ໃນຕອນແລງຂອງວັນທີ 26 ຕຸລາ 2020 ທີ່ຫ້ອງປະຊຸມໃຫຍ່ຊັ້ນ III ທະນາຄານນະໂຍບາຍ ສາຂາຫຼວງນໍ້າທາ ໄດ້ເປີດກອງປະຊຸມປະເມີນຂໍ້ແຂ່ງຂັນໜ່ວຍຊາວໜຸ່ມ 4 ບຸກ ຄັ້ງທີ II ຮອບ III ປະຈຳປີ 2020 ແລະ ວາງທິດທາງປະຈຳປີ 2021 ພາຍໃຕ້ການເປັນປະທານຂອງ ສະຫາຍ ນ ມີຢ່າງ ແສນໄຊ ເລຂາໜ່ວຍຊາວໜຸ່ມ ທນບ ສາຂາ ຫຼວງນ້ຳທາ. ເປັນກຽດເຂົ້າຮ່ວມໂດຍ ທ່ານ ສິງທະລາທອງ ສາຍຫຍ້າທອງ ຮອງເລຂາຄະນະບໍລິຫານງານຊາວໜຸ່ມແຂວງ, ທ່ານ ໄພວັນ ໄຊຍະວົງ ຮອງເລຂາໜວ່ຍພັກ ຮອງຫົວໜ້າທະນາຄານນະໂຍບາຍສາຂາຫຼວງນ້ຳທາ, ທ່ານ ສອນໄຊ ປ້ານບັນດິດ ກຳມະການຄະນະບໍລິຫານງານຊາວໜຸ່ມແຂວງ ແລະ ຄະນະຮັບຜິດຊອບປະເມີນຂໍ້ແຂ່ງຂັນ 4 ບຸກຂັ້ນແຂວງ, ມີຜູ້ຕ່າງໜ້າອົງການຈັດຕັ້ງມະຫາຊົນ ທນບ ຄື: ໜ່ວຍກຳມະບານ, ໜວ່ຍສະຫະພັນແມ່ຍິງ ແລະ ສະມາຊິກຊາວໜຸມ ທນບ ເຂົ້າຮ່ວມທົງໝົດ 16 ສະຫາຍ ຍິງ 9 ສະຫາຍ.
ກອງປະຊຸມ ສະຫາຍ ເລຂາໜ່ວຍຊາວໜຸ່ມ ທນບ ສາຂາ ຫຼວງນ້ຳທາ ກໍ່ໄດ້ຜ່ານຮ່າງບົດປະເມີນ ການຈັດຕັ້ງປະຕິບັດຂໍ້ແຂ່ງຂັນ 4 ບຸກ ປະຈຳປີ 2020 ແລະ ທິດທາງແຜນການປະຈຳປີ 2021 ເຊີ່ງໄດ້ຍົກໃຫ້ເຫັນຜົນງານດ້ານດີດ້ານອອ່ນ ແລະ ບົດຮຽນທີ່ສາມາດຖອດຖອນໄດ້ໃນການຈັດຕັ້ງປະຕິບັດຂໍ້ແຂ່ງຂັນ 4 ບຸກ ຕາມມາດຖານໃຫຍ່ 4 ດ້ານ ພ້ອມກັນນັ້ນ ກອງປະຊຸມໄດ້ຍົກໃຫ້ເຫັນວຽກງານທີ່ພົ້ນເດັ່ນໃນແຕ່ລະດ້ານ ທີ່ສາມາດຈັດຕັ້ງປະຕິບັດໄດ້ຕາມມາດຖານຂອງຄະນະບໍລິຫານງານຊາວໜຸ່ມແຂວງ ກໍ່ຄືທິດທາງຂອງໜ່ວຍກຳນົດອອກເຊັ່ນ: ບຸກດ້ານແນວຄິດ ຕີລາຄາໄດ້: 92,10%, ບຸກດ້ານການເຝິກຝົນຫຼ່ໍຫຼອມ ຕີລາຄາໄດ້: 91,20%, ບຸກດ້ານການການຈັດຕັ້ງ ຕີລາຄາໄດ້: 90,50%, ບຸກດ້ານວິຊາສະເພາະ ແລະ ສ້າງວຽກເຮັດງານທຳ ຕີລາຄາໄດ້: 91,40%, ຈາກນັ້ນ ແຂກຖືກເຊີນ ແລະ ຜູ້ແທນກອງປະຊຸມ ກໍ່ໄດ້ປະກອບຄຳຄິດຄຳເຫັນໃສ່ບົດປະເມີນ ເພື່ອເຮັດໃຫ້ເນື້ອໃນຂອງບົດປະເມີນອຸດົມສົມບູນ ແລະ ຖືກຕ້ອງສອດຄ່ອງຕາມສະພາບຄວາມເປັນຈິງຂອງໜ່ວຍຊາວໜຸ່ມຮາກຖານ ແລະ ເປັນເອກະພາບຮັບຮອງເອົາຮ່າງບົດປະເມີນ 4 ບຸກ ຄັ້ງທີ II ຮອບທີ III ປະຈຳປີ2020. ພ້ອມກັນນັ້ນ ໄດ້ຈັດພິທີມອບໃບຢັ້ງຢືນຮັບຮອງໜວ່ຍ ແລະ ສະມາຊີກ ຊາວໜຸ່ມ 4 ບຸກ ປະຈຳປີ 2019 ຈຳນວນ 11 ສະຫາຍ ຍິງ 7 ສະຫາຍ ແລະ ໃບຍ້ອງຍໍສະມາຊີກ ຜູ້ທີ່ມີຜົນງານການເຄື່ອນໄຫວວຽກງານຊາວໜຸ່ມ 5 ປີ 2014-2019 ໃຫ້ແກ່ 6 ສະຫາຍ ຍີງ 5 ສະຫາຍ.
ຕອນທ້າຍກອງປະຊຸມຍັງໄດ້ຮັບຟັງການໂອ້ລົມຂອງ ທ່ານ ຮອງເລຂາຄະນະບໍລິຫານງານຊາວໜຸ່ມແຂວງ ໄດ້ຕີລາຄາຢ່າງພາວະວິໄສ ຕໍ່ກັບດ້ານດີ-ຜົນງານທີ່ຍາດມາໄດ້ ແລະ ໄດ້ສະແດງຍ້ອງຍໍຊົມເຊີຍຕໍ່ການຊີ້ນຳ-ນຳພາ ຂອງຄະນະໜວ່ຍຊາວໜຸ່ມ ແລະ ສະມາຊີກ ທີຍາດໄດ້ຜົນສຳເລັດຫຼາຍດ້ານ ພ້ອມກັນນັ້ນ ຍັງໄດ້ເນັ້ນໜັກບາງບັນຫາໃຫ້ຄະນະໜວ່ຍ ແລະ ສະມາຊີກ ຈະຕ້ອງໄດ້ສືບຕໍ່ເສີມຂະຫຍາຍດ້ານດີ, ປັບປຸງແກ້ໄຂດ້ານອ່ອນ-ຂໍ້ຄົງຄ້າງ ໃນຕໍ່ໜ້າໃຫ້ໄດ້ຮັບຜົນສຳເລັດ ແລະ ຍີ່ງໃຫຍ່ກວ່າເກົ່າ
