ທະນາຄານ ນະໂຍບາຍ ສາຂາ ຊຽງຂວາງ ຈັດພິທີມອບ – ຮັບແຫຼ່ງທຶນສິນເຊື່ອຜ່ານອົງການຈັດຕັ້ງການເມືອງ-ສັງຄົມ ( ອກສກ) ບ້ານພັ້ນ ເມືອງແປກ ແຂວງ ຊຽງຂວາງ

ທະນາຄານ ນະໂຍບາຍ ສາຂາ ຊຽງຂວາງ ຈັດພິທີມອບ - ຮັບແຫຼ່ງທຶນສິນເຊື່ອຜ່ານອົງການຈັດຕັ້ງການເມືອງ-ສັງຄົມ ( ອກສກ) ບ້ານພັ້ນ ເມືອງແປກ ແຂວງ ຊຽງຂວາງ

     ໃນຕອນເຊົ້າຂອງວັນທີ 14 ກັນຍາ 2020 ຢູ່ທີ່ຫ້ອງປະຊຸມໃຫ່ຍຊັ້ນ 3 ທະນາຄານ ນະໂນບາຍສາຂາ ຊຽງຂວາງ ໄດ້ມີພິທີມອບ – ຮັບແຫຼ່ງທຶນສິນເຊື່ອປີ 2020 ຜ່ານອົງການຈັດຕັ້ງການເມືອງ – ສັງຄົມ ຂື້ນຢ່າງເປັນທາງການ ໂດຍພາຍໃຕ້ການເປັນປະທາານຂອງທ່ານ ບຸນເລີດ ກົມມະຈັນ ຫົວໜ້າຫ້ອງການກະສິກຳ-ປ່າໄມ້ເມືອງແປກ ຄະນະກຳມະການຄຸ້ມຄອງສິນເຊື່ອຂັ້ນເມືອງ; ເຂົ້າຮ່ວມມີທ່ານ ບຸນສະຫຼອງ ໂພທິລາດ ຫົວໜ້າ ທນບ ສາຂາຊຽງຂວາງ, ມີຄະນະສາຂາ, ຄະນະຂະແໜງພາຍໃນ ສາຂາ, ມີຄະນະບ້ານ-ບ້ານພັ້ນ, ປະທານຄະນະກຳມະການຄຸ້ມຄອງສິນເຊື່ອ ອົງການຈັດຕັ້ງການເມືອງ-ສັງຄົມແລະ ກອງທຶນບ້ານ, ພ້ອມດ້ວຍພະນັກງານ ສາຂາ ແລະ ພໍ່ແມ່ປະຊາຊົນເຂົ້າຮ່ວມຢ່າງພ້ອມພຽງ.

      ໃນພິທີ ປະທານກອງປະຊຸມກໍ່ໄດ້ໃຫ້ກຽດຂື້ນກ່າວເປີດຈຸດປະສົງຂອງ ກອງປະຊຸມ ແລະ ຊີ້ນຳກອງປະຊຳຢ່າງເປັນທາງການ.

     ຈາກນັ້ນ ທ່ານສົມພານ ຍວນມາ ຮອງຫົວໜ້າສາຂາ ຜູ້ຊີ້ນຳວຽກງານສິນເຊື່ອ ກໍ່ໄດ້ໃຫ້ກຽດຂື້ນຜ່ານສັນຍາມອບສິດກ່ຽວກັບການປ່ອຍເງິນກູ້ ຜ່ານ ອກສກ ໃຫ້ປະຊາຊົນທີ່ເປັນສະມາຊິກກອງທຶນບ້ານ ແລະ  ນະໂຍບາຍອື່ນໆ ເພື່ອໃຫ້ຄະນະບ້ານ, ຄະນະອົງການ ຈັດຕັ້ງການເມືອງ ແລະ ກອງທຶນບ້ານ ພ້ອມດ້ວຍພໍ່ແມ່ປະຊາຊົນຮັບຮູ້ ແລະ ເຂົ້າໃຈຕໍ່ກັບເນື້ອໃນສັນຍາມອບສິດ ດັ່ງກ່າວ. ຫຼັງຈາກນັ້ນກໍ່ໄດ້ມີການເຊັນສັນຍາມອບສິດລະຫວ່າງ ທະນາຄານນະໂຍບາຍ ສາຂາຊຽງຂວາງ ແລະ ອົງການ ຈັດຕັ້ງການເມືອງ-ສັງຄົມ ແລະ ກອງທຶນບ້ານ ໂດຍຝ່າຍ ທນບ ແມ່ນທ່ານ ບຸນສະຫຼອງ ໂພທິລາດ ຫົວໜ້າ ທນບ ສາຂາຊຽງຂວາງ  ແລະ ຝ່າຍກອງທຶນບ້ານແມ່ນ ທ່ານ ວົງສັກ ມິດຕະພອນ ປະທານກອງທຶນບ້ານ ຕາງໜ້າອົງການຈັດຕັ້ງການເມືອງ – ສັງຄົມ ແລະ ກອງທຶນບ້ານ ພັ້ນ ໂດຍຊ້ອງໜ້າປະທານ ຄະນະປະທານ, ຄະນະບ້ານ ແລະ ພໍ່ແມ່ປະຊາຊົນບ້ານ ພັ້ນ ເມືອງ ແປກ ແຂວງ ຊຽງຂວາງ.

