ແຫຼ່ງທຶນ ຫຼື ສິນເຊື່ອ ທະນາຄານນະໂຍບາຍ (ທນບ) ຜ່ານອົງການຈັດຕັ້ງການເມືອງ-ສັງຄົມ ແລະ ກອງທຶນຂັ້ນບ້ານ (ອກສກ) ແມ່ນການສະໜອງສິນເຊື່ອໃນຮູບແບບໃໝ່ ທີ່ມີເປົ້າໝາຍ ແລະ ກົນໄກ ເພື່ອຮັບປະກັນທາງດ້ານປະສິດທິຜົນໃນການໃຫ້ສິນເຊື່ອ ປະກອບສ່ວນຊຸກຍູ້ການຜະລິດສິນຄ້າແກ້ໄຂຄວາມທຸກຍາກຂອງປະຊາຊົນ ແລະ ຜັນຂະຫຍາຍວຽກງານ 3 ສ້າງເຂົ້າສູ່ລວງ ເລິກ ພ້ອມທັງເປັນການເສີມຂະຫຍາຍບົດບາດຂອງອົງການຈັດຕັ້ງການເມືອງ-ສັງຄົມ ຂັ້ນທ້ອງຖິ່ນ ເຮັດໃຫ້ຄອບຄົວທຸກຍາກໄດ້ເຂົ້າເຖິງເເຫຼ່ງທຶນຂອງ ທນບ ຫຼາຍຂຶ້ນ.
ທ່ານ ວຸດທິ ເລື່ອນວິໄລວົງ ຄະນະພັກທະນາຄານແຫ່ງ ສປປ ລາວ, ຜູ້ອໍານວຍການ ທນບ ແຈ້ງໃຫ້ຮູ້ວ່າ: ອກສກ ແມ່ນອົງການຈັດຕັ້ງມະຫາຊົນ ແລະ ກອງທຶນ ໄດ້ຮັບອະນຸຍາດສ້າງຕັ້ງ ແລະ ເຄື່ອນໄຫວ ຢູ່ຂັ້ນບ້ານ ໂດຍມີພາລະບົດບາດໜ້າທີ່ຊ່ວຍຄຸ້ມຄອງບໍລິຫານເເຫຼ່ງທຶນຂອງ ທນບ ໃຫ້ມີປະສິດທິຜົນ ແລະ ຮ່ວມມືກັບ ທນບ ໃນການຈັດຕັ້ງປະຕິບັດໜ້າທີ່ຕົວຈິງໃນການຈັດຕັ້ງກຸ່ມກູ້ຢືມເງິນ, ຄັດເລືອກຫົວໜ້າກຸ່ມ, ຮອງກຸ່ມ, ຄັດເລືອກສະມາຊິກຜູ້ມີເງື່ອນໄຂເຂົ້າຮ່ວມໃນກຸ່ມ, ກໍານົດໂຄງການ, ສ້າງແຜນສິນເຊື່ອກໍານົດວົງເງິນກູ້ໃຫ້ຄອບຄົວສະມາຊິກ, ເຂົ້າຮ່ວມໃນການປ່ອຍເງິນກູ້, ກວດກາຕິດຕາມການນໍາໃຊ້ເງິນກູ້, ຮ່ວມກັບ ທນບ ໃນການແກ້ໄຂບັນຫາໜີ້ສິນ ແລະ ບັນຫາອື່ນໆ ທີ່ຕິດພັນກັບວຽກງານຂອງ ທນບ.
