ກອງປະຊຸມໄດ້ໄຂຂື້ນຢ່າງເປັນທາງການໃນຕອນເຊົ້າຂອງວັນທີ 23 ກັນຍາ 2020 ຢູ່ທີ່ຫ້ອງປະຊຸມໃຫ່ຍຂອງທະນາຄານນະໂຍບາຍ ສາຂາ ຊຽງຂວາງ, ໂດຍພາຍໃຕ້ການເປັນປະທານຂອງທ່ານ ວຸດທິ ເລື່ອນວິໄລວົງ ຜູ້ອຳນວຍ ການທະນາຄານ ນະໂຍບາຍ; ໃຫ້ກຽດເຂົ້າຮ່ວມມີທ່ານ ວີສອນ ໄຊສົງຄາມ ຫົວໜ້າທະນາຄານ ແຫ່ງ ສປປ ລາວ ປະ ຈຳພາກເໜືອ ແຂວງ ຊຽງຂວາງ, ມີບັນດາຫົວໜ້າພະແນກ ຄະນະພະແນກ, ບັນດາຫົວໜ້າສາຂາ ແລະ ບັນດາຫົວໜ້າຂະແໜງທີ່ກ່ຽວຂ້ອງເຂົ້າຮ່ວມທັງໝົດ 43 ທ່ານ ຍິງ 4 ທ່ານ.
ໃນກອງປະຊຸມໄດ້ຮັບຟັງການລາຍງານຮ່າງບົດສະຫຼຸບການເຄື່ອນໄຫວວຽກງານ 9 ເດືອນ ແລະ ທິດທາງແຜນ ການ 3 ເດືອນທ້າຍປີ 2020, ບົດລາຍງານການປ່ອຍສິດເຊື່ອ ແລະ ເກັບກູ້ໜີ້ສິນ ແລະ ບົດລາຍງານການບໍລິການຜະ ລິດຕະພັນ ແລະ ການເປັນຕົວແທນຝາກ-ຖອນເງິນສົດໃຫ້ແກ່ທະນາຄານພັດທະນາລາວ ໃຫ້ກຽດລາຍງານໂດຍແມ່ນທ່ານຫົວໜ້າພະແນກຫ້ອງການ, ຫົວໜ້າພະແນກສິນເຊືື່ອ ແລະ ຮອງຫົວໜ້າພະແນກບັນຊີ-ການເງິນຕາມລຳດັບ. ກອງປະຊຸມຍັງໄດ້ຮັບຟັງການປະກອບຄຳຄິດຄຳເຫັນຈາກຜູ້ເຂົ້າຮ່ວມໃສ່ຮ່າງບົດສະຫຼຸບເພື່ອໃຫ້ມີເນື້ອໃນຄົບຖ້ວນສົມບູນ.
ໃນຕອນບ່າຍຂອງວັນດຽວກັນ ກອງປະຊຸມຍັງໄດ້ຮັບຝັງຜ່ານນະໂຍບາຍສິນເຊື່ອ ( ສະບັບປັບປຸງ ), ຜ່ານຄູ່ມືການໃຫ້ສິນເຊື່ອລາຍກຸ່ມ ( ສະບັບປັບປຸງ ) ພ້ອມນີ້ປະທານຍັງໄດ້ຕັ້ງຄຳຖາມເຈາະຈີ້ມເພື່ອໃຫ້ຜູ້ເຂົ້າຮ່ວມໄດ້ປະກອບຄຳຄິດເຫັນແລກປ່ຽນໃນການຈັດຕັ້ງປະຕິບັດໜ້າທີ່ວຽກງານຜ່ານມາ ແລະ ມາດຕະການແກ້ໄຂປະກົດການຍໍ້ທໍ້ຕ່າງໆ.
ຈາກນັ້ນໃນຕອນເຊົ້າຂອງວັນທີ 24 ກັນຍາ 2020 ກອງປະຊຸມໄດ້ຮັບຟັງການຜ່ານລະບຽບການສະໜອງສິນເຊື່ອຜ່ານອົງການຈັດຕັ້ງການເມືອງ-ສັງຄົມ ແລະ ກອງທຶນບ້ານ ( ອກສກ ) ໂດຍການໃຫ້ກຽດເຜີຍແຜ່ ແມ່ນທ່ານຮອງຫົວພະແນກສິນເຊື່ອ ແລະ ໄດ້ຮັບຟັງຂັ້ນຕອນການຈັດຕັ້ງປະຕິບັດການສະໜອງສິນເຊື່ຶອຜ່ານ ອກສກ ຕົວຈີງແຕ່ລະຂັ້ນຕອນ ຂອງທ່ານ ປັນຍາສະໄຫວ ລັດຖະເສນາ ຫົວໜ້າໜ່ວຍບໍລິການເມືອງ ສັງທອງ ນະຄອນຫລວງວຽງຈັນ.
