ກອງປະຊຸມສະຫຼຸບການເຄື່ອນໄຫວວຽກງານຮອບດ້ານ 6 ເດືອນຕົ້ນປີ 2024 ແລະ ທິດທາງແຜນການ ປະຈຳ 6 ເດືອນທ້າຍປີ 2024 ຂອງ ທນບ ສາຂາຫຼວງນ້ຳທາ
ຕອນເຊົ້າ ເວລາ 8:30 ນາທີ ຂອງວັນທີ 08 ກໍລະກົດ 2024 ທະນາຄານນະໂຍບາຍ ສາຂາ ຫຼວງນ້ຳທາ ໄດ້ເປີດກອງປະຊຸມສະຫຼຸບການເຄື່ອນໄຫວວຽກງານຮອບດ້ານ 6 ເດືອນຕົ້ນປີ 2024 ແລະ ວ່າງທິດທາງແຜນການ ປະຈຳ 6 ເດືອນທ້າຍປີ 2024 ຂື້ນຢູ່ທີ່ຫ້ອງປະຊຸມໃຫຍ່ຊັ້ນ III ຂອງທະນາຄານນະໂຍບາຍສາຂາຫຼວງນ້ຳທາ ໂດຍພາຍໃຕ້ການເປັນປະທານຂອງ ທ່ານ ລີ ວັນນະປະເສີດ ຫົວໜ້າທະນາຄານນະໂຍບາຍ ສາຂາ ຫຼວງນ້ຳທາ, ມີບັນດາທ່ານຄະນະສາຂາ, ຄະນະຂະແໜງ, ຄະນະຫ້ອງການປະສານງານ ແລະ ຄະນະໜ່ວຍບໍລິການ ຕະຫຼອດຮອດພະນັກງານວິຊາການໃນທົ່ວສາຂາໄດ້ເຂົ້າຮ່ວມຈຳນວນ 34 ທ່ານ ຍີງ 10 ທ່ານ.
ທ່ານ ນິຄົມ ບັນນະວົງ ຮອງຫົວໜ້າ ທນບ ສາຂາ ຫຼວງນໍ້າທາ, ໄດ້ຂື້ນຜ່ານບົດສະຫຼຸບການເຄື່ອນໄຫວວຽກງານຮອບດ້ານ ປະຈຳ 6 ເດືອນຕົ້ນປີ 2024 ແລະ ວາງທິດທາງແຜນການ 6 ເດືອນທ້າຍປີ 2024, ຈາກນັ້ນ, ຫົວໜ້າຂະ ແໜງສິນເຊຶ່ອໄດ້ລາຍງານໂຕເລກການເຄື່ອນໄຫວວຽກງານສິນເຊຶ່ອທົ່ວສາຂາ 1 ໃນໄລຍະ 6 ເດືອນຕົ້ນປີ 2024 ແລະ ຮອງຫົວໜ້າຂະແໜງຫ້ອງການບໍລິຫານ-ຈັດຕັ້ງພະນັກງານ ໄດ້ລາຍງານຜົນການປະຕິບັດແຜນທຸລະກິດ ປະຈຳ 6 ເດືອນຕົ້ນທຽບໃສ່ແຜນປີ 2024, ຫຼັງຈາກນັ້ນປະທານກອງປະຊຸມໄດ້ສະເໜີໃຫ້ ໜ່ວຍບໍລິການ ແລະ ຫ້ອງການການປະສານງານ ຂື້ນລາຍງານວຽກງານທີ່ຕົນເອງຮັບຜິດຊອບຜ່ານມາໂດຍຍົກໃຫ້ເຫັນດ້ານທີ່ເຮັດໄດ້, ຂໍ້ຄົງຄ້າງ, ວິທີການແກ້ໄຂ ແລະ ຂໍ້ສະເໜີວຽກງານແຕ່ລະດ້ານ, ຜູ້ເຂົ້າຮ່ວມປະຊຸມໄດ້ມີການສ່ອງແສງລາຍງານຢ່າງກົງໄປກົງມາ ແລະ ມີຄວາມເປັນເອກະພາບກັນຫຼາຍດ້ານ.
ໃນຕອນທ້າຍປະທານກອງປະຊຸມ ໄດ້ເນັ້ນໜັກຄະນະນຳແຕ່ລະຂັ້ນກ່ຽວກັບວຽກງານການສຶກສາອົບຮົມ ການເມືອງແນວຄິດໃຫ້ພະນັກງານພາຍໃຕ້ຄວາມຮັບຜິດຊອບຂອງຕົນໂດຍການຖືເອົາບັນດາເອກະສານທາງລັດຖະການຂອງອົງການປົກຄອງທ້ອງຖິ່ນ, ນິຕິກຳຕ່າງໆຂອງ ທຫລ ແລະ ທນບ ນໍາມາຜັນຂະຫຍາຍເຜີຍແຜ່ໃຫ້ແກ່ພະນັກງານພາຍໃນຂອງຕົນເປັນປົກກະຕິຕໍ່ເນື່ອງ ພ້ອມທັງໃຫ້ທິດຊີ້ນໍາ ແລະ ເປັນເອກະພາບ ໃນການຈັດຕັ້ງປະຕິບັດດັ່ງນີ້:
- ເອົາໃຈໃສ່ສຶກສາອົບຮົມ ການເມືອງ-ແນວຄິດ ໃຫ້ພະນັກງານພາຍໃຕ້ຄວາມຮັບຜິດຊອບຂອງຕົນ, ສ້າງແຜນຈັດຕັ້ງເຜີຍແຜ່ເອກະສານ ນະໂຍບາຍ, ລະບຽບການ; ປະເມີນຜົນງານ ແລະ ຈັດປະເພດພະນັກງານຕາມວາລະເປັນປົກກະຕິ; ເພີ່ມທະວີຄວາມເປັນແບບຢ່າງນຳໜ້າຂອງພະນັກງານນຳພາຄຸ້ມຄອງ, ສະມາຊິກພັກພາຍໃນສາຂາ, ໜ່ວຍບໍລິການ; ຫ້ອງການປະສານງານ ແລະ ເອົາໃຈໃສ່ຊີ້ນຳ-ນຳພາ ແລະ ປະຕິບັດໜ້າທີ່ວຽກງານວິຊາສະເພາະຮອບດ້ານດ້ວຍຄວາມຮັບຜິດຊອບສູງ, ໃຫ້ມີຜົນຄືບໜ້າ; ແກ້ໄຂ, ຫຼຸດຜ່ອນ ປະກົດການຫຍໍ້ທໍ້ ໃຫ້ຫຼຸດລົງ ແລະ ພ້ອມທັງສະກັດກັ້ນ ບໍ່ໃຫ້ມີປະກົດການຫຍໍ້ທໍ້ ແລະ ການສໍ້ລາດບັງຫຼວງເກີດຂື້ນຢ່າງເດັດຂາດ.
