ໃນຕອນເຊົ້າວັນເສົາ ທີ 25 ມັງກອນ 2020 ເວລາ 08 ໂມງ 30 ນາທີ ຢູ່ທີ່ຫ້ອງປະຊຸມໃຫ່ຍຊັ້ນ III ທະນາຄານ ນະໂຍບາຍ ສາຂາຫົວພັນ ໄດ້ເປີດກອງປະຊຸມສະຫຼຸບການເຄື່ອນໄຫວວຽກງານປະຈຳປີ 2019 ແລະ ທິດທາງແຜນການປີ 2020, ພິທີປະກາດປັບປຸງການຈັດຕັ້ງ ແລະ ປະເມີນພະນັກງານ ທະນາຄານ ນະໂຍບາຍ ສາຂາຫົວພັນ ຂື້ນ, ພາຍໃຕ້ການເປັນປະທານ ຂອງທ່ານ ຄຳອົ້ນ ຈັນສຸລິມາດ ຮອງເລຂາຄະນະພັກຮາກຖານ ຮອງຜູ້ອຳນວຍການ ທະນາຄານນະໂຍບາຍ, ເຂົ້າຮ່ວມກອງປະຊຸມມີ ຄະນະພະແນກທີ່ເດີນທາງມາຈາກສຳນັກງານໃຫຍ່ ແລະ ຄະນະສາຂາ, ຄະນະຂະແໜງ, ຄະນະໜ່ວຍບໍລິການ, ພະນັກງານຢູ່ຫ້ອງການສາຂາ ແລະ ໜ່ວຍບໍລິການ ເຂົ້າຮ່ວມທັງໝົດ 54 ທ່ານ, ຍິງ 15 ທ່ານ.
ທ່ານປະທານກອງປະຊຸມໄດ້ກ່າວເປີດກອງປະຊຸມຢ່າງເປັນທາງການ ແລະ ທ່ານ ທິບພະກອນ ສຸນດາລາ ເລຂາໜ່ວຍພັກ ຫົວໜ້າສາຂາຫົວພັນ ໄດ້ຂື້ນຜ່ານບົດສະຫຼຸບການເຄື່ອນໄຫວຮອບດ້ານໂດຍຫຍໍ້ ຂອງທະນາຄານນະໂຍບາຍ ສາຂາຫົວພັນ ປະຈຳປີ 2019 ແລະ ທິດທາງແຜນການປີ 2020 ໂດຍໄດ້ຍົກໃຫ້ເຫັນດ້ານດີ, ດ້ານອ່ອນ, ຂໍ້ຄົງຄ້າງທີ່ຈະຕ້ອງໄດ້ພ້ອມກັນເອົາໃຈໃສ່ໃນການແກ້ໄຂໃນຕໍ່ໜ້າ ແລະ ຄາດໝາຍສູ້ຊົນແຕ່ລະໜ້າວຽກໂດຍມີຄວາມຮັບຜິດຊອບສູງໃນປີ2020.
ກອງປະຊຸມ ຍັງໄດ້ຮັບຟັງການປະກອບຄຳຄິດ-ຄໍາເຫັນ ເພື່ອແລກປ່ຽນບົດຮຽນໃສ່ເນື້ອໃນຮ່າງບົດສະຫຼຸບ, ບັນດາຄໍາຖາມເຈາະຈີ້ມ ຂອງທ່ານປະທານ ເພື່ອນຳເອົາເນື້ອໃນດັ່ງກ່າວໄປແກ້ໄຂຈັດຕັ້ງປະຕິບັດຂະຫຍາຍເຂົ້າໃສ່ວຽກງານວິຊາສະເພາະໃຫ້ນັບມື້ນັບດີຂື້ນ.
