ໃນຕອນເຊົ້າວັນອັງຄານທີ 22 ມີນາ 2022 ທະນາຄານນະໂຍບາຍ ສາຂາໄຊສົມບູນ ໄດ້ສຳເລັດເປີດກອງປະຊຸມທາບທາມຄວາມໄວ້ວາງໃຈ ຂອງຄະນະສາຂາທັງ 03 ທ່ານຄື: ທ່ານ ຂັນແກ້ວ ສີບຸນເຮືອງ ວ່າການຫົວໜ້າສາຂາ, ທ່ານ ຕ້ອມພັນທະວົງ ເຄືອມີໄຊ ແລະ ທ່ານ ຄຳພັດ ແກ້ວວິໄລ ຮອງຫົວໜ້າສາຂາ, ພາຍໃຕ້ການເປັນປະທານຂອງ ທ່ານ ແສງເພັດ ດວງພິລາ ຮອງຜູ້ອຳນວຍການ ທະນາຄານນະໂຍບາຍ ພ້ອມດ້ວຍຄະນະຈາກສຳນັກງານໃຫຍ່ ມີພະນັກງານພາຍໃນສຳນັກງານສາຂາ ແລະ ຫົວໜ້າໜ່ວຍບໍລິການອ້ອມຂ້າງເຂົ້າຮ່ວມຢ່າງພ້ອມພຽງ.
ການທາບທາມໃນຄັ້ງນີ້ ແມ່ນໜ້າທີ່ອັນສຳຄັນ ແລະ ມີຄວາມຈໍາເປັນດ້ານໜຶ່ງ ເພື່ອຕິດຕາມປະເມີນການຊີ້ນຳ-ນຳພາ ຂອງຄະນະສາຂາໄລຍະປີ 2021 ຜ່ານມາ ເຊິ່ງ ທ່ານ ຂັນແກ້ວ ສີບູນເຮືອງ ວ່າການຫົວໜ້າສາຂາ ກໍ່ໄດ້ຍົກໃຫ້ເຫັນບັນດາໜ້າວຽກທີ່ສາມາດຈັດຕັ້ງປະຕິບັດໄດ້, ວຽກງານທີ່ຄົງຄ້າງ ແລະ ແຜນຈັດຕັ້ງປະຕິບັດປີ 2022 ຜ່ານການລາຍງານວຽກງານຮອບດ້ານ ຂອງສາຂາໄຊສົມບູນ ແລະ ໜຶ່ງໃນນັ້ນແມ່ນໄດ້ເນັ້ນໜັກວຽກງານສິນເຊື່ອສາມາດສັງລວມໂດຍຫຍໍ້ຄື: ໄດ້ຮັບອະນຸມັດແຫຼ່ງທຶນຈາກສໍານັກງານໃຫຍ່ທັງໝົດຈໍານວນ 13.853.000.000 ກີບ, ປະຕິບັດໄດ້ 11.413.000.000 ກີບ ເທົ່າກັບ 82,38% ຂອງແຜນການ ແລະ ໃນນີ້ໄລຍະສັ້ນ 1.055.000.000 ກີບ, ໄລຍະກາງ 1.120.000.000 ກີບ ແລະ ໄລຍະຍາວ 9.238.000.000 ກີບ, ມີ 52 ບ້ານ, 49 ກຸ່ມ, 335 ຄອບຄົວ, ສັດລ້ຽງ(ງົວ,ໝູ,ແບ້) 1.888ໂຕ.
