ໃນຕອນບ່າຍ ຂອງ ວັນທີ 11/02/2022 ເວລາ 13 ໂມງ 30 ນາທີ ທີ່ຫ້ອງປະຊຸມໃຫຍ່ຊັ້ນ III ທະນາຄານນະໂຍບາຍ ສາຂາສະຫວັນນະເຂດ ໄດ້ເປີດກອງປະຊຸມໃຫຍ່ ຄັ້ງທີ III ຂຶ້ນ ໂດຍໃຫ້ກຽດເປັນປະທານຂອງ ສະຫາຍ ປອ ພູລຳພອນ ສີຫາວົງ ກຳມະການພັກ ແຂວງ, ເລຂາຄະນະບໍລິຫານງານຊາວໜຸ່ມ ແຂວງສະຫວັນນະເຂດ, ມີ ສະຫາຍ ວໍສຸວັນ ເດດວົງສາ ຮອງເລຂາໜ່ວຍພັກ, ຮອງຫົວໜ້າ ທະນາຄານນະໂຍບາຍ ສາຂາສະຫວັນນະເຂດ, ສະຫາຍ ລັດສະໝີ ວັນສີລາລົມ ເລຂາໜ່ວຍຊາວໜຸ່ມ ທະນາຄານນະໂຍບາຍ ສາຂາສະຫວັນນະເຂດ, ມີບັນດາແຂກທີ່ໄດ້ຖືກເຊີນ ແລະ ຜູ້ແທນສົມບູນ ກໍ່ໄດ້ເຂົ້າຮ່ວມ.
ໃນກອງປະຊຸມ ສະຫາຍ ລັດສະໝີ ວັນສີລາລົມ ກໍ່ໄດ້ຂຶ້ນກ່າວບົດລາຍງານການເມືອງສະຫຼຸບວຽກງານຂອງໜ່ວຍຊາວໜຸ່ມ ທະນາຄານນະໂຍບາຍ ໃນໄລຍະ 05 ປີ ຜ່ານມາ ແລະ ທິດທາງແຜນການໃນຕໍ່ໜ້າ ເຊິ່ງກໍ່ໄດ້ຮັບປະຊາມະຕິເຫັນດີເປັນເອກະພາບຈາກຜູ້ແທນສົມບູນທີ່ໄດ້ເຂົ້າຮ່ວມຈຳນວນ 15 ສະຫາຍ ຍິງ 10 ສະຫາຍ. ຈາກນັ້ນກອງປະຊຸມກໍ່ໄດ້ຜ່ານ ຂໍ້ຕົກລົງມອບຮັບໃບຢັ້ງຢືນຊາວໜຸ່ມຕົວແບບ 04 ບຸກ, ຂໍ້ຕົກລົງມອບທຸງໄຊນຳໜ້າຄັ້ງທີ II, ໃບຍ້ອງຍໍກົມກອງໜ່ວຍຊາວໜຸ່ມ ແລະ ສະມາຊິກຊາວໜຸ່ມຜູ້ທີ່ມີຜົນງານດີເດັ່ນໃນການເຄື່ອນໄຫວວຽກງານໃນໄລຍະຜ່ານມາຈາກເລຂາຄະນະບໍລິຫານງານຊາວໜຸ່ມ ແຂວງສະຫວັນນະເຂດ ປະເພດ ໃບຍ້ອງຍໍ ມີຈໍານວນ 08 ສະຫາຍ ຍິງ 06 ສະຫາຍ, ປະເພດ ໃບຊົມເຊີຍ ມີຈຳນວນ 03 ສະຫາຍ ຍິງ 01 ສະຫາຍ.
ກອງປະຊຸມຄັ້ງນີ້ຍັງໄດ້ເລືອກຕັ້ງເອົາຄະນະໜ່ວຍຊາວໜຸ່ມຊຸດໃໝ່ ໂດຍມີຜູ້ສະໝັກ 05 ສະຫາຍ, ເລືອກເອົາ 03 ສະຫາຍ ເຊິ່ງຈາກຜົນການປ່ອນບັດເລືອກຕັ້ງຈາກຜູ້ແທນສົມບູນທີ່ເຂົ້າຮ່ວມ ຕົກລົງເຫັນດີເລືອກເອົາ ຄື : ສະຫາຍ ພອນທະວີສຸກ ໄຊຍະວົງສາ ເປັນເລຂາໜ່ວຍຊາວໜຸ່ມ, ສະຫາຍ ນ. ໄຊຊະນິດ ໄຊຍະວົງ ເປັນຮອງເລຂາໜ່ວຍຊາວໜຸ່ມ ແລະ ສະຫາຍ ນ. ສຸກສະຫວັນ ວັນນະໄລ ເປັນກຳມະການ ແລະ ທັງເປັນປະທານກວດກາ.
ໃນທີ່ປະຊຸມກໍ່ຍັງໄດ້ຮັບກຽດຈາກ ສະຫາຍ ປອ ພູລຳພອນ ສີຫາວົງ ຂຶ້ນໃຫ້ຄຳໂອ້ລົມແກ່ຄະນະໜ່ວຍຊາວໜຸ່ມຊຸດໃໝ່ ແລະ ສະມາຊິກຊາວໜຸ່ມ ເພື່ອເປັນແນວທາງການປະຕິບັດທິດທາງແຜນການໃນຕໍ່ໜ້າຂອງຕົນໃຫ້ປະກົດຜົນເປັນຈິງຕາມຄາດໝາຍ. ກອງປະຊຸມໄດ້ປິດລົງໃນເວລາ 16 ໂມງ 30 ນາທີ.
ພາບ-ຂ່າວ: ໜັດຊະພົນ ພູທິສານນະລາດ