ສໍາລັບເງື່ອນໄຂຂອງບ້ານທີ່ຈັດຕັ້ງເປັນ ອກສກ ນັ້ນ ແມ່ນບ້ານທີ່ມີຄວາມເຂັ້ມແຂງດ້ານການຈັດຕັ້ງ ແລະ ເຄື່ອນໄຫວວຽກງານດີ, ສະມາຊິກ ແລະ ປະຊາຊົນພາຍໃນບ້ານໃຫ້ຄວາມເຊື່ອໝັ້ນໃນການບໍລິຫານ ດ້ວຍຄວາມຊື່ສັດ ແລະ ທ່ຽງທໍາ, ສະມາຊິກມີຄວາມພ້ອມ ແລະ ເປັນເອກະພາບ ທີ່ຈະເຮັດວຽກຮ່ວມກັບ ທນບ; ສະເພາະບຸກຄົນ ທີ່ຈະປະກອບເປັນຄະນະເຮັດວຽກ ຕ້ອງມີລະ ດັບຄວາມຮູ້ຢ່າງໜ້ອຍຈົບມັດທະຍົມຕົ້ນ, ຮັບການເຫັນດີຈາກອົງການຈັດຕັ້ງກ່ຽວຂ້ອງ, ອໍານາດການປົກຄອງບ້ານ ແລະ ຂັ້ນເມືອງ;
ກ່ຽວກັບຄວາມຮັບຜິດຊອບເເຕ່ລະຝ່າຍຂອງ ອກສກ ແມ່ນຈັດຕັ້ງປະຕິບັດເນື້ອໃນການມອບສິດຕາມສັນຍາ ທີ່ໄດ້ເຊັນຮ່ວມກັນ; ຈັດແບ່ງພະນັກງານຮັບຜິດຊອບແຕ່ລະໜ້າວຽກ ໂດຍມີການຕົກລົງແຕ່ງຕັ້ງ; ສ້າງແຜນການຕິດຕາມກວດກາການເຄື່ອນ ໄຫວລູກຄ້າເງິນກູ້ຂອງຕົນປະຈໍາງວດ ແລະ ປະຈໍາປີ; ປະສານສົມທົບພາກສ່ວນ ແລະ ຂະແໜງການກ່ຽວຂ້ອງຊຸກຍູ້ດ້ານວິຊາການແກ່ລູກຄ້າ; ສະຫຼຸບລາຍງານຜົນການຈັດຕັ້ງປະຕິບັດໃຫ້ ທນບ ຮັບຊາບເປັນປະຈໍາໃນທຸກເດືອນ, ງວດ ແລະ ປີ; ຈັດກອງປະຊຸມຮ່ວມກັບ ທນບ ຕາມຂັ້ນຕອນ ເພື່ອປະເມີນຜົນການຈັດຕັ້ງປະຕິບັດ.
ສະເພາະຄວາມຮັບຜິດຊອບຂອງ ທນບ ແມ່ນສະໜອງແຫຼ່ງທຶນ ຕາມແຜນການແຕ່ລະປີ, ສະໜອງອຸປະກອນຮັບໃຊ້ ທີ່ ຈໍາເປັນ, ແບບພິມເອກະສານຕ່າງໆ ທີ່ກ່ຽວຂ້ອງກັບການຈັດຕັ້ງປະຕິບັດວຽກສິນເຊື່ອ; ຈັດສໍາມະນາດ້ານວິຊາການໃຫ້ກັບ ອກສກ ຜູ້ທີ່ຈະເຮັດວຽກຕົວຈີງ ໃຫ້ມີຄວາມຮູ້-ຄວາມສາມາດ ເຮັດວຽກ ຕາມການມອບໝາຍ; ອໍານວຍຄວາມສະດວກໃຫ້ອົງການຈັດຕັ້ງ ອກສກ ໃນການປະຕິບັດວຽກຕົວຈິງ ຕາມຂອບເຂດສິດ ທີ່ຮັບອະນຸມັດໃຫ້ຈັດຕັ້ງປະຕິບັດ; ອອກແຈ້ງການໃຫ້ອົງການຈັດຕັ້ງທີ່ຮັບມອບສິດ ເພື່ອຊາບ ກ່ຽວກັບການຕົກລົງບັນຫາຕ່າງໆ ທີ່ກ່ຽວຂ້ອງກັບວຽກງານສິນເຊື່ອຂອງ ທນບ ທີ່ພົວພັນເຖິງ ອກສກ ແລະ ຕິດ ຕາມກວດກາບັນດາເປົ້າໝາຍ ທີ່ໄດ້ປ່ອຍເງິນກູ້. ນອກນີ້, ທັງ ອກສກ ແລະ ທນບ ຍັງມີຄວາມຮັບຜິດຊອບຮ່ວມກັນ ເປັນຕົ້ນ ພິຈາ ລະນາຮັບຮອງເອົາແຜນການສິນເຊື່ອແຕ່ລະປີຕາມການສັງລວມ ແລະ ນໍາສະເໜີຂອງອົງການຮັບມອບສິດໃຫ້ປະຕິບັດ; ຮັບຮອງຜົນກ່ຽວກັບການຈັດຕັ້ງປະຕິບັດວຽກງານຕາມຄວາມຮັບຜິດຊອບ ເພື່ອລາຍງານຂັ້ນເທິງ ຕາມສາຍການຈັດຕັ້ງຂອງຕົນ, ອົງການຈັດຕັ້ງທີ່ກ່ຽວຂ້ອງ ແລະ ຈັດກອງປະຊຸມສໍາມະນາ, ຮ່ວມປຶກສາຫາລືແກ້ໄຂບັນຫາທີ່ກ່ຽວຂ້ອງ ຕາມການສະເໜີຂອງອີກຝ່າຍ.