ໃນຕອນບ່າຍຂອງວັນດຽວກັນກອງປະຊຸມໄດ້ຮັບຟັງການປະກອບຄຳຄິດຄຳເຫັນຈາກຄະນະອຳນວຍການ ແລະ ບັນດາຫົວໜ້າພະແນກເພື່ອແນະນຳການຈັດຕັ້ງປະຕິບັດໜ້າທີ່ວຽກງານວິຊາສະເພາະໃນດ້ານຕ່າງໆໃຫ້ບັນດາສາຂາ ນຳເອົາໄປປັບປຸງ ແລະ ເຄື່ອນໄຫວໃຫ້ຖືກຕ້ອງຕາມພາລະບົດບາດ. ຈາກນັ້ນກໍ່ໄດ້ຕົກລົງຮັບຮອງເອົາເນື້ອໃນບົດສະຫຼຸບການເຄື່ອນໄຫວຈັດຕັ້ງປະຕິບັດວຽກງານ 9 ເດືອນ ແລະ ທິດທາງແຜນການ 3 ເດືອນທ້າຍປີ 2020 ເຊີ່ງໃນນີ້ໄດ້ຍົກໃຫ້ເຫັນດ້ານຕັ້ງໜ້າ ແລະ ພົ້ນເດັ່ນຫລາຍດ້ານທີ່ທະນາຄານ ນະໂຍບາຍ ສາມາດຍາດມາໄດ້ ເປັນຕົ້ນແມ່ນການຈັດຕັ້ງປະຕິບັດແຜນທຸລະກິດດ້ານລາຍຮັບປະຕິບັດໄດ້ 261,22 ຕື້ກີບ ເທົ່າກັບ 57%ຂອງແຜນການ; ດ້ານລາຍຈ່າຍປະຕິບັດໄດ້ 406,27 ຕື້ກີບ ເທົ່າກັບ 64%ຂອງແຜນການ ຜິດ່ຽງລາຍຮັບ-ລາຍຈ່າຍ 2020 ປະຕິບັດຈຳນວນ 145,05 ຕື້ກີບ ເທົ່າກັບ82% ຂອງແຜນການປີ ( 176,37 ), ການແກ້ໄຂໜີ້ສິນ ສາມາດເກັບໜີ້ໄດ້ທັງໝົດ184,20 ຕື້ກີບ ປະຕິບັດໄດ້ 48%ຂອງແຜນການ, ປ່ອຍສິນເຊື່ອໄດ້ທັງໝົດ73,46ຕື້ກີບ ເທົ່າກັບ 22%ຂອງແຜນການປີ, ສຳເລັດການຮ່ວມມື ເປັນຕົວແທນບໍລິການຝາກ-ຖອນເງິນສົດຂອງ ທພລ ນອກນີ້ ທນບ ຍັງໄດ້ປັບປຸງນິຕິກຳເພື່ອຮັບໃຊ້ວຽກງານຂອງຕົນເຊັ່ນ: ປັບປຸງລະບຽບຄຸ້ມຄອງພະນັກງານຂອງ ທນບ, ສ້າງຍຸດທະສາດການສະໜອງສິນເຊື່ອໄລຍະໄໝ່ຂອງທະນາຄານນະໂຍບາຍ, ປັບປຸງນະໂຍບາຍສິນເຊື່ອເພື່ອຜະລິດເປັນສິນຄ້າແກ້ໄຂຄວາມທຸກຍາກຂອງປະຊາຊົນ ແລະ ດ້ານອື່ນໆ ອີກຈຳນວນໜື່ງ, ພ້ອມດຽວກັນນີ້ຕ້ອງໄດ້ປັບປຸງແກ້ໄຂດ້ານຈຸດອ່ອນ – ຂໍ້ຄົງຄ້າງ ແລະ ສຶບຕໍ່ເອົາໃຈໃສ່ບັນດາວຽກຈຸດສຸມ 3 ເດືອນທ້າຍປີ 2020 ໃຫ້ປະກົດຜົນເປັນຈີງ.
