ກອງປະຊຸມສະຫຼຸບການເຄື່ອນໄຫວວຽກງານປະຈຳ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2022 ຂອງທະນາຄານນະໂຍບາຍ ໄຂຂຶ້ນ ໃນທ້າຍອາທິດທີ່ຜ່ານມາ ວັນທີ 21-22 ກໍລະກົດ 2022 ຢູ່ທີ່ ທະນາຄານນະໂຍບາຍ ສາຂາ ສະຫວັນນະເຂດ ໂດຍການເປັນປະທານ ຂອງ ທ່ານ ວຸດທິ ເລື່ອນວິໄລວົງ ຜູ້ອຳນວຍການ ທະນາຄານນະໂຍບາຍ; ມີຄະນະອຳນວຍ, ຄະນະພະແນກ – ທຽບເທົ່າ, ຄະນະສາຂາ ແລະ ຂະແໜງການ ໃນຂອບເຂດທົ່ວປະເທດເຂົ້າຮ່ວມ
ສຳລັບກອງປະຊຸມໃນຄັ້ງນີ້ ໄດ້ພ້ອມກັນຄົ້ນຄວ້າພິຈາລະນາ ແລະ ຮັບຮອງເອົາເອກະສານສຳຄັນ ຄື: ຜ່ານ ຮ່າງ ບົດສະຫຼຸບການເຄື່ອນໄຫວວຽກງານ 06 ເດືອນ ແລະ ທິດທາງ – ແຜນການ 06 ເດືອນ ທ້າຍປີ 2022, ບົດລາຍງານການຕີລາຄາ ການຈັດຕັ້ງປະຕິບັດການສະໜອງສິນເຊື່ອ, ການແກ້ໄຂໜີ້ ແລະ ວຽກງານ ການສະໜອງສິນເຊື່ອຜ່ານອົງການຈັດຕັ້ງການເມືອງ-ສັງຄົມ ແລະ ກອງທຶນຂັ້ນບ້ານ ຫຼື ອກສກ, ບົດລາຍງານການ ຈັດຕັ້ງປະຕິບັດ ສະໜອງສິນເຊື່ອ 4 ຮ່ວມ, ບົດລາຍງານການ ຈັດຕັ້ງປະຕິບັດ ສະໜອງສິນເຊື່ອ ຜ່ານ ອກສກ, ບົດລາຍງານ ກົນໄກ ການຄຸ້ມຄອງ ແລະ ບໍລິຫານວຽກງານພາຍໃນ ສາຂາ, ບົດລາຍງານ ການຈັດຕັ້ງປະຕິບັດໃຫ້ບໍລິການເງິນຝາກ ຂອງ ທະນາຄານນະໂຍບາຍ ແລະ ບົດລາຍງານ ວຽກງານການແກ້ໄຂປະກົດການຫຍໍ້ທໍ້.
ທ່ານ ພົງປະເສີດ ຄໍາລືຊາ ຫົວໜ້າພະແນກຫ້ອງການບໍລິຫານ ທະນາຄານນະໂຍບາຍ ໄດ້ຜ່ານບົດສະຫຼູບການເຄື່ອນໄຫວຮອບດ້ານ ປະຈໍາ 6 ເດືອນຕົ້ນປີ ແລະ ທິດທາງ-ແຜນການ 6 ເດືອນທ້າຍປີ 2022.
ເຖິງແມ່ນວ່າໄລຍະຜ່ານມາຈະໄດ້ຮັບຜົນກະທົບຈາກພະຍາດໂຄວິດ-19 ແລະ ບັນຫາເສດຖະກິດ ແລະ ອື່ນໆ ທີ່ໄດ້ສົ່ງຜົນກະທົບ ທາງກົງ ແລະ ທາງອ້ອມ ຕໍ່ການ ເຄື່ອນໄຫວຂອງທະນາຄານນະໂຍບາຍ, ເຖິງແນວໃດກໍ່ຕາມ ຍ້ອນການຊີ້ນໍາຢ່າງໃກ້ຊິດຈາກລັດຖະບານລາວ ໂດຍສະເພາະແມ່ນ ທະນາຄານແຫ່ງ ສປປ ລາວ ແລະ ການຕັດສິນໃຈສູງ ຂອງຄະນະນໍາ ແລະ ພະນັກງານພາຍໃນ ທະນາຄານນະໂຍບາຍ ຈຶ່ງເຮັດໃຫ້ການເຄື່ອນໄຫວ ເປັນໄປຢ່າງປົກກະຕິ ໃນ 6 ເດືອນຕົ້ນປີໄດ້ປ່ອຍສິນເຊື່ອທັງໝົດຈໍານວນ 65,42 ຕື້ກີບ ກວມເອົາ 17 ແຂວງ 1 ນະຄອນຫຼວງ, 70 ເມືອງ, 246 ບ້ານ, 297 ກຸ່ມ, 1.080 ຄອບຄົວ, ລາຍບຸກຄົນ 125 ລາຍ.
ປ່ອຍຕາມຂົງເຂດໃນເມືອງເປົ້າໝາຍ: 45,09 ຕື້ກີບ ເທົ່າກັບ 69 %, ຈຸດສຸມລັດຖະບານ-ທ້ອງຖິ່ນ: 5,20 ຕື້ກີບ ເທົ່າກັບ 8 % ແລະ ບ້ານ 3 ສ້າງ: 15,13 ຕື້ກີບ ເທົ່າກັບ 23 % ຂອງ ຈຳນວນປ່ອຍທັງໝົດ.
