ກອງປະຊຸມສະຫຼຸບການເຄື່ອນໄຫວວຽກງານຮອບດ້ານປະຈຳ 6 ເດືອນຕົ້ນປີ 2024 ແລະ ທິດທາງ-ແຜນການປະຈຳ 6 ເດືອນທ້າຍປີ 2024
ວັນທີ 12 ກໍລະກົດ 2024 ທີ່ຫ້ອງປະຊຸມຊັ້ນ III ຂອງທະນາຄານນະໂຍບາຍ ສາຂາຜົ້ງສາລີ ໄດ້ເປີດ ກອງປະຊຸມສະຫຼຸບການເຄື່ອນໄຫວວຽກງານຮອບດ້ານ ປະຈຳ 06 ເດືອນຕົ້ນປີ 2024 ແລະ ວາງທິດທາງແຜນການປະຈໍາ 6 ເດືອນທ້າຍປີ 2024 ຂອງທະນາຄານນະໂຍບາຍສາຂາຜົ້ງສາລີ ໂດຍພາຍໃຕ້ການເປັນປະທານຂອງທ່ານ ສີຟອງ ແກ້ວກົງຕາ ຫົວໜ້າທະນາຄານນະໂຍບາຍ ສາຂາຜົ້ງສາລີ, ມີຄະນະສາຂາ, ຄະນະຂະແໜງ , ຄະນະໜ່ວຍ, ພ້ອມດ້ວຍພະນັກງານສິນເຊື່ອໜ່ວຍບໍລິການ ແລະ ພະນັກງານພາຍໃນສໍານັກງານສາຂາ ເຂົ້າຮ່ວມທັງໝົດ 42 ທ່ານ, ຍິງ 7 ທ່ານ
ພາຍຫຼັງທ່ານ ປະທານ ໄດ້ກ່າວເປີດກອງປະຊຸມຢ່າງເປັນທາງການແລ້ວ ທ່ານ ອໍາໄພ ອິນແກ້ວມະນີ ຮອງຫົວໜ້າສາຂາ ໄດ້ຜ່ານບົດສະຫຼຸບການເຄື່ອນໄຫວວຽກງານຮອບດ້ານປະຈໍາ 06 ເດືອນຕົ້ນປີ ແລະ ທິດທາງແຜນການ ປະຈໍາ 06 ເດືອນທ້າຍປີ 2024, ທ່ານ ແກ້ວວຽງຄອນ ໄຊຍະສານ ຜ່ານຂໍ້ຕົກລົງ,ວ່າດ້ວຍການຮັບຮອງປະເມີນຜົນງານຂອງພະນັກງານ ປະຈໍາປີ 2023 ສາຂາຜົ້ງສາລີເລກທີ 946/ທນບ,ລົງວັນທີ,ນະຄອນຫຼວງວຽງຈັນ,ວັນທີ 21 ມີຖຸນາ 2024 ແລະ ເຜີຍແຜ່ຂໍ້ຕົກລົງ,ວ່າດ້ວຍການຈັດປະເພດເພື່ອຍ້ອງຍໍໃຫ້ບໍາເນັດສາຂາ,ຫ້ອງການປະສານງານ ແລະ ໜ່ວຍບໍລິການ ທນບ ປະຈໍາປີ,ເລກທີ 569/ທນບ,ນະຄອນຫຼວງວຽງຈັນ,ວັນທີ 23 ເມສາ 2024, ຫຼັງຈາກນັ້ນປະທານກອງປະຊຸມໄດ້ສະເໜີໃຫ້ ຂະແໜງການ ແລະ ໜ່ວຍບໍລິການ ຂື້ນລາຍງານວຽກງານທີ່ຕົນເອງຮັບຜິດຊອບຜ່ານມາໂດຍຍົກໃຫ້ເຫັນດ້ານທີ່ເຮັດໄດ້, ຂໍ້ຄົງຄ້າງ, ວິທີການແກ້ໄຂ ແລະ ຂໍ້ສະເໜີວຽກງານແຕ່ລະດ້ານ, ຜູ້ເຂົ້າຮ່ວມປະຊຸມໄດ້ມີການສ່ອງແສງລາຍງານຢ່າງກົງໄປກົງມາ, ປະກອບຄໍາເຫັນ ແລະ ມີຄວາມເປັນເອກະພາບກັນຫຼາຍດ້ານ, ເພື່ອສູ້ຊົນ 06 ເດືອນທ້າຍປີ 2024.
ໃນຕອນທ້າຍປະທານກອງປະຊຸມ ໄດ້ເນັ້ນໜັກຄະນະນຳແຕ່ລະຂັ້ນກ່ຽວກັບວຽກງານການສຶກສາອົບຮົມ ການ ເມືອງແນວຄິດໃຫ້ພະນັກງານພາຍໃຕ້ຄວາມຮັບຜິດຊອບຂອງຕົນເປັນປົກກະຕິຕໍ່ເນື່ອງ ພ້ອມທັງໃຫ້ທິດຊີ້ນໍາ ແລະ ເປັນເອກະພາບ ໃນການຈັດຕັ້ງປະຕິບັດ, ເນັ້ນໜັກວຽກງານວິຊາສະເພາະຫຼາຍບັນຫາ.
ກອງປະຊຸມໄດ້ດຳເນີນເປັນເວລາ 01 ວັນ ແລະ ປິດລົງໃນເວລາ 17 ໂມງ 00 ນາທີ ຂອງວັນດຽວກັນ.