ໃນຕອນທ້າຍກອງປະຊຸມ ທ່ານ ວຸດທິ ເລື່ອນວິໄລວົງ ຜູ້ອຳນວຍການທະນາຄານ ນະໂຍບາຍ ປະທານກອງປະຊຸມກໍ່ໄດ້ໃຫ້ກຽດມີຄຳເຫັນໃນທີ່ປະຊຸມ ເຊີ່ງກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍ ແລະ ຕີລາຄາສູງຕໍ່ກັບການຈັດກອງປະຊຸມໃນຄັ້ງນີ້ ສາມາດເຫັນໄດ້ຜົນສຳເລັດຂອງໜ້າທີ່ວຽກງານໃນຫລາຍດ້ານທີ່ພະແນກການ, ສາຂາ ຕະຫຼອດຮອດພະນັກງານ ທນບ ທຸກຄົນສາມາດຍາດມາໄດ້ໃນໄລຍະ 9 ເດືອນຜ່ານມາ ເຊີ່ງໄດ້ສະແດງອອກໃນການລາຍງານເນື້ອໃນບົດສະຫຼຸບ. ພ້ອມດຽວກັນນີ້ທ່ານຍັງໄດ້ເໜັ້ນໜັກການນຳທຸກຂັ້ນພາຍໃນ ທນບ ຕ້ອງໄດ້ສືບຕໍ່ເອົາໃຈໃສ່ສຶກສາອົບຮົມການເມືອງ-ແນວຄິດໃຫ້ພະນັກງານຢ່າງເປັນປົກກະຕິ ແລະ ຫລາຍຮູບແບບເພື່ອໃຫ້ພະນັກງານເຂົ້າໃຈຕໍ່ແນວທາງນະໂຍບາຍຂອງພັກ – ລັດຖະບານ, ເຂົ້າໃຈຕໍ່ກັບພາລະບົດບາດ, ໜ້າທີ່ ແລະ ລະບຽບຂອງ ທນບຢ່າງຈະແຈ້ງ, ເອົາໃຈໃສ່ປັບປຸງການຈັດຕັ້ງ, ກົນໄກ ແລະ ແບບແຜນວິທີເຮັດວຽກໃຫ້ມີຄວາມຄ່ອງຕົວກ່ວາເກົ່າ ໂດຍປະຕິບັດຕາມຫຼັກການລວມສູນປະຊາທິປະໄຕ, ດ້ານວຽກງານວິຊາສະເພາະໃຫ້ເອົາໃຈໃສ່ວຽກງານເກັບກູ້ໜີ້ສິນ ໂດຍສະເພາະໜີ້ NPL ຕ້ອງໄດ້ສຸມກຳລັງຈັດຕັ້ງປະຕິບັດແກ້ໄຂຢ່າງເປັນຈຸດສຸມໃຫ້ສຳເລັດຕາມລະດັບຄາດໝາຍທີ່ວາງໄວ້, ການສະໜອງສິນເຊື່ອປະຈຳປີ 2020 ບັນດາສາຂາ ແລະ ໜ່ວຍບໍລິການຕ້ອງໄດ້ຮີບຮ້ອນຈັດຕັ້ງປະຕິບັດໂດຍໄວເພື່ອໃຫ້ທ່ວງທັນກັບລະດູການຜະລິດ ພ້ອມນີ້ກໍ່ຕ້ອງຮັບປະກັນຄຸນນະພາບ, ໃຫ້ບັນດາສາຂາເອົາໃຈໃສ່ຜັນຂະຫຍາຍ ແລະ ຈັດຕັ້ງປະຕິບັດການສະໜອງສິນເຊື່ອຜ່ານອົງການຈັດຕັ້ງການເມືອງ-ສັງຄົມ ແລະ ກອງທຶນບ້ານ ( ອກສກ ) ຢ່າງໜ້ອຍ ສາຂາລະ 10 ຈຸດຕາມເງື່ອນໄຂ ແລະ ຄວາມພ້ອມ, ດ້ານວຽກງານບໍລິການມອບໃຫ້ທຸກພາກສ່ວນເພີ່ມທະວີຜັນຂະຫຍາຍປະຊາສຳພັນໃຫ້ສັງຄົມ, ປະຊາຊົນ ແລະ ອົງການຈັດຕັ້ງອ້ອມຂ້າງໄດ້ຮັບຊາບກ່ຽວກັບຜະລິດຕະພັນ ການບໍລິການຂອງທະນາຄານ ນະໂຍບາຍໃນປະຈຸບັນ, ເພີ່ມທະວີເອົາໃຈໃສ່ດ້ານວຽກງານກວດກາໃຫ້ເຂັ້ມແຂງ, ສືບຕໍ່ເອົາໃຈໃສ່ຂອດປະສານງານແຕ່ລະພາກສ່ວນ ຕາມຂັ້ນຕອນໃຫ້ເປັນປົກກະຕິ ແລະ ແໜ້ນແຝ້ນກ່ວາເກົ່າ ແລະ ໃນຕອນທ້າຍທ່ານກໍ່ໄດ້ກ່າວປິດກອງປະຊຸມຢ່າງເປັນທາງການ.
ກອງປະຊຸມໄດ້ດຳເນີນໄປເປັນເວລາ 2 ວັນຄືວັນທີ 23-24 ກັນຍາ 2020 ແລະ ປິດລົງດ້ວຍຜົນສຳເລັດອັນຈົບງາມ.