ປ່ອຍສິນເຊື່ອ ເປົ້າໝາຍປູກຝັງ 15,65 ຕື້ກີບ ກວມ 28 %, ເປົ້າໝາຍລ້ຽງສັດ 44,36 ຕື້ກີບ ກວມ 61 %, ເປົ້າໝາຍຫັດຖະກຳ 2,06 ຕື້ກີບ ກວມ 3 %, ເປົ້າໝາຍອຸດສາຫະກໍາ-ປຸງແຕ່ງ 1,49 ຕື້ກີບ ກວມ 2,2 % , ເປົ້າໝາຍບໍລິການ 1,94 ຕື້ກີບ ກວມ 3 % ແລະ ໃນ 6 ເດືອນຕົ້ນປີ ໄດ້ເກັບຕົ້ນທຶນຄືນທັງໝົດຈຳນວນ 182,90 ຕື້ກີບ ເທົ່າກັບ 45 % ຂອງແຜນການປີ (407,31 ຕື້ກີບ) ສົມທຽບໃສ່ 6 ເດືອນປີຜ່ານມາ (153,99 ຕື້ກີບ )ເພີ່ມຂຶ້ນ 28,91 ຕື້ກີບ ຫຼື 19 %.
ຮອດທ້າຍເດືອນ 6 ປີ 2022 ມີຍອດສິນເຊື່ອທັງໝົດຈຳນວນ 2.651,67 ຕື້້ກີບ, ເທົ່າກັບ 96 % ຂອງແຜນປີ ( 2.766,44 ຕື້ກີບ ) ສົມທຽບໃສ່ຕົ້ນປີ ຫຼຸດລົງ 5 %.
- ໃນນີ້ ຂົງເຂດ: ໃນເມືອງເປົ້າໝາຍ 667,46 ຕື້ກີບ ເທົ່າກັບ 63 %, ຈຸດສຸມລັດຖະບານ – ທ້ອງຖິ່ນ 288,35 ຕື້ກີບ ເທົ່າກັບ 11 %, ບ້ານ 3 ສ້າງ 294,35 ຕື້ກີບ ເທົ່າກັບ 11 %, ໂຄງການຜະລິດສິນຄ້າ – ນອກ ເມືອງເປົ້າໝາຍ 404,50 ຕື້ກີບ ເທົ່າກັບ 15 % ຂອງຍອດສິນເຊື່ອທັງໝົດ.
- ໂຄງການປູກຝັງ 846,05 ຕື້ກີບ ເທົ່າກັບ 32 %, ໂຄງການລ້ຽງສັດ 560,99 ຕື້ກີບ ເທົ່າກັບ 59 %, ໂຄງການຫັດຖະກຳ 34,29 ຕື້ກີບ ເທົ່າກັບ1,29 %, ໂຄງການອຸດສາຫະກຳປຸງແຕ່ງ 62 ຕື້ກີບ ເທົ່າກັບ 2,33 %, ໂຄງການບໍລິການ 148,19 ຕື້ກີບ, ເທົ່າກັບ 5,58 % ຂອງຍອດສິນເຊື່ອທັງໝົດ.
- ພ້ອມດຽວກັນນັ້ນ ໃນກອງປະຊຸມບັນດາຄະນະອຳນວຍການ, ຄະນະພະແນກ ແລະ ສາຂາ ກໍ່ໄດ້ປະກອບຄໍາເຫັນໃສ່ບາງບັນຫາ ແລະ ຊອກວິທີແກ້ໄຂໃນຈຸດທີ່ຄົງຄ້າງ;
ໃນຕອນທ້າຍ, ທ່ານ ວຸດທິ ເລື່ອນວິໄລວົງ ຜູ້ອຳນວຍການ ທະນາຄານນະໂຍບາຍ ປະທານກອງປະຊຸມ ໄດ້ໂອ້ລົມ ແລະ ມີຄຳເຫັນ ຕໍ່ກອງປະຊຸມ ຊຶ່ງທ່ານໄດ້ຍົກໃຫ້ເຫັນສະພາບການຂອງໂລກ ແລະ ພາກພື້ນ ໂດຍສະເພາະຜົນກະທົບ ຈາກພະຍາດໂຄວິດ-19, ບັນຫາໄພເງິນເຟີ້, ເງິນກີບອ່ອນຄ່າ ແລະ ອື່ນໆ. ຈາກນັ້ນ, ທ່ານ ຍັງໄດ້ຮຽກຮ້ອງໃຫ້ພະນັກງານທຸກຄົນ ຈົ່ງເອົາໃຈໃສ່ປະຕິບັດວຽກງານວິຊາສະເພາະ ຂອງຕົນໃຫ້ດີທີ່ສຸດ, ເພື່ອປະຕິບັດແຜນການ 6 ເດືອນ ທ້າຍປີ 2022 ຕ້ອງໄດ້ອອກແຮງສູ້ຊົນ ໃຫ້ບັນລຸເປົ້າໝາຍທີ່ວາງໄວ້ໃຫ້ປະກົດຜົນເປັນຈິງ ເພື່ອປະກອບສ່ວນໃນການແກ້ໄຂຄວາມທຸກຍາກ ແລະ ສ້າງສາພັດທະນາປະເທດຊາດ ໃຫ້ມີຄວາມຈະເລີນຮຸ່ງເຮືອງ.