ຄຽງຄູ່ກັບການປ່ອຍເງິນກູ້ ກໍ່ແມ່ນປະສິດທິຜົນທີ່ຕາມມາຄື ການເກັບຕົ້ນທຶນໄດ້ທັງໝົດຈໍານວນ 10.903.293.000 ກີບ, ເທົ່າກັບ 181,72%, ທຽບໃສ່ແຜນ(6.000.000.000 ກີບ), ໜີ້ປົກກະຕິ(PL) ຈໍານວນ 5.564.849.000 ກີບ ເທົ່າກັບ 173,57 % ທຽບໃສ່ແຜນ(3.206.000.000 ກີບ) ສຳຄັນກວ່ານັ້ນແມ່ນໜີ້(NPL)ໄດ້ຈໍານວນ 5.338.444.000 ກີບ, ເທົ່າກັບ 191,06%, ທຽບໃສ່ແຜນ (2.794.000.000 ກີບ).
ເກັບດອກເບ້ຍໄດ້ທັງໝົດຈໍານວນ 3.832.234.300 ກີບ ເທົ່າກັບ: 101,09% (ຂອງແຜນການ 3.790.602.232 ກີບ), ດອກເບ້ຍປົກກະຕິ 2.078.155.537 ກີບ ເທົ່າກັບ 97,80% ທຽບໃສ່ແຜນການ (2.124.722.784 ກີບ), ດອກເບ້ຍ NPL 1.754.078.763 ກີບ. ເທົ່າກັບ 105,29% ຂອງແຜນການ(1.665.879.449ກີີບ), ດອກເບ້ຍເກີດຂື້ນໃນປີຈໍານວນ 4.419.767,915ກີບ.
ຕໍ່ມາທ່ານ ແສງເພັດ ດວງພິລາ ໄດ້ໃຫ້ກຽດຂຶ້ນມອບທຸງໄຊ ປະເພດໜຶ່ງໃຫ້ ທ່ານ ນາງ ຄຳເມິງ ທຳມະວົງ ຫົວໜ້າໜ່ວຍບໍລິການ ເມືອງທ່າໂທມ ຕາງໜ້າພະນັກງານພາຍໃນໜ່ວຍບໍລິການ ທີ່ສາມາດບຸກບືນສູ້ຊົນຕໍ່ການຈັດຕັ້ງປະຕິບັດວຽກງານຮອບດ້ານ ຈົນຍາດຜົນງານໄລຍະ 01 ປີຜ່ານມາໄດ້, ໂດຍສະເພາະວຽກງານສິນເຊື່ອ ສະແດງອອກເຊັ່ນ: ຍອດສິນເຊື່ອທັງໝົດຈໍານວນ 17,632,319,000 ກີບ, ໃນນັ້ນໄດ້ປ່ອຍສິນເຊື່ອຜ່ານກອງທຶນອົງການຈັດຕັ້ງການເມືອງ-ສັງຄົມ ຈຳນວນ 4 ບ້ານ, ມີ 16 ກຸ່ມ, 91 ຄອບຄົວ, ວົງເງິນທັງໝົດ 1,596,303,000 ກີບ, ຈາກການປ່ອຍກູ້ມີໜີ້ປົກກະຕິ PL = 15,299,387,000 ກີບ ເທົ່າກັບ 86,77%, ໜີ້ NPL = 2,332,932,000 ກີບ ເທົ່າກັບ 13,23% ຂອງຍອດສິນເຊື່ອທັງໝົດ. ປີ 2021 ໄດ້ຮັບແຫຼ່ງທຶນທັງໝົດ 4,015,000,000 ກີບ ປະຕິບັດໄດ້ 3,330,000,000 ກີບ ແລະ ສາມາດເກັບຕົ້ນທຶນໄດ້ = 4,021,397,000 ກີບ ເທົ່າກັບ 257,77 % ຂອງແຜນປີ 1,560,051,580 ກີບ, ເກັບດອກເບ້ຍໄດ້ 1,279,704,597,56 ກີບ ເທົ່າກັບ 125,14 % ຂອງແຜນປີ 1,022,554,045,2 ກີບ ແລະ ມີກຳໄລໃນປີ 1,049,825,037,75 ກີບ.