ກອງປະຊຸມ ຍັງໄດ້ຮັບຟັງຄຳເຫັນໂອ້ລົມ ຂອງທ່ານ ຄຳອົ້ນ ຈັນສຸລິມາດ ຮອງເລຂາຄະນະພັກຮາກຖານ ຮອງຜູ້ອຳນວຍການ ທະນາຄານນະໂຍບາຍ, ໂດຍທ່ານໄດ້ຍົກໃຫ້ເຫັນເຖິງດ້ານດີພົ້ນເດັ່ນ ແລະ ໃຫ້ຄວາມຍ້ອງຍໍຊົມເຊີຍຕໍ່ກັບຜົນງານທີ່ສາຂາຈັດຕັ້ງປະຕິບັດໄດ້ ໂດຍສະເພາະແມ່ນການປະຕິບັດແຜນການໄດ້ເກີນແຜນ ແລະ ການເກັບກູ້ໜີ້ສິນໄດ້ເກີນ 90% ແລະ ໃຫ້ຄໍາແນະນກ່ຽວກັບບາງໜ້າວຽກ ທີ່ຈະຕ້ອງໄດ້ສຶບຕໍ່ເອົາໃຈໃສ່ປັບປຸງແກ້ໄຂໃນຕໍ່ໜ້າໃຫ້ນັບມື້ນັບດີຂື້ນ ໂດຍໄດ້ຍົກໃຫ້ເຫັນບາງໜ້າວຽກດັ່ງນີ້:
1, ໃຫ້ຄະນະສາຂາ, ບັນດາຂະແໜງການ, ແຕ່ລະໜ່ວຍບໍລິການ ເອົາໃຈໃສ່ສືບຕໍ່ຊີ້ນຳ-ນຳພາ ທາງດ້ານວຽກງານແນວຄິດການເມືອງຢ່າງເປັນປົກກະຕິ ແລະ ເລິກເຊີ່ງ, ເຮັດໃຫ້ພະນັກງານມີແນວຄິດອຸ່ນອຽນທຸ່ນທ່ຽງ, ບັນດາກົນໄກການຄຸ້ມຄອງໃນແຕ່ລະໜ່ວຍບໍລິການ ໃຫ້ສືບຕໍ່ໃນການເຕົ້າລວມສ່ອງແສງວຽກງານປະຈຳທິດ ເພື່ອນຳເອົາບັນຫາ, ບັນດາຄໍາຄິດເຫັນພາຍໃນໜ່ວຍຂອງຕົນ ລາຍງານຕໍ່ຄະນະສາຂາຮັບຊາບ, ຢູ່ສາຂາກໍ່ໃຫ້ປະຕິບັດການເຕົ້າລວມສ່ອງແສງຢ່າງໜ້ອຍໃນ 01 ເດືອນ ຕໍ່ຄັ້ງ, ເຊີນບັນດາຄະນະໜ່ວຍບໍລິການຂື້ນມາ ເພື່ອສ່ອງແສງຫາວິທີແກ້ໄຂວຽກປະຈຳເດືອນ, ເຖິງການນຳສະເໜີດ້ານແນວຄິດ-ຄຳຄິດເຫັນຈະແຕກຕ່າງກັນ ແຕ່ແນວທາງໃນການປະຕິບັດໜ້າວຽກງານຕ່າງໆ ໃຫ້ປະຕິບັດໄປໃນທິດທາງລວງດຽວກັນ, ບໍ່ໃຫ້ປະຕິບັດໄປໃນແນວທາງທີ່ຂັດກັນ ແລະ ບໍ່ໃຫ້ຖີ້ມວຽກໃສ່ກັນ.
2, ຕໍ່ກັບວຽກງານວິຊາສະເພາະ ; ໃຫ້ປະຕິບັດຕາມພາລະບົດບາດຂອງແຕ່ລະຂະແໜງການຢ່າງເຄັ່ງຄັດ ພ້ອມທັງສາມາດກຳໃຫ້ໄດ້ແຕ່ລະໜ້າວຽກທີ່ຕົນເອງຮັບຜິດຊອບ, ສາມາດກວດກາ ແລະ ລາຍງານຕໍ່ຄະນະສາຂາໄດ້ຢ່າງເປັນປົກກະຕິ, ໃນການຈັດຕັ້ງປະຕິບັດໜ້າທີ່ວຽກງານຕ້ອງສັດຊື່ບໍລິສຸດ, ຊັດເຈນ ແລະ ໂປ່ງໃສ.
3, ວຽກງານປະກົດການຫຍໍ້ທໍ້ ; ໃຫ້ຄະນະສາຂາ, ຄະນະຂະແໜງການກ່ຽວຂ້ອງ ແລະ ຄະນະໜ່ວຍບໍລິການ ເອົາໃຈໃສ່ໃນການເຮັດວຽກງານກວດກາເປັນປະຈຳ, ມີສະຕິສູງຕໍ່ການຈັດຕັ້ງ, ເປັນເຈົ້າການຕໍ່ກັບການປະຕິບັດໜ້າທີ່ວຽກງານ, ພະນັກງານທຸກຄົນຕ້ອງມີຄວາມສັດສື່ບໍລິສຸດຕໍ່ກັບໜ້າທີ່ວຽກງານຕົນຮັບຜິດຊອບ, ຜູ້ທີ່ມີຫຼັກສະນະແນວຄິດຊັກຊ້າບໍ່ທັນຫັນເຂົ້າສູ່ລະບຽບ ຕ້ອງຫັນປ່ຽນແນວຄິດຕົນເອງໃຫ້ທັນກັບສະພາບແວດລ້ອມ ແລະ ວຽກງານທີ່ຕົນເອງຮັບຜິດຊອບ.
