ໃນຕອນເຊົ້າຂອງວັນທີ 03 ຕຸລາ 2019 ນີ້ ກອງປະຊູມໃຫຍ່ຄັ້ງທີ II ຂອງໜ່ວຍພັກ ພະແນກກວດກາພາຍໃນ ໄດ້ເປີດຂື້ນຢ່າງເປັນທາງການ ທີ່ຫ້ອງປະຊູມໃຫຍ່ຊັ້ນ III ທະນາຄານນະໂຍບາຍ ສຳນັກງານໃຫຍ່ ໂດຍການເປັນປະທານຂອງ ສະຫາຍ ແສງເພັດ ດວງພິລາ ກຳມະການຄະນະພັກຮາກຖານ, ເລຂາໜ່ວຍພັກ ແລະ ໃຫ້ກຽດເຂົ້າຮ່ວມກອງປະຊູມຄັ້ງນີ້ ໂດຍ ສະຫາຍ ວຸດທິ ເລື່ອນວິໄລວົງ ກຳມະການຄະນະພັກ ທະນາຄານ ແຫ່ງ ສປປ ລາວ, ເລຂາຄະນະພັກຮາກຖານ, ມີ ສະຫາຍ ບຸນເພັງ ຄຳພິລາວົງ ເລຂາໜ່ວຍພັກ, ຫົວໜ້າພະແນກຈັດຕັ້ງ-ພະນັກງານ ແລະ ແຂກຮັບເຊີນຈາກຄະນະຮັບຜິດຊອບ ທະນາຄານ ແຫ່ງ ສປປ ລາວ, ຄະນະພັກຮາກຖານ, ຄະນະໜ່ວຍພັກ ອ້ອມຂ້າງ ແລະ ສາມອົງການຈັດຕັ້ງມະຫາຊົນ ເຂົ້າຮ່ວມຈຳນວນໜຶ່ງ.
ກອງປະຊຸມໄດ້ຮັບຟັງການຜ່ານບົດລາຍງານການເມືອງຂອງໜ່ວຍພັກ ໂດຍການນຳສະເໜີຂອງ ສະຫາຍ ມະນີຄຸດ ສີຈັນທະວົງ ຕາງໜ້າຄະນະໜ່ວຍພັກ ສະຫາຍໄດ້ສະຫຼຸບຕີລາຄາຄືນ ການຊີ້ນຳ – ນຳພາໃນໄລຍະຜ່ານມາ, ຜົນງານທີ່ຍາດມາໄດ້ ແລະ ຍົກໃຫ້ເຫັນດ້ານດີ, ດ້ານອ່ອນ, ຂໍ້ຄົງຄ້າງ ລວມທັງບັນດາສາເຫດທີ່ພາໃຫ້ມີດ້ານດີ – ດ້ານອ່ອນ, ພ້ອມທັງທິດທາງແຜນການ ແລະ ຄາດໝາຍສູ້ຊົນຂອງໜ່ວຍພັກແຕ່ນີ້ຮອດປີ 2024.
ສະຫາຍ ແສງເພັດ ດວງພິລາ ໄດ້ຜ່ານບົດສຳຫຼວດການນຳພາ ຂອງຄະນະໜ່ວຍພັກ ໂດຍໄດ້ສັງເກດຕີລາຄາ ການຊີ້ນຳ – ນຳພາຂອງຄະນະໜ່ວຍພັກ ເປັນຕົ້ນ ແມ່ນຮັກສາໄດ້ຄວາມສາມັກຄີເປັນເອກະພາບ ພາຍໃນຄະນະໜ່ວຍພັກ ກໍ່ຄືສະມາຊິກພັກ ຢ່າງແໜ້ນແຟ້ນ, ເສີມຂະຫຍາຍບົດຮຽນ, ຄວາມສາມາດ ຢ່າງມີຫົວຄິດປະດິດສ້າງ ໃນການຈັດຕັ້ງນຳພາ ປະຕິບັດແນວທາງນະໂຍບາຍຂອງພັກ – ລັດ ໃນແຕ່ລະໄລຍະ ໃຫ້ປະກົດຜົນເປັນຈິງ ແລະ ໄດ້ຮັບຜົນສຳເລັດເປັນກ້າວໆມາ. ພ້ອມທັງໄດ້ກ່າວອຳລາຕຳແໜ່ງ ເພື່ອໄປເຄື່ອນໄຫວວຽກງານຊ່ວຍຄະນະພັກຮາກຖານ, ພ້ອມກັນນັ້ນ ບັນດາຜູ້ແທນກອງປະຊຸມໄດ້ພ້ອມກັນໃຊ້ສິດປະຊາທິປະໄຕຂອງຕົນ ເພື່ອປ່ອນບັດຄັດເລືອກ ເອົາຄະນະໜ່ວຍພັກຊຸດໃໝ່, ບົນພື້ນຖານ ຫຼັກການລວມສູນປະຊາທິປະໄຕ, ຖືກຕ້ອງ ແລະ ສອດຄ່ອງກັບມາດຖານເງື່ອນໄຂທີ່ກຳນົດໄວ້. ກອງປະຊູມໄດ້ເລືອກເອົາ ສະຫາຍ ມະນີຄຸດ ສີຈັນທະວົງ ເປັນເລຂາໜ່ວຍພັກ ແລະ ສະຫາຍ ຂັນແກ້ວ ສີບຸນເຮືອງ ເປັນຮອງເລຂາ, ທັງເປັນຜູ້ກວດກາໜ່ວຍພັກ.