ໃນທ້າຍວາລະກອງປະຊຸມທ່ານ ແສງເພັດ ດວງພິລາ ໄດ້ນຳເນື້ອໃນຈິດໃນຂອງກອງປະຊຸມປະຈໍາປີທົ່ວລະບົບ ໃຫ້ສາຂາ ແລະ ບັນດາໜ່ວຍບໍລິການ ເອົາໃຈໃສ່ຕໍ່ວຽກງານຮອບດ້ານຕື່ມ ດັ່ງນີ້:
– ສືບຕໍ່ສຶກສາອົບຮົມການເມືອງ-ແນວຄິດ ໃຫ້ສະມາຊິກພັກ-ພະນັກງານ ມີແນວຄິດອຸ່ນອຽນທຸ່ນທ່ຽງ, ເຊື່ອໝັ້ນຕໍ່ການນໍາພາຂອງພັກ-ລັດ, ມີຄວາມເປັນແບບຢ່າງ, ມີຄວາມຫ້າວຫັນ ແລະ ປະຕິບັດໜ້າທີ່ວຽກງານມີຄວາມຮັບ ຜິດຊອບສູງກວ່າເກົ່າ.
– ສືບຕໍ່ແກ້ໄຂບັນຫາໜີ້ສິນກາຍສັນຍາ, ດອກເບ້ຍຄ້າງຮັບໃຫ້ມີທ່າອ່ຽງຫຼຸດລົງ ແລະ ສຸມໃສ່ປະເມີນປະສິດທິຜົນສິນເຊື່ອໃຫ້ສໍາເລັດຕາມກໍານົດເວລາ.
– ຊຸກຍູ້ ແລະ ຊອກຫາທ່າແຮງ ໃນການຂະຫຍາຍຍອດສິນເຊື່ອໃຫ້ສູງຂຶ້ນກວ່າເກົ່າ ພ້ອມທັງຮັບປະກັນປະສິດ ທິພາບ ແລະ ປະສິດທິຜົນຂອງສິນເຊື່ອ.
– ເອົາໃຈໃສ່ໃນການບົວລະບັດຮັກສາຄວາມສະອາດສໍານັກງານຫ້ອງການ, ຫໍພັກພະນັກງານ ແລະ ພາຫະນະຮັບໃຊ້ໃຫ້ສາມາດໃຊ້ງານໄດ້ເປັນປົກກະຕິ.
– ເພີ່ມທະວີໃນຂອດການປະສານງານລະຫວ່າງໜ່ວຍບໍລິການກັບສາຂາ ໃຫ້ມີຄວາມສອດຄ່ອງ, ເຂົ້າໃຈ ແລະ ສາມາດຈັດຕັ້ງປະຕິບັດໄປລວງດຽວກັນ ແລະ ສໍາເລັດຕາມແຜນການກຳນົດໄວ້.
– ສືບຕໍ່ປະສານສົມທົບກັບອໍານາດການປົກຄອງຂັ້ນບ້ານ, ເມືອງ ໃຫ້ເປັນປົກກະຕິຕໍ່ເນື່ອງ ໂດຍສະເພາະວຽກອົງການຈັດຕັ້ງມະຫາຊົນ ແລະ ວຽກງານວິຊາສະເພາະ.
– ຈັດຕັ້ງປະຕິບັດວຽກງານຄວາມສະຫງົບໃນຂອບເຂດຄວາມຮັບຜິດຊອບຂອງຕົນ ແລະ ຮັກສາຄວາມສາມັກຄີພາຍໃນໃຫ້ໜັກແໜ້ນ ພ້ອມທັງພະຍາຍາມຕ້ານ ແລະ ສະກັດກັ້ນບໍ່ໃຫ້ເກີດມີປະກົດການຫຍໍ້ຕ່າງໆເກີດຂຶ້ນ.
ກອງປະຊຸມໄດ້ປິດລົງ ເວລາ 11:30 ຂອງວັນດຽວກັນ
ຖ່າຍພາບ ແລະ ຂຽນຂ່າວໂດຍ: ທ່ານ ວິລະຫັດ ສົມມະລີ
