ທ່ານ ນາງ ຂັນແກ້ວ ຫຼ້າມະນີເງົາ ຮອງຜູ້ວ່າການ ທະນາຄານແຫ່ງ ສປປ ລາວ, ຮອງປະທານສະພາບໍລິຫານ ທະນາຄານະໂຍບາຍ, ຮ່ວມກັບຄະນະສາຂາທະນາຄານແຫ່ງ ສປປ ລາວ ປະຈຳພາກ ( ສາຂາ ຫຼວງພະບາງ ແລະ ສາຂາ ອຸດົມໄຊ ) ໄດ້ລົງເຄື່ອນໄຫວຊຸກຍູ້ວິຊາສະເພາະຢູ່ ທະນາຄານນະໂຍບາຍ ສາຂາຫຼວງພະບາງ ແລະ ສາຂາອຸດົມໄຊ ໃນລະຫວ່າງວັນທີ 25-26 ພຶດສະພາ 2023 ຜ່ານມາ, ໂດຍມີ ທ່ານ ຄໍາອົ້ນ ຈັນສຸລິມາດ ຮອງຜູ້ອໍານວຍການ, ຄະນະພະແນກ, ຄະນະສາຂາ ພະນັກງານ ທະນາຄານນະໂຍບາຍທັງ 02 ສາຂາ ໃຫ້ການຕ້ອນຮັບ.
ໃນໂອກາດດັ່ງກ່າວ ທ່ານ ໄດ້ຮັບຟັງການລາຍງານສະພາບການຈັດຕັ້ງປະຕິບັດວຽກງານໃນໄລຍະຜ່ານມາ ແລະ ທິດທາງແຜນການໃນຕໍ່ໜ້າ, ຈາກຄະນະສາຂາຂອງ ທນບ ທັງ 02 ສາຂາ ແລະ ນອກນັ້ນຍັງໄດ້ຮັບຟັງການລາຍງານສະພາບໂດຍລວມຈາກ ທະນາຄານແຫ່ງ ສປປ ລາວ ສາຂາປະຈໍາພາກ, ການລາຍງານຂອງຄະນະອໍານວຍການ ແລະ ພະນັກງານນໍາພາຫລັກແຫລ່ງ ຂອງ ທນບ ຈໍານວນໜຶ່ງ, ຈາກນັ້ນທ່ານ ຮອງຜູ້ວ່າການ ທະນາຄານແຫ່ງ ສປປ ລາວ ຮອງປະທານສະພາບໍລິຫານ ທນບ ກໍ່ໄດ້ມີຄໍາເຫັນ, ເຊິ່ງທ່ານໄດ້ຍ້ອງຍໍຊົມເຊີຍຜົນງານທີ່ທັງ 02 ສາຂາ ຍາດມາໄດ້, ເປັນຕົ້ນແມ່ນການປະຕິບັດພາລະບົດບາດຂອງ ທະນາຄານນະໂຍບາຍ ແລະ ໜ້າທີ່ການເມືອງ ທີ່ໄດ້ຮັບມອບໝາຍຄື ການປະກອບສ່ວນແກ້ໄຂຄວາມທຸກຍາກຂອງປະຊາຊົນ, ໂດຍການສະໜອງສິນເຊຶ່ອດອກເບ້ຍນະໂຍບາຍ, ຄວາມເອົາໃຈໃສ່ໃນການປ້ອງກັນ ແລະ ສະກັດກັ້ນປະກົດການຫຍໍ້ທໍ້ບໍ່ໃຫ້ເກີດຂື້ນ, ການແກ້ໄຂ້ໜີ້ສິນການດໍາເນີນງານທີ່ມີປະສິດທິຜົນ ແລະ ບັນຫາທີ່ພົ້ນເດັ່ນອື່ນໆ, ພ້ອມທັງ ມີຄວາມເຫັນຊີ້ນໍາ ຫຼາຍບັນຫາ ທີ່ມີເນື້ອໃນສຳຄັນ ແລະ ເລິກເຊິ່ງ ຕໍ່ຄະນະສາຂາ, ຄະນະຂະແໜງ ແລະ ພະນັກງານໃນຈໍານວນ 02 ສາຂາ ເພື່ອເປັນບ່ອນອີງ, ເປັນທິດທາງ, ໃນການນໍາໄປຈັດຕັ້ງ, ຜັນຂະຫຍາຍ ເຂົ້າໃນວຽກງານຕົວຈິງ ໃນຕໍ່ໜ້າໃຫ້ມີປະສິດທິຜົນຍິ່ງໆຂຶ້ນ.
ພາບ-ຂ່າວໂດຍ: ອຸລາ ທົນນະວົງສາ
