ຂ່າວ: ກອງປະຊຸມໃຫຍ່ ຄັ້ງທີ່ I ຂອງກຳມະບານຮາກຖານ ທນບ ສາຂາ ຫົວພັນ
ພາບຂ່າວໂດຍ ຊົງລີ ຢາລື້ໄຊ
ວັນສຸກທີ 03 ພຶດສະພາ 2019 ຢູ່ທີ່ຫ້ອງປະຊຸມໃຫ່ຍຊັ້ນ III ຫ້ອງການ ທະນາຄານນະໂຍບາຍ ສາຂາ ຫົວພັນ ໄດ້ເປີດກອງປະຊຸມໃຫຍ່ຄັ້ງທີ I ໜ່ວຍກຳມະບານຮາກຖານ ທນບ ສາຂາ ຫົວພັນຂື້ນ ໂດຍປະຕິບັດຕາມຂໍ້ຕົກລົງສະບັບເລກທີ 47/ສກຂ, ລົງວັນທີ 02 ເມສາ 2019 ແລະ ກົດໝາຍກຳມະບານສະບັບເລກທີ 39/ສພຊ, ລົງວັນທີ: 15 /11 /2017 ພາຍໃຕ້ການເປັນປະທານ ຂອງທ່ານ ເພັດສະໝອນ ເພັດສິງທອງ ປະທານກຳມະບານຮາກຖານ ທນບ, ເປັນກຽດເຂົ້າຮ່ວມກອງປະຊຸມມີ ສະຫາຍ ຄຳພັດ ແກ້ວວິໄລ ຮອງເລຂາໜ່ວຍພັກ ຮອງຫົວໜ້າ ທນບ ສາຂາ ຫົວພັນ ແລະ ສະຫາຍ ດອນສະຫັວນ ດວງສິດ ຮອງປະທານສະຫະພັນກຳມະບານແຂວງ ພ້ອມແຂກຖຶກເຊີນທີ່ມາຈາກ ທະນາຄານ ພັດທະນາລາວ ແລະ ສົ່ງເສີມກະສິກຳ, ມີຕາງໜ້າອົງການຈັດຕັ້ງພາຄີ, ມີສະມາຊິກກຳມະບານພາຍໃນໜ່ວຍ ເຂົ້າຮ່ວມທັງໝົດ 20 ສະຫາຍ, ຍິງ 10 ສະຫາຍ.
ກອງປະຊຸມທ່ານ ເພັດສະໝອນ ເພັດສິງທອງ ປະທານສະຫະພັນກຳມະບານຮາກຖານ ທນບ ໄດ້ຂື້ນຜ່ານຮ່າງບົດລາຍງານການເມືອງທັງສອງພາກ ພ້ອມໃບສຳຫຼວດການປະຕິບັດຊີ້ນຳ-ນຳພາ ຂອງຄະນະສະຫະພັນກຳມະບານຮາກຖານ ທນບ ຜົນງານດ້ານດີ, ດ້ານອ່ອນ, ບາງຂໍ້ຄົງຄ້າງໄລຍະຜ່ານມາ ແລະ ວາງທິດທາງແຜນການແກ້ໄຂໃນຕໍ່ໜ້າ, ກອງປະຊຸມໄດ້ມອບໃບຍ້ອງຍໍປີ 2018 ໃຫ້ສະມາຊິກກຳມະບານຮາກຖານ ທນບ ຈຳນວນ 18 ສະຫາຍ ແລະ ຄະນະສະຫະພັນກຳມະບານຊຸດເກົ່າໄດ້ຂື້ນລາໜ້າທີ່ ກອງປະຊຸມຈັດຕັ້ງປ້ອນບັດຄັດເລືອກ ເອົາຄະນະສະຫະພັນກຳມະບານຮາກຖານ ທນບ ສາຂາຫົວພັນຊຸດໃໝ່ ເຊີ່ງມີຜູ້ສາມັກຄັ້ງນີ້ທັງໝົດ 05 ສະຫາຍ ແລະ ກອງປະຊຸມຄັ້ງປະຖົມມະລຶກຂອງສະຫະພັນກຳມະບານ ທນບ ສາຂາຫົວພັນ ໄດ້ເປັນເອກະສັນຢ່າງສົມບູນ ເລືອກຕັ້ງເອົາ ຄະນະປະທານກຳມະບານຮາກຖານ ຊຸດໃໝ່ ແລະ ຜູ້ຮັບຜິດຊອບແຕ່ລະໜ້າທີໃນຊຸດທີ່ I ມີ 04 ສະຫາຍ ຄື:
- ສະຫາຍ ເພັດສະໝອນ ເພັດສິງທອງ ເປັນປະທານ ສະຫະພັນກຳມະບານຮາກຖານ ທນບ.
- ສະຫາຍ ຊົງລີ ຢາລື້ໄຊ ຮອງປະທານ ສະຫະພັນກຳມະບານຮາກຖານ.
- ສະຫາຍ ນາງ ບຸນມີ ບູນສຸວັນ ເປັນປະທານກວດກາ.
- ສະຫາຍ ສຸພານິດ ດວງວິໄຊ ຮອງ ປະທານກວດກາ.
ໃນຕອນທ້າຍຂອງກອງປະຊຸມ ສະຫາຍ ດອນສະຫັວນ ດວງສິດ ຮອງປະທານສະຫະພັນກຳມະບານແຂວງ ໄດ້ໂອ້ລົມຕໍ່ກອງປະຊຸມ ເຊີ່ງທ່ານໄດ້ເໜັ້ນໜັກ ໃຫ້ເອົາໃຈໃສ່ດັ່ງນີ້:
- ໃຫ້ຄະນະຊຸດໃໝ່ເອົາໃຈໃສ່ສຶກສາອົບຮົມວຽກງານການເມືອງແນວຄິດ ໃຫ້ແກ່ສະມາຊິກກຳມະບານ ໃຫ້ມີຄວາມສາມັກຄີໜັກແໜ້ນເຂັ້ມແຂງ ເຊື່ອໝັ້ນຕໍ່ການຊີ້ນຳ-ນຳພາຂອງພັກ-ລັດວາງອອກເປັນແຕ່ລະລາຍໄລຍະ.
- ໃຫ້ສືບຕໍ່ຈັດຕັ້ງຜັນຂະຫຍາຍ ບັນດາເນື້ອໃນເອກະສານນິຕິກຳ ທີ່ກ່ຽວຂ້ອງກັບວຽກງານສະຫະພັນກຳມະບານໃຫ້ແກ່ໜ່ວຍກຳມະບານໃຫ້ກວ້າງຂວາງ ຂະຫຍາຍການຈັດຕັ້ງເພື່ອຮັບເອົາມະຫາຊົນກ້າວໜ້າເຂົ້າເປັນສະມາຊິກກຳມະບານ.
- ສືບຕໍ່ເຄື່ອນໄຫວວຽກງານວິຊາສະເພາະ ປະຕິບັດໜ້າທີ່ຕົນຮັບຜິດຊອບໃຫ້ມີປະສິດທິຜົນ ພ້ອມທັງເຮັດວຽກງານກວດກາຕາມພະລະບົດບາດໃຫ້ມີຄວາມເຂັ້ມແຂງ ແກ້ໄຂບັນດາໜ້າວຽກໃຫ້ທັນຕາມກຳນົດເວລາ.
ກອງປະຊຸມ ໄດ້ດຳເນີນມາເປັນເວລາ 01 ຕອນ ແລະ ໄດ້ປິດລົງໃນເວລາ 12:00ໂມງ ຂອງວັນດຽວກັນ.