        ຫຼັງຈາກນັ້ນ ທ່ານ ບຸນສະຫຼອງ ໂພທິລາດ ຫົວໜ້າ ທນບ ສາຂາຊຽງຂວາງ ກໍ່ໄດ້ໃຫ້ກຽດມີຄຳເຫັນໂອ້ລົມຕໍ່ກອງປະຊຸມ ເຊີ່ງກ່ອນອື່ນທ່ານໄດ້ຕີລາຄາສູງ ຕໍ່ກັບກະກຽມປ່ອຍເງິນກູ້ຜ່ານອົງການຈັດຕັ້ງການເມືອງ – ສັງຄົມ ແລະ ກອງທຶນບ້ານໃນຄັ້ງນີ້ເຊີ່ງເປັນຄັ້ງທຳອິດຂອງ ສາຂາ ຊຽງຂວາງ, ເພື່ອເຮັດໃຫ້ການຄຸ້ມຄອງ ບໍລິຫານສິນເຊື່ອໃຫ້ມີຄຸນນະພາບ ແລະ ມີປະສິດທິຜົນສູງ ອໍານາດການປົກຄອງຕ້ອງມີສ່ວນຮ່ວມນຳກັນ ແລະ ຂະແໜງການກ່ຽວຂ້ອງ ໂດຍສະເພາະການສະໜອງສິນເຊື່ອ ຜ່ານອົງການຈັດຕັ້ງການເມືອງ-ສັງຄົມແບບໃຫມ່ ໂດຍການນໍາໃຊ້ບົດຮຽນທີ່ມີຜົນສໍາເລັດຈາກທະນາ ຄານນະໂຍບາຍ ສັງຄົມຫວຽດນາມ ໂດຍມີການມອບສິດໃຫ້ອໍານາດການປົກຄອງ ແລະ ຄະນະກໍາມະການຄຸ້ມຄອງສິນເຊື່ອປະຕິບັດ, ພ້ອມດຽວກັນນີ້ທ່ານຍັງໄດ້ເໜັ້ນໜັກໃຫ້ຄະນະອົງການຈັດຕັ້ງດັ່ງກ່າວຈົ່ງເອົາໃຈໃສ່ໃນການຈັດຕັ້ງປະຕິບັດຕາມສິດ ໜ້າທີ່ ແລະ ພາລະບົດບາດຂອງຕົນໃຫ້ມີຜົນສຳເລັດເປັນຢ່າງດີ ແລະ ຮຽກຮ້ອງມາຍັງພໍ່ແມ່ປະຊາຊົນຜູ້ທີ່ໄດ້ຮັບແຫລ່ງທຶນດັ່ງກ່າວ ຈົ່ງພ້ອມກັນຈັດຕັ້ງປະຕິບັດການນຳໃຊ້ເງິນກູ້ໃຫ້ຖຶກຕ້ອງຕາມເປົ້າໝາຍ ແລະ ເອົາໃຈໃສ່ເບີ່ງແຍງດູແລຮັກສາສັດລ້ຽງ,  ຜູ້ກູ້ຢືມມີສ່ວນຮ່ວມກໍ່ຄືປັດໃຈພື້ນຖານການຜະລິດ : ມີສວນຫຍ້າພຽງພໍ ຫລື ປູກຫຍ້າເພີ້ມ, ເຮັດຮົ້ວ​ອ້ອມ, ເຮັດຄອກ​ສັດ ອື່ນໆ…  ພາຍຫລັງທີ່ໄດ້ຮັບແຫລ່ງທຶນໄປ ຕ້ອງໃຫ້ຄວາມຮ່ວມມື ກັບຄະນະກຳມະການຂັ້ນບ້ານ ເອົາໃຈໃສ່ປະຕິບັດບຽບການກູ້ຢືມຕາມສັນຍາຢ່າງເຂັ້ມງວດ.

         ໃນຕອນທ້າຍກອງປະຊຸມທ່ານ ບຸນເລີດ ກົມມະຈັນ ປະທານກອງປະຊຸມກໍ່ໄດ້ມີຄຳເຫັນຕໍ່ກອງປະຊຸມ ໂດຍທ່ານໄດ້ຮຽກຮ້ອງໃຫ້ຄະນະນຳຂອງບ້ານທຸກຂັ້ນຈົ່ງເອົາໃຈໃສ່ໃກ້ສິດຕິດແທດ ພ້ອມທັງຊຸກຍູ້, ຕິດຕາມໃນການນຳໃຊ້ເງິນກູ້ ແລະ ນຳໃຊ້ເຕັກນິກການປູກຝັງ-ລຽ້ງສັດໃຫ້ພໍ່ແມ່ປະຊາຊົນຜູ້ທີ່ໄດ້ຮັບແຫຼ່ງທຶນດັ່ງກ່າວໃຫ້ໄດ້ຮັບຜົນສຳເລັດເປັນຢ່າງດີ. ຮຽກຮ້ອງມາຍັງພໍ່ແມ່ປະຊາຊົນທຸກຄົນຈົ່ງພ້ອມກັນເອົາໃຈໃສ່ປະຕິບັດລະບຽບຂອງ ທນບ ຢ່າງເຂັ້ມງວດ ແລະ ພ້ອມກັນເອົາໃຈໃສ່ເຮັດສຳ ເລັດໃນການບໍລິຫານທຶນດັ່ງກ່າວໃຫ້ມີປະສິດຕິພາບ ເພື່ອເຮັດໃຫ້ທຸກຄອບຄົວຫຼຸດພົ້ນອອກຈາກຄອບຄົວທຸກຍາກຕາມແນວທາງຂອງພັກ. ຈາກນັ້ນທ່ານກໍ່ໄດ້ກ່າວປິດກອງປະຊາມຢ່າງເປັນທາງການ.