ຕອນເຊົ້າເວລາ 08:30 ໂມງ ຂອງວັນທີ 24 ມີນາ 2022 ຢູ່ທີ່ຫ້ອງປະຊຸມຫ້ອງວ່າການແຂວງບໍ່ແກ້ວ ໄດ້ເປີດກອງປະຊຸມສະຫຼຸບການເຄື່ອນໄຫວວຽກງານປະຈຳປີ 2021 ແລະ ທິດທາງແຜນການ ປີ 2022 ໂດຍພາຍໃຕ້ການເປັນປະທານຂອງ ທ່ານ ເຄື່ອນເພັດ ວົງຈັນ ກໍາມະການປະຈຳພັກແຂວງ ຮອງເຈົ້າແຂວງ ແຂວງບໍ່ແກ້ວ, ເປັນກຽດເຂົ້າຮ່ວມໂດຍ ທ່ານ ສຸພົດ ໂຊກປະຫວັດ ຮອງຜູ້ອຳນວຍການທະນາຄານນະໂຍບາຍ, ທ່ານ ພອນສະຫວັນ ຄຳພາວົງ ຮອງຫົວໜ້າສາຂາ ທະນາຄານແຫ່ງ ສປປ ລາວ ສາຂາພາກເໜືອ ແຂວງອຸດົມໄຊ, ບັນທ່ານຄະນະກຳມະການຄູ້ມຄອງສິນເຊື່ອຂັ້ນແຂວງ, ປະທານຄະນະກຳມະການສິນເຊື່ອຂັ້ນເມືອງ, ຫົວໜ້າສາຂາ, ຮອງຫົວໜ້າສາຂາ ທນບ ສາຂາຫຼວງນໍ້າທາ, ແລະ ພະນັກງານພາຍໃນ ທນບ ເຂົ້າຮ່ວມທັງໝົດ 25 ທ່ານ.
ກອງປະຊຸມ ທ່ານສີຟອງ ແກ້ວກົງຕາ ຫົວໜ້າທະນາຄານນະໂຍບາຍ ສາຂາຫຼວງນ້ຳທາ ໄດ້ນຳສະເໜີຜ່ານບົດສະຫຼຸບການເຄື່ອນໄຫວຈັດຕັ້ງປະຕິບັດວຽກງານສິນເຊື່ອປະຈຳປີ 2021 ແລະ ທິດທາງແຜນການປີ 2022 ເຊິ່ງຍົກໃຫ້ເຫັນຜົນງານພົ້ນເດັ່ນ, ດ້ານອ່ອນ ແລະ ຂໍ້ຄົງຄ້າງ, ບົດຮຽນທີ່ຖອດຖອນໄດ້ ແລະ ທິດທາງແກ້ໄຂໃນຕໍ່ໜ້າ ໂດຍສະເພາະການແກ້ໄຂໜີ້ NPL ແລະ ດອກເບ້ຍຄ້າງຮັບ.
ກອງປະຊຸມ ທ່ານ ນິຄົມ ບັນນະວົງ ຮອງຫົວໜ້າ ທະນາຄານນະໂຍບາຍ ສາຂາ ຫຼວງນໍ້າທາ ໄດ້ຜ່ານບົດສະຫຼຸບການຈັດຕັ້ງປະຕິບັດປ່ອຍສິນເຊື່ອປະຈຳປີ 2021 ແລະ ຜ່ານແຜນຄວາມຕ້ອງການທືນປະຈຳປີ 2022 ທົ່ວແຂວງບໍ່ແກ້ວ ຈຳນວນ 14.405.000.000 ກີບ, ຈຳນວນ 5 ເມືອງຄື: ເມືອງ ຫ້ວຍຊາຍ ຈຳນວນ: 1,0 ຕື້ກີບ, ເມືອງຕົ້ນເຜີ້ງ0,150 ກີບ, ເມືອງເມີງ ຈຳນວນ: 5,0 ຕື້ກີບ, ເມືອງ ຜາອຸດົມ ຈຳນວນ: 6,255 ຕື້ກີບ ແລະ ເມືອງ ປາກທາ ຈໍານວນ: 2,0 ຕື້ກີບ, ມີທັງໝົດ 64 ບ້ານ, ບ້ານທຸກ 5 ບ້ານ, ມີ 103 ກຸ່ມຜະລິດ, ມີ 591 ຄອບຄົວ. ເປັນແຫຼ່ງທຶນເມືອງເປົ້າ ໝາຍຈຳນວນ: 11,760 ຕື້ກີບ, ຈຸດສຸມ: 0,790 ຕື້ກີບ, ສາມສ້າງ:1,855 ຕື້ກີບ.