- ໃຫ້ມີຄວາມສາມັກຄີຮັກແພງກັນພາຍໃນ- ພາຍນອກ ແລະ ໃຫ້ມີຄວາມເສຍສະຫຼະຊ່ວຍວຽກກັນພາຍໃນຂະ ແໜງ, ຫ້ອງການປະສານງານ ແລະ ໜ່ວຍບໍລິການ.
- ຂະຫຍາຍຍອດສິນເຊື່ອໃຫ້ໄດ້ຢ່າງຕ່ຳ 5% ຂອງປີຜ່ານມາ, ສືບຕໍ່ປ່ອຍທືນທີ່ຍັງເຫຼືອ 9ຕື້ກວ່າກີບ, ໃຫ້ສຳເລັດບໍ່ໃຫ້ກາຍເດືອນ 7/2024.
- ໃຫ້ເອົາໃຈໃສ່ປະຕິບັດ ຕາມໜັງສືແຈ້ງແນະນຳ ເລກທີ 534/ທນບ.ຫຼທ, ລົງວັນທີ 10 ມິຖຸນາ 2024 ໃຫ້ເຂັ້ມງວດໃນການໃນການປະຕິບັດສິດອະນຸມັດລາຍຈ່າຍບໍລິຫານຢູ່ ໜ່ວຍບໍລິການ ແລະ ຫ້ອງການປະສານງານ ຕ້ອງໃຫ້ມີຄວາມສອດຄ່ອງກັບລະບຽບຫຼັກການ ແລະ ມີລັກສະນະປະຢັດມັດທະຍັດ, ເພຶ່ອໃຫ້ມີຜົນກຳໄລໃນທ້າຍປີ ແລະ ໃຫ້ຫ້ອງການປະສານງານ, ໜ່ວຍບໍລິການ ບໍລິຫານລາຍຈ່າຍຕົນເອງພາຍໃນໜ່ວຍ ໃນແຕ່ລະອາທິດວ່າສາມາດກຸ້ມຕົນເອງໄດ້ຫຼືບໍ່.
- ການຄິດໄລ່ນໍ້າມັນລົງວຽກພາກສະໜາມແມ່ນໃຫ້ກຳນົດຄິດໄລ່ 12 ກມ/ລິດ/ຄັນ (ພາຫະນະລົດຈັກ).
- ດຸ່ນດ່ຽງພະນັກງານໃຫ້ມີຄວາມເໝາະສົມກັບໜ້າທີ່ວຽກງານຕົວຈີງຂອງແຕ່ລະບ່ອນ.
- ຫ້ອງການປະສານງານ ຫຼື ໜ່ວຍບໍລິການໃດທີມີເງຶ່ອນໄຂທີ່ຈະໄດ້ຮັບການຍ້ອງຍໍແມ່ນຈະໄດ້ສຸ່ມໃສ່ແກ້ໄຂ ແລະ ຊຸກຍູ້ໜ່ວຍບໍລິການນັ້ນ.
- ໃຫ້ເອົາໃຈໃສ່ປະຕິ ບັດຕາມຂໍ້ຕົກລົງເລກທີ 569/ທນບ, ລົງວັນທີ 23 ເມສາ 2024 ວ່າດ້ວຍການຈັດປະເພດເພຶ່ອຍ້ອງຍໍໃຫ້ບຳເນັດ.
- ໃຫ້ພະນັກງານແຕ່ລະຄົນເອົາໃຈໃສ່ກຳໄດ້ເອກະສານແຈ້ງການຕ່າງໆທີ່ອອກນຳໃຊ້ໃໝ່ໃນແຕ່ລະໄລຍະ ເພຶ່ອເອົາມານຳໃຊ້ເຂົ້າໃນການປະຕິບັດວຽກຕົວຈີງໃຫ້ແທດເໝາະ ແລະ ຖືກຕ້ອງກັບຄວາມເປັນຈິງ.
ກອງປະຊຸມໄດ້ດຳເນີນເປັນເວລາ 01 ວັນ ແລະ ປິດລົງໃນເວລາ 17 ໂມງ 00 ນາທີ ຂອງວັນດຽວກັນ.
ດັ່ງນັ້ນ,ຈຶ່ງໄດ້ເຮັດບົດບັນທືກສະບັບນີ້ໄວ້ ເພື່ອເປັນບ່ອນອີງໃນການຈັດຕັ້ງປະຕິບັດວຽກງານ.
