ໃນຕອນເຊົ້າຂອງວັນທີ 14 ມີນາ 2024 ເວລາ 08:30 ໂມງ ທີ່ ຫ້ອງປະຊຸມລ້ານຊ້າງ ຊັ້ນ 6 ທະນາຄານແຫ່ງ ສປປ.ລາວ (ທຫລ) ໄດ້ຈັດກອງປະຊຸມສະພາບໍລິຫານ ສະໄໝສາມັນ ຄັ້ງທີ I ປະຈໍາປີ 2024 ທະນາຄານນະໂຍບາຍ (ທນບ) ຂຶ້ນ ໂດຍການເປັນປະທານຂອງທ່ານ ບຸນເຫຼືອ ສິນໄຊວໍຣະວົງ ຜູ້ວ່າການ ທຫລ, ປະທານສະພາບໍລິຫານ ທນບ, ມີບັນດາທ່ານຮອງປະທານ, ກໍາມະການສະພາບໍລິຫານ ທນບ, ຄະນະອໍານວຍການ ແລະ ຫົວໜ້າພະແນກ ທນບ ເຂົ້າຮ່ວມຢ່າງພ້ອມພຽງ.
ກອງປະຊຸມຄັ້ງນີ້ ແມ່ນປະຕິບັດຕາມວາລະລະບອບຂອງປະຊຸມ ແລະ ໄດ້ພ້ອມກັນ ຄົ້ນຄວ້າ ສະຫຼຸບຕີລາຄາ ເຖິງ ຜົນສຳເລັດ, ດ້ານອ່ອນ ຂໍ້ຄົງຄ້າງ ໃນການຈັດຕັ້ງປະຕິບັດມະຕິກອງປະຊຸມສະພາບໍລິຫານ ທນບ ສະໄໝສາມັນ ຄັ້ງທີ I ປະຈຳປີ 2023 ຜ່ານມາ, ສະຫລຸບການເຄື່ອນໄຫວວຽກງານ ທະນາຄານນະໂຍບາຍ ປະຈຳປີ 2023 ແລະ ໄດ້ຮວ່ມກັນຄົ້ນຄວ້າ ກຳນົດ ທິດທາງ-ແຜນການ ປະຈຳປີ 2024 ຂອງ ທນບ ເປັນຕົ້ນແມ່ນ, ແຜນການສະໜອງສິນເຊື່ອ ແຜນການດຳເນີນທຸລະກິດ ແລະ ແຜນການກະກຽມຄວາມພ້ອມຮອບດ້ານໃນການຫັນເປັນ ທະນາຄານພັດທະນາຊົນນະບົດ ( ທພບ ) ແລະ ວຽກງານຈຸດສູມອື່ນໆອີກຈຳນວນໜຶ່ງ.
ເນື່ອງໃນໂອກາດທີ່ມີຄວາມໝາຍຄວາມສຳຄັນນີ້ ທ່ານ ປະທານກອງປະຊຸມ ໄດ້ໃຫ້ກຽດມີຄຳເຫັນ ໃຫ້ທິດຊີ້ນໍາ ໃນການສືບຕໍ່ວຽກງານໃນຕໍ່ໜ້າ ໂດຍຕີລາຄາສູງ ຕໍ່ຜົນສຳເລັດ ໃນການຊີ້ນຳ – ນຳພາ ຂອງ ບັນດາທ່ານ ຄະນະອຳນວຍການ ແລະ ຄະນະບໍລິຫານງານ ທນບ ທັງໝົດ ໃນການຈັດຕັ້ງປະຕິບັດວຽກງານໃນປີຜ່ານມາ ຈຶ່ງສາມາດສູ້ຊົນຜ່ານຜ່າ ແລະ ຍາດໄດ້ຜົນສໍາເລັດທີ່ພົ້ນເດັ່ນ ຫຼາຍດ້ານພໍສົມຄວນ ເຊີ່ງໂດຍລວມເຫັນວ່າໄດ້ມີການສູ້ຊົນບຸກບືນຈັດຕັ້ງປະຕິບັດບັນດານະໂຍບາຍ, ໜ້າທີ່ການເມືອງຢ່າງມີຈຸດສຸມ ຕາມພັກ-ລັດຖະບານມອບໜາຍໃຫ້ກໍ່ຄືການ ສະໜອງສິນເຊື່ອເຂົ້າສູ່ບັນດາເມືອງ, ບ້ານທີ່ທຸກຍາກ ເພື່ອປະກອບສ່ວນແກ້ໄຂຄວາມທຸກຍາກໃຫ້ແກ່ປະຊາຊົນ, ສ້າງພື້ນຖານທາງດ້ານເສດຖະກິດການເມືອງໃຫ້ແກ່ຄອບຄົວ ແລະ ເມືອງທຸກຍາກໃຫ້ນັບມື້ນັບໃຫ້ມີພື້ນຖານເສດຖະກິດໃຫ້ດີຂຶ້ນ.
ກອງປະຊຸມໄດ້ດໍາເນີນເປັນເວລາເຄິ່ງວັນ, ຜູ້ເຂົ້າຮ່ວມໄດ້ຮັບຟັງການລາຍງານຂອງແຕ່ລະໜ້າວຽກ ແລະ ມີການຄົ້ນຄວ້າປະກອບຄໍາຄິດຄໍາເຫັນຕໍ່ກັບເນື້ອໃນຂອງກອງປະຊຸມຢ່າງກົງໄປກົງມາ ເພື່ອເຮັດໃຫ້ແຕ່ລະບັນຫາທີ່ຍົກຂື້ນມີວີທີທາງອອກທີ່ເໝາະສົມ ແລະ ສາມາດນໍາໄປຈັດຕັ້ງປະຕິບັດໃຫ້ເກີດໝາກຜົນຕົວຈິງ.
ຂ່າວ-ພາບ: ສັນທະກອນ ທະນູສິງ.