4, ເອົາໃຈໃສ່ເກັບກູ້ໜີ້ສິນໃຫ້ໄດ້ຕາມແຜນການ, ການປ່ອຍສິນເຊື່ອຕ້ອງຖຶເອົາຄຸນນະພາບເປັນກົກ, ບໍ່ໃຫ້ແລ່ນນຳປະລິມານ, ມີການກວດກາກ່ອນປ່ອຍ, ຫຼັງປ່ອຍ ເພື່ອຕິດຕາມການນຳໃຊ້ເງິນກູ້ຂອງລູກຄ້າເປັນປົກກະຕິ, ເພື່ອກຳໄດ້ສະພາບການນຳໃຊ້ເງິນກູ້ຂອງລູກຄ້າແຕ່ລະລາຍ, ຫຼີກລຽງບັນຫາທີ່ລູກຄ້າສະເໜີວ່າ ພະນັກງານບໍ່ລົງມາຮອດ ຫຼຶ ຫຼາຍເດືອນຄ່ອຍລົງໄປ ເຊີ່ງເປັນເຫດໃຫ້ມີໜີ້ຄ້າງ.
- ເງິນກູ້ລາຍບຸກຄົນ ແມ່ນໃຫ້ມີການກວດກາລະອຽດ ວ່າລູກຄ້າມີໜີ້ສິນຕິດພັນກັບທະນາຄານອື່ນບໍ່, ໜີ້ສິນນອກລະ
ບົບມີບໍ່, ໂຄງການທີ່ຈະເຮັດສາມາດລົງທືນໄດ້ບແທ້ບໍ່, ສະຖານທີ່ຕັ້ງຢູ່ໃສ ແລະ ຫຼັກຊັບຕ້ອງເປັນຂອງຜູ້ກ່ຽວໂດຍກົງ, ຈິ່ງສາມາດປ່ອຍໄດ້.
5, ວຽກງານການປັບປຸງການຈັດຕັ້ງ; ພະນັກງານທຸກຄົນຕ້ອງມີຄວາມເຂົ້າໃຈແຈ້ງຕໍ່ກັບພາລະບົດບາດ ທຸກຄົນຈະມີການໝູນວຽນບ່ອນປະຈຳການ, ໃຫ້ຖືເປັນວຽກປົກກະຕິ, ບໍ່ໃຫ້ຂັດຂ້ອງຕໍ່ການຊັບຊ້ອນຂອງການຈັດຕັ້ງເດັດຂາດ, ຂັ້ນລຸ່ມຂະແໜງການ, ໜ່ວຍບໍລິການ ຕະຫຼອດຮອດພະນັກງານວິຊາການຕ່າງໆ ກໍ່ໃຫ້ຄວາມຮ່ວມມື ແລະ ໃຫ້ກຽດເຊີ່ງກັນ ແລະ ກັນ, ເຊື້່ອໝັ້ນຊ່ວຍເຫຼື່ອກັນ, ສ່ວນການປະຕິບັດວຽກງານຕ້ອງມີການພົວພັນເຊີ່ງກັນ ແລະ ກັນ, ທຸກໜ້າວຽກທີ່ຈະເກີດດອກອອກຜົນໄດ້ ກໍ່ຕໍ່ເມືອບັນດາຄະນະໜ່ວຍບໍລິການ ນຳໄປຈັດຕັ້ງຜັນຂະຫຍາຍເຊື່ອມຊື່ມໃຫ້ອ້າຍນ້ອງໄດ້ຮັບຮູ້ເຂົ້າໃຈແຈ້ງ.
ທ່ານ ຫົວໜ້າ ພະແນກຈັດຕັ້ງພະນັກງານໄດ້ຂື້ນ ຜ່ານຂໍ້ຕົກລົງ ສະບັບເລກທີ 123/ທນບ, ລົງວັນທີ 22 ມັງກອນ 2020 ວ່າດ້ວຍການແຕ່ງຕັ້ງ ທ່ານ ທີບພະກອນ ສູນດາລາ ເດີມເປັນວ່າການຫົວໜ້າ ທນບ ສາຂາຫົວພັນ ຂື້ນເປັນຫົວໜ້າ ທນບ ສາຂາຫົວພັນ ແລະ ໄດ້ທາບທາມຄືນເປົ້າໝາຍພະນັກງານສຶບທອດປ່ຽນແທນ ຕາມແຜນກຳນົດພະນັກງານຂອງສາຂາ.
ຕອນທ້າຍ ກອງປະຊຸມ ທ່ານ ທີບພະກອນ ສູນດາລາ ຫົວໜ້າສາຂາ ໄດ້ຂື້ນກ່າວຮັບຄຳໂອລົມ ແລະ ກ່າວຄຳຂອບໃຈຕໍ່ຂັ້ນເທິງ ກໍ່ຄື ທ່ານປະທານ ແລະ ກອງປະຊຸມໄດ້ດຳເນີນມາເປັນເວລາ 01 ວັນ ແລະ ໄດ້ປິດລົງໃນ ເວລາ 16 ໂມງ 45 ນາທີ ຂອງວັນດຽວກັນ.
ຂຽນຂ່າວໂດຍ: ທ່ານ ຊົງລີ ຢາລື້ໄຊ
