ເພື່ອສືບຕໍ່ຈັດຕັ້ງປະຕິບັດວຽກງານຂອງ ທະນາຄານ ນະໂຍບາຍໄປຕາມແນວທາງນະໂຍບາຍຂອງພັກ-ລັດວາງອອກໃຫ້ບັນລຸເປົ້າໝາຍ ທະນາຄານ ນະໂຍບາຍ ສາຂາ ຫຼວງພະບາງໄດ້ເປີດກອງປະຊຸມສະຫຼຸບວຽກງານປະຈຳ09 ເດືອນ ປີ 2020 ແລະ ວາງທິດທາງແຜນການປະຈໍາໄຕມາດ 04 ກໍ່ຄື 03 ເດືອນທ້າຍປີ 2020 ຂື້ນໃນວັນທີ 16-17 ຕຸລາ2020 ທີ່ຫ້ອງປະຊຸມຊັ້ນ III ສາຂາຫຼວງພະບາງ, ພາຍໃຕ້ການເປັນປະທານຂອງທ່ານ ຄໍາພັນ ແສນຄໍາ ຫົວໜ້າ ທະນາຄານ ນະໂຍບາຍ ສາຂາຫຼວງພະບາງ, ໂດຍໃຫ້ກຽດເຂົ້າຮ່ວມກອງປະຊຸມມີບັນດາທ່ານຄະນະສາຂາ, ຄະນະຂະແໜງ, ຫົວໜ້າໜ່ວຍບໍລິການ ແລະ ຕະຫຼອດຮອດພະນັກງານວິຊາການບັນຊີ ແລະ ສິນເຊື່ອຈຳນວນໜື່ງຈາກໜ່ວຍບໍລິການເຂົ້າຮ່ວມຢ່າງພ້ອມພຽງ.
ຈຸດປະສົງຂອງກອງປະຊຸມໃນຄັ້ງນີ້ເພື່ອສະຫຼຸບຕີລາຄາການເຄື່ອນໄຫວວຽກງານຮອບດ້ານ ປະຈຳ 09 ເດືອນ ປີ 2020 ແລະ ວາງທິດທາງແຜນການເຄື່ອນໄຫວປະຈໍາໄຕມາດ 04 ກໍ່ຄື 03 ເດືອນທ້າຍປີ 2020 ຂອງສາຂາ, ໃນກອງປະຊຸມ ໄດ້ຜ່ານບົດສະຫຼຸບຕີລາຄາການເຄື່ອນໄຫວວຽກງານຮອບດ້ານປະຈໍາ 09 ເດືອນ ແລະ ທິດທາງແຜນການ ເຄື່ອນໄຫວໃນ 03 ເດືອນທ້າຍປີ 2020ຈາກນັ້ນກອງປະຊຸມໄດ້ຍົກໃຫ້ເຫັນໝາກຜົນດ້ານດີທີ່ທາງສາຂາສາມາດຈັດຕັ້ງປະຕິ ບັດໄດ້ ແລະ ບັນຫາດ້ານອ່ອນ ແລະ ຂໍ້ຄົງຄ້າງທີ່ຈະສືບຕໍ່ປັບປຸງແກ້ໄຂ,ໃນກອງປະຊຸມໄດ້ມີການປະກອບຄຳເຫັນຈາກບັນດາຜູ້ເຂົ້າຮ່ວມກອງປະຊຸມໂດຍສະເພາະຈາກຕົວແທນໜ່ວຍບໍລິການໃນຂອດການເຄື່ອນໄຫວວຽກງານສິນເຊື່ອ, ບັນ ຊີ ແລະ ກວດກາໂດຍສະເພາະການແກ້ໄຂບັນຫາໜີ້ທີ່ບໍ່ເກີດດອກອອກຜົນ,ບັນຫາປະກົດການຫຍໍ້ທໍ້ ແລະ ຂອດການ ຈັດຕັ້ງປະຕິບັດວຽກງານທີ່ຍັງບໍ່ສອດຄ່ອງກັບຄວາມເປັນຈິງ, ຜ່ານການປະກອບຄຳຄິດເຫັນຢ່າງກົງໄປກົງມາຈາກບັນດາທ່ານສາມາດຍົກໃຫ້ເຫັນການປະຕິ ບັດໜ້າທີ່ການເມືອງທີ່ພັກ – ລັດ ມອບໜາຍໃຫ້ໄດ້ເປັນຢ່າງດີ, ຄຽງຄູ່ກັນນັ້ນກໍ່ຍັງມີຫລາຍບັນຫາທີ່ຍັງເປັນຂໍ້ຄົງຄ້າງມາຈາກຫຼາຍສາເຫດເຊີ່ງພວກເຮົາຕ້ອງໄດ້ພ້ອມກັນສືບຕໍ່ແກ້ໄຂໃນ 03 ເດືອນທ້າຍປີ 2020.