ກອງປະຊຸມ ໄດ້ຮັບຟັງການປະກອບຄຳຄິດຄຳເຫັນ ຂອງບັນດາທ່ານຜູ້ເຂົ້າຮ່ວມກອງປະຊຸມຢ່າງກົງໄປກົງມາ ແລະ ໄດ້ເຫັນດີເປັນເອກະພາບຮັບຮອງເອົາບົດສະຫຼຸບການເຄື່ອນໄຫວວຽກງານສິນເຊື່ອປະຈຳປີ 2021 ແລະ ຮັບຮອງເອົາແຜນສິນເຊື່ອປະຈຳປີ 2022 ທົ່ວແຂວງບໍ່ແກ້ວ.
ຕອນທ້າຍກອງປະຊຸມ ທ່ານ ຮອງເຈົ້າແຂວງ ປະທານກອງປະຊຸມ ຍັງໄດ້ໃຫ້ກຽດໂອ້ລົມຕໍ່ກອງປະຊຸມ ເຊີ່ງທ່ານໄດ້ສະແດງຄວາມຍ້ອງຍໍຊົມເຊີຍຕໍ່ກັບຜົນງານທີ່ຍາດມາໄດ້ໃນໄລຍະຜ່ານມາ ພ້ອມນັ້ນຍັງໃຫ້ທິດຊີ້ນຳເນື້ອໃນບາງດ້ານຄື: ເຫັນດີ ແລະ ຊົມເຊີຍຕໍ່ຜົນສຳເລັດ ການເຄື່ອນໄຫວຈັດຕັ້ງປະຕິບັດວຽກງານສິນເຊື່ອຂອງທະນາຄານໃນໄລຍະ 1 ປີ 2021 ແລະ ທິດທາງແຜນການປີ2022. ເຊີ່ງສະແດງອອກທາງດ້ານການສະໜອງສິນເຊື່ອໄດ້ເຂົ້າເຖີງປະຊາຊົນບັນ ດາເຜົ່າເມືອງທຸກຍາກ, ຈຸດສຸມ, ສາມສ້າງ ເຮັດໃຫ້ເກີດມີການຜະລິດສິນຄ້າແລກປ່ຽນຊື້-ຂາຍ, ມີລາຍຮັບ ປັບປຸງຊີວິດການເປັນຢູ່ທີ່ດີຂື້ນ, ສາມາດຊຳລະໜີ້ໄດ້ເປັນສ່ວນໃຫ່ຍໜີ້ NPL ບາງເມືອງມີທ່າຫຼຸດລົງ, ຂະນະດຽວກັນ ກໍ່ຍັງມີຂໍ້ຄົງຄ້າງທີ່ຕ້ອງສຶບຕໍ່ດຳເນີນການແກ້ໄຂຄື : ໜີ້ຄົບກຳນົດ, ໜີ້NPL ແລະ ດອກເບ້ຍຄ້າງຮັບທີ່ມີທ່າອ່ຽງເພີ່ມຂື້ນ, ເອົາໃຈໃສ່ຂອດການປະສານງານລະຫວ່າງ ທະນາຄານ ແລະ ຫ້ອງການທີ່ກ່ຽວຂ້ອງຂັ້ນເມືອງ, ເອົາໃຈໃສ່ເປັນເຈົ້າການປິ່ນອ້ອມໃນການລົງແກ້ໄຂໜີ້ສິນຂອງແຕ່ລະເມືອງໃຫ້ແຂງແຮງກວ່າເກົ່າ. ພ້ອມກັນນັ້ນ, ຂະແໜງການກ່ຽວຂ້ອງກໍ່ຕ້ອງໄດ້ລົງໃກ້ສິດຕິດແທດກຸ່ມການຜະລິດຊ່ວຍທະນາຄານຕື່ມອີກ. ກອງປະຊຸມໄດ້ດຳເນີນໄປ ເປັນເວລາ 01 ຕອນ ແລະ ໄດ້ປິດລົງໃນເວລາ 12:00 ໂມງ ຂອງວັນດຽວກັນ.