ທ່ານຜູ້ອໍານວຍການ ທນບ ຍັງແຈ້ງໃຫ້ຮູ້ເຖິງໝາກຜົນໃນການຈັດຕັ້ງປະຕິບັດການສະໜອງສິນເຊື່ອຜ່ານ ອກສກ ຊຶ່ງຜ່ານການຈັດຕັ້ງປະຕິບັດເຫັນວ່າ: ໄດ້ຮັບຜົນສໍາເລັດຫຼາຍປະການ ໂດຍໄດ້ກໍານົດເອົາບ້ານທີ່ມີເງື່ອນໄຂ, ອົງການຈັດຕັ້ງບ້ານ ທີ່ມີຄວາມເຂັ້ມແຂງ, ຍອດໜີ້ NPL ຕາມກໍານົດໄວ້; ມາຮອດປະຈຸບັນ ສາມາດປະຕິບັດໄດ້ທັງໝົດມີ 1 ສໍານັກງານໃຫຍ່, 10 ສາຂາ, 3 ຫ້ອງ ການປະສານງານ ແລະ 26 ໜ່ວຍບໍລິການ ຫຼື ເທົ່າກັບ 15 ແຂວງ, 48 ເມືອງ, 117 ບ້ານ, 912 ກຸ່ມ, 5.552 ຄອບຄົວ ໃນນັ້ນຢູ່ເມືອງສັງທອງ ນະຄອນຫຼວງວຽງຈັນ ສາມາດຈັດຕັ້ງປະຕິບັດສະໜອງສິນເຊື່ອຜ່ານ ອກສກ ໄດ້ຫຼາຍກ່ວາໝູ່ຄືປະຕິບັດໄດ້ 14 ບ້ານ, ມີຍອດສິນເຊື່ອທັງໝົດ 13,710 ຕື້ກ່ວາກີບ ສາມາດເກັບຕົ້ນທຶນໄດ້ 4,30 ຕື້ກີບ ແລະ ເກັບດອກເບ້ຍໄດ້ 0,47 ຕື້ກີບ, ຜ່ານການ ຈັດຕັ້ງປະຕິບັດສາມາດເກັບໜີ້ຕົ້ນທຶນ ແລະ ດອກເບ້ຍໄດ້ຕາມກໍານົດ; ສະເລ່ຍຢູ່ໃນລະດັບ 95-100% ແລະ ທ່ານ ຍັງໄດ້ເນັ້ນໜັກຕື່ມວ່າ: ການຈັດຕັ້ງປະຕິບັດສິນເຊື່ອຜ່ານ ອກສກ ແມ່ນພວກເຮົາໄດ້ຈັດຕັ້ງຜັນຂະຫຍາຍບົດຮຽນໃນການສະໜອງສິນເຊື່ອຂອງທະ ນາຄານນະໂຍບາຍສັງຄົມຂອງ ສສ.ຫວຽດນາມເຂົ້າສູ່ທ້ອງຖິ່ນຕ່າງໆຂອງ ສປປ ລາວ ຢ່າງປະດິດສ້າງ ແລະ ແທດເໝາະກັບສະພາບ, ເງື່ອນໄຂ, ທ່າແຮງຕົວຈິງຂອງທ້ອງຖິ່ນ; ຜ່ານການຈັດຕັ້ງປະຕິບັດສິນເຊື່ອທີ່ມີສ່ວນຮ່ວມຂອງ ອກສກ ໄດ້ເຮັດໃຫ້ອົງການດັ່ງກ່າວມີ ຄວາມເຂັ້ມແຂງ, ພະນັກງານຂັ້ນບ້ານ ໄດ້ຍົກລະດັບຄວາມຮູ້-ຄວາມສາມາດໃນການບໍລິຫານແຫຼ່ງທຶນສູງຂຶ້ນ ສາມາດປ່ອຍເຂົ້າຖືກເປົ້າໝາຍ ເຮັດໃຫ້ປະຊາຊົນໄດ້ນໍາໃຊ້ທຶນຮອນດອກເບ້ຍຕໍ່າຂອງລັດຖະບານເຂົ້າໃນການຜະລິດ, ການບໍລິການ, ແກ້ໄຂຄວາມທຸກຍາກ ຕາມແນວທາງຂອງພັກ ແລະ ແຜນພັດທະນາເສດຖະກິດຂອງຊາດ, ຂອງທ້ອງຖິ່ນໃຫ້ດີຂຶ້ນເປັນກ້າວໆ ແລະ ປະຕິບັດພາລະ ກິດຂອງຕົນໃຫ້ສົມກັບວ່າ: “ທນບ ເປັນທະນາຄານຂອງປະຊາຊົນ”.
ໂດຍ: ຣັດສະໝີ ດວງສັດຈະ