ໃນນັ້ນ, ກອງປະຊູມຍັງໄດ້ຮັບເອົາຄຳເຫັນໂອ້ລົມຂອງ ສະຫາຍ ວຸດທິ ເລື່ອນວິໄລວົງ ກຳມະການຄະນະພັກ ທະນາຄານ ແຫ່ງ ສປປ ລາວ, ເລຂາຄະນະພັກຮາກຖານ ທະນາຄານນະໂຍບາຍ ເພື່ອເປັນແນວທາງ ແລະ ມາດຕະການ ໃນການຈັດຕັ້ງຜັນຂະຫຍາຍທິດທາງ, ແຜນການສູ້ຊົນ 5 ປີ ໃນຕໍ່ໜ້າ ຂອງຄະນະໜ່ວຍພັກຊຸດໃໝ່, ລາຍລະອຽດດັ່ງນີ້:
- ຄະນະໜ່ວຍພັກຈົ່ງເອົາໃຈໃສ່ ແບ່ງໜ້າທີ່ຄວາມຮັບຜິດຊອບພາຍໃນຄະນະໜ່ວຍພັກ ແລະ ບັນດາສະຫາຍສະມາຊິກພັກພາຍໃນໜ່ວຍພັກຂອງຕົນໃຫ້ລະອຽດ, ດຳເນີນການຮ່ວມຊີວິດເປັນປົກກະຕິ, ເຊີດຊູຄວາມ ເປັນແບບຢ່າງນໍາໜ້າຂອງສະມາຊິກພັກ, ຄະນະໜ່ວຍພັກຕ້ອງເປັນແບບຢ່າງໃຫ້ບັນດາສະມາຊິກພັກ ພາຍໃນໜ່ວຍພັກ, ພ້ອມກັນນັ້ນ ບັນດາສະຫາຍສະຊິກພັກກໍ່ຕ້ອງເປັນແບບຢ່າງ ໃຫ້ມະຫາຊົນຢ່າງຮອບດ້ານ.
- ຄະນະໜ່ວຍພັກ ຕ້ອງເອົາໃຈໃສ່ ປັບປຸງແບບແຜນວິທີການນຳພາ ໂດຍຢຶດໝັ້ນ ຫຼັກການລວມສູນປະຊາທິປະໄຕຂອງພັກ, ມອບໝາຍໜ້າທີ່ໃຫ້ບຸກຄົນຮັບຜິດຊອບ, ຕ້ອງມີການປະເມີນສະມາຊິກພັກ, ພະນັກງານທີ່ຢູ່ພາຍໃຕ້ຄວາມຮັບຜິດຊອບຂອງຕົນໃຫ້ເປັນປົກກະຕິ.
- ເອົາໃຈໃສ່ສະເໜີປັບປຸງກົງຈັກການຈັດຕັ້ງ ສະເພາະພະນັກງານຜູ້ທີ່ເຮັດວຽກງານກວດກາໃນທົ່ວລະບົບ ໃຫ້ສາມາດ ຮັບປະກັນຄຸນນະພາບຂອງວຽກງານກວດການັບມື້ນັບສູງຂື້ນ.
- ເອົາໃຈໃສ່ປັບປຸງ, ກໍ່ສ້າງໜ່ວຍພັກຂອງຕົນ ໃຫ້ກາຍເປັນໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ,ຢາກເຮັດໄດ້ແນວນັ້ນ ສະມາຊິກພັກທຸກຄົນພາຍໃນໜ່ວຍພັກ ກໍ່ຕ້ອງສູ້ຊົນ ຝຶກຝົນຫຼໍ່ຫຼອມຕົນເອງໃນທຸກດ້ານ.
- ຕ້ອງເອົາໃຈໃສ່ຊຸກຍູ້ການຈັດຕັ້ງລັດຂອງຕົນ ໃນການຈັດຕັ້ງປະຕິບັດໜ້າທີ່ວິຊາສະເພາະ ໃຫ້ເຂັ້ມແຂງຂຶ້ນຕື່ມ ເພື່ອຫັນວຽກງານກວດກາເຂົ້າສູ່ລວງເລິກ ແລະ ມີຄຸນນະພາບ. ສະນັ້ນ, ຜູ້ທີ່ເຮັດວຽກງານກວດກາ ຕ້ອງເຮັດໜ້າທີ່ ບົນພື້ນຖານ ປະຕິບັດຕາມລະບຽບການຂອງແຕ່ລະວິຊາສະເພາະ ກໍ່ຄືກົດໝາຍທີ່ກ່ຽວຂ້ອງເປັນບ່ອນອີງ, ຮັບປະກັນທາງດ້ານຄວາມຮູ້, ຄວາມສາມາດຮອບດ້ານ ເພື່ອສາມາດສະຫຼຸບ, ສັງເກດຕີລາຄາ ປະເມີນຜົນການກວດກາໃຫ້ຮອບດ້ານ, ພາວະວິໄສ ເພື່ອເຮັດໃຫ້ວຽກງານກວດກາເຂັ້ມແຂງຢ່າງແທ້ຈິງ.
ຂຽນຂ່າວໂດຍ: ຈັນທະວິໄລ ບຸນທະລາ.
ຖ່າຍພາບໂດຍ: ວິລະຫັດ ສົມມາລີ.
