ ຊຶ່ງໄດ້ຕີລາຄາ ຄວາມສາມາດການນຳພາ ຂອງຄະນະໜ່ວຍພັກ ໃນການຊີ້ນຳ-ນຳພາ ໄດ້ມີຜົນສໍາເລັດອັນຈົບງາມຫຼາຍດ້ານ ເປັນຕົ້ນແມ່ນຮັກສາໄດ້ ຄວາມສາມັກຄີ ເປັນເອກະພາບພາຍໃນຄະນະໜ່ວຍພັກ ກໍ່ຄືສະຫາຍສະມາຊິກພັກ, ເສີມຂະຫຍາຍບົດຮຽນ ແລະ ຄວາມສາມາດຢ່າງມີຫົວຄິດປະດິດສ້າງ ໃນການຈັດຕັ້ງນຳພາ ປະຕິບັດແນວທາງນະໂຍບາຍ ຂອງພັກ-ລັດ ໃນແຕ່ລະໄລຍະ ໃຫ້ປະກົດຜົນເປັນຈິງ ແລະ ໄດ້ຮັບຜົນສຳເລັດເປັນກ້າວໆມາ. ພ້ອມກັນນັ້ນສະຫາຍ ໄດ້ກ່າວອຳລາຕຳແໜ່ງ ເພື່ອສືບຕໍ່ໄປຊີ້ນຳ – ນຳພາ ຮ່ວມກັບ ຄະນະພັກຮາກຖານ. ຜູ້ແທນກອງປະຊູມໄດ້ໃຊ້ສິດປະຊາທິປະໄຕຂອງຕົນ ປ່ອນບັດເລືອກຕັ້ງເອົາຄະນະໜ່ວຍພັກຊຸດໃໝ່ ບົນພື້ນຖານມາດຕະຖານ – ເງື່ອນໄຂ ທີ່ກຳນົດໄວ້ໃນລະບຽບ ຊຶ່ງມີຜູ້ອອກສະໝັກທັງໝົດ 5 ສະຫາຍ, ເລືອກເອົາ 3 ສະຫາຍດັ່ງນີ້:
- ສະຫາຍ ສົມທະວີ ສີບຸນມາ ເປັນເລຂາ ໜ່ວຍພັກ.
- ສະຫາຍ ສາຍຍັນ ພົມມະຈັນ ເປັນຮອງເລຂາໜ່ວຍພັກ, ຜູ້ກວດກາໜ່ວຍ.
- ສະຫາຍ ວຽງທອງ ໄຊວົງສາ ເປັນກຳມະການໜ່ວຍພັກ.
ກອງປະຊຸມໃຫຍ່ຄັ້ງນີ້ ຍັງໄດ້ເປັນກຽດຮັບຟັງການໂອ້ລົມຈາກ ສະຫາຍ ວຸດທິ ເລື່ອນວິໄລວົງ ກຳມະການຄະນະພັກ ທຫລ, ເລຂາຄະນະພັກຮາກຖານ ທະນາຄານນະໂຍບາຍ ຊຶ່ງສະຫາຍໄດ້ສະແດງຄວາມຍ້ອງຍໍຊົມເຊີຍ ຕໍ່ການຊີ້ນຳ – ນຳພາ ຂອງຄະນະ ໜ່ວຍພັກຊຸດເກົ່າ ທີ່ໄດ້ຊີ້ນຳ – ນຳພາ ສະມາຊິກພັກ, ພະນັກງານ ພາຍໃນພະແນກ ປະຕິບັດໜ້າທີ່ການເມືອງທີ່ຕົນທີ່ໄດ້ຮັບມອບໝາຍ ແລະ ຍາດເອົາຜົນງານໃນຫຼາຍໆດ້ານ ພ້ອມກັນນັ້ນ ສະຫາຍຍັງໄດ້ສະແດງຄວາມເປັນຫ່ວງເປັນໄຍ ຕໍ່ດ້ານອ່ອນ – ຂໍ້ຄົງຄ້າງ ຊຶ່ງໄດ້ຮຽກຮ້ອງໃຫ້ຄະນະໜ່ວຍພັກຊຸດໃໝ່ ຈະຕ້ອງໄດ້ສືບຕໍ່ປັບປຸງ ແກ້ໄຂ, ນອກຈາກນັ້ນ ສະຫາຍຍັງໄດ້ໃຫ້ທິດຊີ້ນຳ ວຽກງານແຕ່ລະດ້ານຢ່າງກົງໄປກົງມາ ແລະ ສະຫາຍ ຍັງມີຄວາມເຊື່ອໝັ້ນວ່າ ໃນຕໍ່ໜ້າ ຄະນະພັກຊຸດໃໝ່ຈະສືບຕໍ່ ຊີ້ນຳ – ນຳພາ ຈັດຕັ້ງປະຕິບັດ ມະຕິກອງປະຊຸມໃຫຍ່ ຂອງຕົນໃຫ້ຍາດໄດ້ຜົນງານ ແລະ ຜົນສຳເລັດ ຍິ່ງໃຫຍ່ກ່ວາເກົ່າ. ກອງປະຊຸມ ຮຽກຮ້ອງມາຍັງສະມາຊິກພັກ – ພະນັກງານ ຈົ່ງໄດ້ເຊິດຊູສະຕິປັນຍາ ແລະ ຄວາມຮັບຜິດຊອບດ້ານການເມືອງຂອງຕົນໃຫ້ສູງຂື້ນເລື້ອຍໆ, ເຮັດໃຫ້ວຽກງານພາຍໃນພະແນກສິນເຊື່ອ ມີການຫັນປ່ຽນໃໝ່ໃນທິດທາງທີ່ຕັ້ງໜ້າ ແລະ ເຮັດໃຫ້ໜ່ວຍພັກມີຄວາມປອດໃສ, ເຂັ້ມແຂງ, ໜັກແໜ້ນ ຢ່າງແທ້ຈີງ.
ກອງປະຊູມໄດ້ສຳເລັດຢ່າງຈົບງາມ ແລະ ປິດລົງໃນເວລາ 12:00 ຂອງວັນດຽວກັນ
ຂຽນຂ່າວ: ຈັນທະວິໄລ ບຸນທະລາ
ຖ່າຍພາບ: ສີພາພອນ ເຮືອງອຸໄທ