ກອງປະຊຸມໄດ້ຮັບຟັງຄຳເຫັນໂອ້ລົມ ແລະ ທິດຊີ້ນຳຈາກ ທ່ານ ຄໍາພັນ ແສນຄຳ ຫົວໜ້າ ທນບ ສາຂາຫຼວງພະບາງໄດ້ເນັ້ນໜັກຫຼາຍບັນຫາສຳຄັນດັ່ງນີ້:
- ໃຫ້ຄະນະຂະແໜງ ແລະ ໜ່ວຍບໍລິການເອົາໃຈໃສ່ສືກສາອົບຮົມການເມືອງ-ແນວຄິດໃຫ້ພະນັກງານທີ່ຂື້ນກັບການຄຸ້ມຄອງຂອງຕົນເພື່ອໃຫ້ໄປໃນລວງດຽວກັນ,ການສືກສາອົບຮົມແມ່ນໃຫ້ສອດຄ່ອງກັບໜ້າທີ່ການເມືອງທີ່ພັກ-ລັດມອບໝາຍໃຫ້ເຊັ່ນວ່າ:ຄຸ້ມຄອງສິນເຊື່ອໃຫ້ຮັບປະກັນຄຸນນະພາບ, ຕ້ອງມີການປະຊຸມສ່ອງແສງປະ ຈຳອາທິດ, ປະຈຳເດືອນ ແລະ ມີການຕຳນິສົ່ງຂ່າວເຊິ່ງກັນ ແລະ ກັນ.
- ໃຫ້ອ້າຍນ້ອງພະນັກງານກໍາແໜ້ນນະໂຍບາຍສິນເຊືອ(ສະບັບປັບປຸງໃຫມ່)ສະບັບເລກທີ 01/ທນບ, ລົງວັນທີ 13 ກໍລະກົດ 2020.
- ຮັບຮອງເອົາຄຳຄິດເຫັນຂອງຄະນະອຳນວຍການເຊັ່ນ:ປັບປຸງການປະຕິບັດວຽກງານວິຊາສະເພາະ ແລະວຽກງານການຈັດຕັ້ງຄືນໃຫມ່ເພື່ອສອດຄ່ອງກັບໜ້າວຽກ.
- ໃຫ້ທຸກຂັ້ນເອົາໃຈໃສ່ປ້ອງກັນເວນຍາມສໍານັກງານອົງການໃຫ້ມີຄວາມສະຫງົບປອດໄພ.
- ການແບ່ງຄວາມຮັບຜິດຊອບຕ້ອງໃຫ້ເໝາະສົມຕໍ່ກັບໜ້າວຽກເຊັັ່ນ:ວຽກຫ້ອງການ, ກວດກາ, ບັນຊີ ແລະ ສິນເຊື່ອ ຫ້າມບໍ່ໃຫ້ແບ່ງເປັນບູລິມະສິດ ສະເພາະຕົນເອງ.
- ຄະນະຂະແໜງ ແລະ ໜ່ວຍບໍລິການ ຕ້ອງຮູ້ການຄຸ້ມຄອງ ບໍລິຫານໜ້າວຽກຢາ່ງເປັນລະບົບ
- ໃຫ້ເອົາໃຈໃສ່ກໍາແໜ້ນບັນດາຂໍ້ຫ້າມຕ່າງ.
- ຕ້ອງຮູ້ຈັກບໍລິຫານເວລາໃຫ້ຖືກຕ້ອງ,ບໍລິຫານຊັບສິນ ແລະ ເຄື່ອງໃຊ້ພາຍໃນສໍານັກງານຕ່າງໆ.
- ຮຽກຮ້ອງໃຫ້ແຕ່ລະທ່ານມີຄວາມສາມັກຄີພາຍໃນຢ່າງແໜ້ນແຟ້ນ ມີການຊ່ວຍເຫຼືອ ເຊິ່ງກັນ ແລະ ກັນ ໃນໝູ່ຄະນະບໍ່ໃຫ້ສ້າງຄວາມແຕກແຍກໃນຖັນແຖວພະນັກງານ, ກໍລະນີມີການສັບຊ້ອນ ປ່ຽນແທນບ່ອນປະຈໍາການ ໃຫ້ຖືວ່າເປັນວຽກງານປົກກະຕິ, ໃຫ້ເຄົາລົບການຕັດສິນໃຈຂອງການຈັດຕັ້ງ. ພະນັກງານທຸກຄົນຕ້ອງມີຄວາມເຂົ້າໃຈ ຕໍ່ພາລະບົດດບາດ, ສິດ ແລະ ໜ້າທີ່ຂອງຕົນນັບແຕ່ຂັ້ນຂະແໜງການ, ໜ່ວຍບໍລິການ ຕະຫຼອດຮອດວິຊາການຕ່າງໆ.
- ສາຂາ ແລະ ໜ່ວຍບໍລິການໃຫ້ເພີ້ມທະວີໃນການແກ້ໄຂໜີ້ສິນທີ່ບໍ່ເກີດດອກອອກຜົນໃຫ້ມີອັດຕາສ່ວນລຸດລົງໂດຍອິງໃສ່ແຈ້ງການແນະນຳທີ່ຂັ້ນເທິງວາງອອກໃນແຕ່ໄລຍະ ແລະ ຕາມລະບຽບຂອງ ທນບ.
