ໃນລະຫວ່າງວັນທີ 19 ເຖິງ 25 ກັນຍາ 2019 ນີ້ ທ່ານ ວຸດທິ ເລື່ອນວິໄລວົງ ຜູ້ອຳນວຍການ ພ້ອມດ້ວຍຄະນະໄດ້ລົງເຄື່ອນໄຫວ ມອບເງິນຊ່ວຍເຫຼືອ ໄພນ້ຳຖ້ວມຢູ່ 02 ແຂວງພາກກາງມີ: ແຂວງຄຳມ່ວນ, ແຂວງສະຫວັນນະເຂດ ແລະ 04 ແຂວງພາກໃຕ້ປະກອບມີ: ແຂວງຈຳປາສັກ, ສາລະວັນ, ເຊກອງ ແລະ ອັດຕະປື ເພື່ອແບ່ງປັນນຳໃຈ ຊ່ວຍເຫຼືອ ພໍ່ແມ່ ປະຊາຊົນ ທີ່ຖືກຜົນກະທົບຈາກໄພນ້ຳຖ້ວມໃນຄັ້ງນີ້ ລວມມູນຄ່າທັງໝົດ 98.400.000 ກີບ (ເກົ້າສິບແປດລ້ານ ສີ່ແສນກີບ), ກ້ອນເງິນດັ່ງກ່າວ ແມ່ນໄດ້ມາຈາກການລະດົມນຳອ້າຍນ້ອງ ພະນັກງານ ແລະ ສະມາຊິກ 03 ອົງການຈັດຕັ້ງມະຫາຊົນ ທະນາຄານ ນະໂຍບາຍ ທົ່ວລະບົບ.
ໃນການລົງມອບເງິນຊ່ວຍເຫຼືອຄັ້ງນີ້ ແມ່ນໄດ້ມອບຜ່ານການນຳຂັ້ນແຂວງ, ຂັ້ນເມືອງ ໂດຍມອບໃຫ້ແຂວງລະ 10 ລ້ານກີບ, ໃນນັ້ນ, ຍັງໄດ້ມອບເງິນໃຫ້ບັນດາເມືອງ ທີ່ຖືກຜົນກະທົບໜັກໃນ 10 ເມືອງຂອງ 03 ແຂວງ ປະກອບມີ: ເມືອງບົວລະພາ, ເມືອງພິນ, ເມືອງຊົນລະບູລີ, ເມືອງເຊໂປນ ແລະ ເມືອງທ່າປາງທອງ ຂອງແຂວງສະຫວັນນະເຂດ, ເມືອງສະໜາມໄຊ, ເມືອງພູວົງ, ເມືອງຊານໄຊ ແຂວງອັດຕະປື, ເມືອງບາຈຽງຈະເລີນສຸກ ແລະ ເມືອງສຸຂຸມາ ແຂວງຈຳປາສັກ ລວມເປັນເງິນ 38.400.000 ກີບ (ສາມສິບແປດລ້ານສີ່ແສນກີບ).
ໃນການລົງເຄື່ອນໄຫວຄັ້ງນີ້ ທ່ານ ວຸດທິ ເລື່ອນວິໄລວົງ ຍັງໄດ້ແນະນຳໃຫ້ບັນດາສາຂາ ແລະ ໜ່ວຍບໍລິການ ທີ່ຂື້ນກັບບັນດາເມືອງທີ່ຖືກຜົນກະທົບ ກວດກາຄືນຜົນເສຍຫາຍຕ່າງໆ ຂອງລູກຄ້າ ທະນາຄານ ນະໂຍບາຍ ເພື່ອສະຫຼຸບລາຍງານຄະນະກຳມະການແຕ່ລະຂ້ັນ ໃນການຂໍທິດແກ້ໄຂໃນຕໍ່ໜ້າ.
ຜູ້ຂຽນຂ່າວ: ຈັນທະວິໄລ ບຸນທະລາ
