ພາບຂ່າວໂດຍ: ທ່ານ ສົມສັກ ລັກຊີວີ
ກອງປະຊຸມ ຄະນະກໍາມະການຄຸ້ມຄອງສິນເຊື່ອຂັ້ນແຂວງ ໄຊຍະບູລີ ສະຫຼຸບການເຄື່ອນໄຫວວຽກງານສິນເຊື່ອ ປະຈໍາປີ 2021 ແລະ ຮັບຮອງແຜນສິນເຊື່ອ ປີ 2022 ທະນາຄານ ນະໂຍບາຍ ສາຂາແຂວງ ຫຼວງພະບາງ ໄດ້ຈັດຂຶ້ນໃນວັນທີ 12 ເມສາ ປີນີ້, ທີ່ສະໂມສອນຫ້ອງວ່າການແຂວງ ໄຊຍະບູລີ, ເຂົ້າຮ່ວມເປັນກຽດມີ ທ່ານ ສົມຈິດ ຈັນທະວົງ ຮອງເຈົ້າແຂວງ ໄຊຍະບູລີ, ມີທ່ານ ສອນໄຊ ຮຸ່ງວິໄລ ຕາງໜ້າທະນາຄານແຫ່ງ ສປປລາວ ສາຂາພາກເໜືອ, ມີຮອງເຈົ້າເມືອງ ແລະ ຫົວໜ້າໜ່ວຍບໍລິການ ທະນາຄານ ນະໂຍບາຍເຂົ້າຮ່ວມ.
ໃນກອງປະຊຸມ ທ່ານ ຄໍາພັນ ແສນຄໍາ ຫົວໜ້າ ທະນາຄານ ນະໂຍບາຍ ສາຂາແຂວງ ຫຼວງພະບາງ ໄດ້ກ່າວວ່າ: ທະນາຄານ ນະໂຍບາຍ ສາຂາແຂວງ ຫຼວງພະບາງມີຂອບເຂດຄວາມຮັບຜິດຊອບເຄື່ອນໄຫວຢູ່ 2 ແຂວງຄື: ແຂວງ ຫຼວງພະບາງ ແລະ ແຂວງ ໄຊຍະບູລີ, ປະກອບມີ 9 ໜ່ວຍບໍລິການທີ່ຂຶ້ນກັບ, ເຄື່ອນໄຫວຢູ່ 22 ເມືອງ, 1 ນະຄອນ, ສະເພາະຢູ່ແຂວງ ໄຊຍະບູລີ ມີໜ່ວຍບໍລິການຢູ່ 4 ເມືອງຄື: ເມືອງ ໄຊຍະບູລີ, ເມືອງ ຊຽງຮ່ອນ, ເມືອງ ໄຊສະຖານ ແລະ ເມືອງ ທົ່ງມີໄຊ, ຍອດສິນເຊື່ອທັງໝົດຮອດທ້າຍປີ 2021 ຈໍານວນ 132,47 ຕື້ກວ່າກີບ, ໃນນີ້ຍອດສິນເຊື່ອລາຍບຸກຄົນ 9,02 ຕື້ກວ່າກີບ, ຍອດສິນເຊື່ອລາຍກຸ່ມ 123,45 ຕື້ກວ່າກີບ, ແຫຼ່ງທຶນທີ່ໄດ້ຮັບໃນປີ 2021 ມີຈໍານວນ 6,41 ຕື້ກີບ, ໃນນັ້ນມີທຶນໄລຍະສັ້ນ 260 ລ້ານກີບ, ໄລຍະກາງ 800 ລ້ານກີບ ແລະ ໄລຍະຍາວ 5,35 ຕື້ກີບ, ຜ່ານມາສາມາດປ່ອຍສິນເຊື່ອໄດ້ທັງໝົດ 3,02 ຕື້ກວ່າກີບ, ມີເປົ້າໝາຍລ້ຽງໝູ(ທຶນໄລຍະສັ້ນ) 1 ກຸ່ມ ມີ 6 ຄອບຄົວ ວົງເງິນ 135 ລ້ານກີບ, ລ້ຽງງົວ(ທຶນໄລຍະຍາວ) ຈໍານວນ 20 ກຸ່ມ ມີ 133 ຄອບຄົວ, ວົງເງິນ 2,89 ຕື້ກີບ, ຕອນທ້າຍຂອງກອງປະຊຸມ ທ່ານ ສົມຈິດ ຈັນທະວົງ ຮອງເຈົ້າແຂວງ ກໍ່ໄດ້ໃຫ້ກຽດໂອ້ລົມ ພ້ອມທັງໄດ້ຮຽກຮ້ອງໃຫ້ທະນາຄານດັ່ງກ່າວຈົ່ງສືບຕໍ່ເອົາໃຈໃສ່ຂອດປະສານງານກັບພາກສ່ວນທີ່ກ່ຽວຂ້ອງໃຫ້ເປັນລະບົບຕໍ່ເນື່ອງ, ສືບຕໍ່ກະຕຸກຊຸກຍູ້ ແລະ ປັບປຸງຂອດພະນັກງານ ໂດຍການສືກສາອົມຮົມການເມືອງແນວຄິດໃຫ້ເປັນພະນັກງານທີ່ມີຄຸນສົມບັດ, ມີຄວາມສາມາດ, ມີຄວາມໂປ່ງໃສ, ສື່ສັດບໍລິສຸດ ແລະ ຫັນເປັນທັນສະໄໝ, ເອົາໃຈໃສ່ຕິດຕາມຢ່າງໃກ້ສິດກັບປະຊາຊົນທີ່ໄດ້ຮັບສິນເຊື່ອ, ສືບຕໍ່ແກ້ໄຂບັນຫາໜີ້ສີນທີ່ຍັງຄົງຄ້າງ, ຊອກໃຫ້ເຫັນຈຸດອ່ອນ ແລະ ສາເຫດທີ່ພາໃຫ້ມີໜີ້ສິນ ຫຼື ເກັບເງິນຄືນບໍ່ໄດ້.
