ຕອນເຊົ້າວັນທີ 09 ກັນຍາ 2021 ເວລາ 8:15 ນາທີ ທະນາຄານນະໂຍບາຍ ສາຂາ ຫຼວງນ້ຳທາ ໄດ້ເປີດກອງປະຊຸມ ຂື້ນທີ່ຫ້ອງປະຊຸມໃຫຍ່ ຊັ້ນ III ຫ້ອງການທະນາຄານນະໂຍບາຍ ສາຂາ ຫຼວງນ້ຳທາ, ພາຍໃຕ້ການເປັນປະທານຂອງ ທ່ານ ວຸດທິ ເລື່ອນວິໄລວົງ ຜູ້ອຳນວຍການ ທະນາຄານນະໂຍບາຍ ຜູ້ເຂົ້າຮ່ວມມີ ຫົວໜ້າພະແນກຈັດຕັ້ງພະນັກ ງານ ທນບ ສຳນັກງານໃຫຍ່, ຄະນະສາຂາ, ຮອງຫົວໜ້າຂະແໜງພົວພັນຕ່າງປະເທດ ສຳນັກງານໃຫຍ່, ຄະນະຂະແໜງ ເຂົ້າຮ່ວມທັງໝົດ 12 ທ່ານ ຍີງ 4 ທ່ານ.
ກອງປະຊຸມ ທ່ານ ສີຟອງ ແກ້ວກົງຕາ ຮັກສາການຫົວໜ້າສາຂາ ໄດ້ຜ່ານສະຫຼຸບລາຍງານການເຄື່ອນໄຫວວຽກງານຮອບດ້ານ ປະຈຳ 8 ເດືອນຕົ້ນປີ 2021 ແລະ ວາງທິດທາງແຜນການ 4 ເດືອນທ້າຍປີ 2021 ໂດຍຫຍໍ້. ຈາກນັ້ນ, ທ່ານຮັກສາການຫົວໜ້າສາຂາ ຍັງໄດ້ລາຍງານຜົນການທາບທາມຄວາມໄວ້ວາງໃຈ 6 ເດືອນຕົ້ນປີ 2021 ຕໍ່ຄະນະຂະແໜງການ ແລະ ຜູ້ກ່ຽວຂ້ອງໄດ້ປະກອບຄຳຄິດຄຳເຫັນຊີ້ແຈງຕໍ່ຫາງສຽງການທາບທາມຄວາມໄວ້ວາງໃຈ ພ້ອມທັງຍອມຮັບນຳເອົາໄປປັບປຸງໃຫ້ດີຂື້ນ.
ຕອນທ້າຍກອງປະຊຸມ ທ່ານ ຜູ້ອຳນວຍການ ທະນາຄານນະໂຍບາຍ ໄດ້ໃຫ້ກຽດຄຳໂອ້ລົມແກ່ພະນັກງານ ໂດຍໃຫ້ພະນັກງານເອົາໃຈໃສ່ສຶກສາອົບຮົມການເມືອງແນວຄິດໃຫ້ມີທັດສະນະຄຸນທາດການເມືອງໜັກແໜ້ນ ເພື່ອຈັດຕັ້ງຜັນຂະຫຍາຍທິດຊີ້ນຳຂອງຂັ້ນເທີງ. ເອົາໃຈໃສ່ໃນການປະຕິບັດວຽກງານວິຊາສະເພາະໃຫ້ໄປຕາມນິຕິກຳ, ແຈ້ງການ, ບົດແນະນຳ ຂອງ ສຳນັກງານໃຫຍ່ວາງອອກຢ່າງເຂັ້ມງວດ, ເອົາໃຈໃສ່ກວດກາສະກັດກັ້ນແກ້ໄຂໜີ້ທີ່ຈະເກີດຂື້ນຈາກ ງວດຊຳລະຕົ້ນທືນ ແລະ ດອກເບ້ຍ ໃນລະບົບຄໍ ໃນນີ້ໃຫ້ເອົາໃຈໃສ່ຈັດຕັ້ງປະຕິບັດປັບປຸງໂຄງສ້າງໜີ້ຕາມ 5 ເງື່ອນໄຂ ເພື່ອນຳສະເໜີແກ້ໄຂໃຫ້ທັນສະພາບ, ທົບທວນຄືນລະບົບການສ່ອງແສງລາຍງານປະຈຳທິດ ປະຈຳເດືອນ ໃຫ້ເປັນປົກກະຕິ, ດ້ານວຽກງານວິຊາສະເພາະໂດຍເໜັ້ນໜັກ ດ້ານວຽກງານສີນເຊື່ອບັນຫາໜີ້ຄົງຄ້າງ ໜີ້ NPL ຕ້ອງສ້າງແຜນແກ້ໄຂໜີ້ ຕາມແຈ້ງການເລກທີ 37/ທນບ ພ້ອມແບ່ງຄວາມຮັບຜິດຊອບໃຫ້ຄະນະກຳມະການຢ່າງຊັດເຈນ, ວຽກງານ ອກສກ ເອົາໃຈໃສ່ກວດກາຕິດຕາມການເກັບໜິ້ສີນເປັນປະຈຳເດືອນບໍ່ໃຫ້ກາຍເວລາທີ່ກຳນົດໄວ້ ພ້ອມກັນນັ້ນໃຫ້ປະຕິບັດຕາມຂັ້ນຕອນຢ່າງເຂັ້ມງວດ ເພື່ອຄິດໄລ່ເງິນບຳເນັດ 0.05% ຕາມການເກັບດອກເບ້ຍຂອງຕົ້ນທືນທັງໝົດໃນເດືອນ, ການປ່ອຍເງິນກູ້ ຕ້ອງໄດ້ເອົາໃຈໃສ່ກວດກາການເອົາຂໍ້ມູນລູກຄ້າ ກວດກາກ່ອນ ແລະ ຫຼັງການປ່ອຍສີນເຊື່ອ ໃຫ້ຖືກຕ້ອງຕາມລະບຽບ, ນອກນັ້ນ ທ່ານ ຜູ້ອຳນວຍການ ຍັງໄດ້ເໜັ້ນໃຫ້ຕ້ານປະກົດການຫຍໍ້ທໍ້ທີ່ຈະເກີດຂື້ນໃນຖັນແຖວພະນັກງານ, ໃຫ້ສືບຕໍ່ເຄື່ອນໄຫວຈັດຕັ້ງປະຕິບັດວຽກພັກ ວຽກອົງການຈັດຕັ້ງມະຫາຊົນໃຫ້ເປັນປົກກະຕິ, ໃຫ້ມີຄວາມສາມັກຄີຊ່ວຍເຫຼືອເຊີ່ງກັນ ແລະ ກັນໃນທຸກດ້ານ.
ກອງປະຊຸມໄດ້ປິດລົງ ເວລາ 11:30 ນາທີ ຂອງວັນດຽວກັນ.
